沙畹

沙畹 Émmanuel-Édouard Chavannes
沙畹
出世	1865年10月5號 法國里昂
死	1918年1月29號 法國巴黎
國籍	法國
職業	考古學者、漢學家

沙畹（粵拼：saa1 jyun2；法文：Émmanuel-Édouard Chavannes；1865年10月5號—1918年1月29號），字滋蘭（zi1 laan4），號獅城博士（si1 sing4 bok3 si6），係法國嘅東方學者（漢學家）、歷史學者。佢出生喺里昂。佢有名在於翻譯咗司馬遷嘅《史記》，係呢部書第一個西歐語言嘅翻譯本。沙畹係近現代最有影響力嘅漢學者之一，譽爲「歐洲漢學泰斗」。佢亦睇做係法國漢學、東方學、東方史學嘅先驅。

生平經歷

沙畹喺學生時節，同嗰陣時大部分學生一樣，喺里昂嘅學校主要學拉丁文同古希臘文，爲咗入學到巴黎嘅名牌學校，佢要爲大學校入學試驗做準備。呢個試驗合格咗，喺1885年志願入咗巴黎高等師範學校文學科，學咗三年時間。喺巴黎高師勤務嘅考古學者佐治·皮賀（Georges Perrot）勸佢畢業以後對中國搞研究。因爲同自己嘅教育背景相似，沙畹最初諗住學中國哲學，但學得苦悶，喺亨利·歌治（Henry Cordier）嘅建議下，佢決定去研究中國史，呢項喺當時西歐仲研究得好少。佢開始喺法蘭西公學院學古典中文，又去INALCO學現代中文。佢願想喺中國學到實際經驗，於是活用起自己嘅人脈，喺1889年1月出發去中國，兩個月後到達。

1891年，佢暫時返去法國，同阿列絲·多（Alice Dor）結婚，佢係里昂有名驗光師嘅女。佢哋兩個生咗一仔二女，個仔係一戰中好叻嘅飛機師費能·亨利·沙寰（Fernand Henri Chavannes）。沙畹直到1893年都留喺中國，之後歸咗法國，做咗法蘭西公學院嘅中國學科教授，呢個位自1892年11月以後就一直空住。雖然沙畹只係用咗五年時間學中文，但佢嘅能力畀學界公認。佢活潑噉參加學術活動，做咗法蘭西學會嘅會員，亦係其他多個學會嘅名譽會員。

業績

從1885年到1905年間，佢翻譯註釋咗《史記》（《Les Mémoires historiques de Se-ma Ts'ien》）。

喺1913年，斯坦因喺1907年發現嘅木簡「敦煌漢簡」700片餘畀沙畹解讀完畢，由牛津大學出版社出版咗《Les documents chinois : découverts par Aurel Stein dans les sables du Turkestan oriental》。

1910年做咗法國亞洲學會副會長，1916年做咗英國亞洲學會嘅名譽會員。

佢有篇主要論文《le t'ai chan : essai de monographie d'un culte chinois》，呢篇論文研究咗泰山，係關於中國人對泰山嘅信仰崇拜嘅。呢篇著作結合攷據學同田野調查，開啓咗歐洲現代漢學嘅先河。

佢編纂咗《Documents sur les Tou-kiue (Turcs) occidentaux》，由馮承鈞譯成咗《西突厥史料》（1934年），2004年中華書局再版過，喺中國本土同臺灣出版過數種版本。