火車到站

《火車到站》（法文：L'Arrivée d'un train en gare de La Ciotat）又叫《火車進站》，係一齣早期嘅電影。佢由盧米埃兄弟出品，内容係一架火車埋站嘅場景。《火車到站》成日俾人誤傳話係世界上第一齣電影，但其實佢比起真正嘅第一齣電影遲咗成個月首映。

内容

同盧米埃兄弟嘅其他早期電影一樣，《火車到站》係一齣實況電影（英文：actuality），拍嘅係某時某地真實發生嘅事物。《火車到站》片長只得50秒，並且係一鏡到尾。唯一嘅鏡頭真實噉記錄咗法國南部沿海小鎮拉西奧塔（法文：La Ciotat）嗰度一列蒸汽火車慢慢駛入火車站，以及啲人喺火車側邊走動嘅情景。

成部電影冇經過任何剪接，亦冇刻意造成嘅鏡頭郁動。除此之外《火車到站》播片嗰陣係按照返拍片嘅原速嚟播嘅，並冇加快減慢，呢點同之後差利時代嘅默片做法唔同。

製作

盧米埃兄弟發明嘅Cinématographe攝影機

呢齣電影係盧米埃兄弟一腳踢整出嚟嘅作品，由拍攝、執導到製片都係佢哋兩個一手包辦嘅。負責揸機嘅細佬路易·盧米埃用咗35毫米格式、長寬比1.31:1嘅菲林，而鏡頭就用返盧米埃兄弟自己發明嘅多功能攝影機。呢部嘢法文叫Cinématographe，除咗可以當做普通嘅電影攝影機噉用，仲兼具埋菲林打印同投影嘅功能。因為當時嘅技術限制，《火車到站》係一齣黑白片兼默片。

公映

有講法話盧米埃兄弟喺1895年12月28號搞嘅電影放映會係世界上第一場商業電影放映，所以打頭炮嘅《火車到站》就係全世界第一齣電影。不過呢個講法其實係錯嘅，當日嘅節目表並冇《火車到站》。「第一部電影」嘅殊榮要畀盧米埃兄弟另一齣戲《工廠大門》（法文：La Sortie de l'usine Lumière à Lyon）至啱，而初版嘅《火車到站》要到1896年1月25號先至首映。

其他版本

除咗1896年上映嘅初版之外，盧米埃兄弟之後仲將《火車到站》重拍過兩次，即係夾埋一共有三個版本。依家網上面最容易揾到嘅其實唔係原版，而係1897年夏天重拍嘅第二版，特色係可以見到幾個女人同細路仔上車。

另外，盧米埃兄弟仲拍過一輯3D版嘅《火車到站》，並且喺1934年法國科學院開會嗰陣播過。其實早喺1895年第一齣電影公映之前，盧米埃兄弟已經研究緊點樣拍3D電影。但係因為3D電影唔似2D嘅咁好賣，所以成日俾人遺忘咗。

反響

相傳《火車到站》公映初時，有唔少人都俾架向住佢哋衝緊埋嚟嘅火車嚇親，一路大叫一路走去間房後面避。德國嘅《明鏡》週刊寫話套戲引致咗恐懼乃至恐慌，而英國電視台第四台嘅紀錄片The 100 Greatest Scary Moments（《百大恐怖時刻》）就將《火車到站》列做第一百位。

觀眾有噉嘅反應可能係因為喺電影出現之前，只有暗箱呢個方法整到識郁嘅投影。冇睇過戲嘅觀眾可能以為間房出面真係有駕火車衝緊埋嚟。不過，有啲研究電影嘅歷史學家就質疑呢段故嘅真確性。亦有學者覺得引起恐慌嘅可能係之後重拍嘅3D版，而唔係1896年公映嘅初版，純粹係以訛傳訛傳錯咗。

流行文化

喺2011年嘅冒險電影《雨果的巴黎奇幻歷險》（英文：Hugo）裏面有唔少向早期電影致敬嘅畫面，當中就包括《火車到站》放映嘅一幕。

另外，《文明帝國V》（英文：Civilization V）電子遊戲第二個擴充包《美麗新世界》（英文：Brave New World）嘅開場動畫同預告片入面，都有相傳《火車到站》首映嗰陣引發恐慌、場面混亂嘅情節。

出面網站

• 《火車到站》原版影片（英文）
• 《火車到站》喺IMDb嗰度嘅資料（英文）
• 盧米埃研究所（Institut Lumière）嘅官網（法文）