王莽

出自維基百科,自由嘅百科全書
王莽像

王莽粵拼wong4 mong5前45年23年10月6號),字巨君geoi6 gwan1,係中國新朝皇帝,公元9年23年在位。佢搞過王莽變法,推新政。

屋企人[編輯]

生平[編輯]

王莽因為屋企人嘅關係上位,曾經做過黃門郎、射聲校尉。綏和元年(公元前8年),38歲嘅王莽(當時嘅封號係新都侯)繼承咗大司馬個位。

王莽係一個好識得做騷嘅人。佢成日將自己嘅俸祿分畀自己嘅門客同一啲窮人。又一次王莽其中一個仔殺死自己屋企家奴,王莽逼佢個仔自殺,得到當時人嘅稱讚。

公元1年,王莽經過幾次推辭,接受咗「安漢公」呢個爵位,將俸祿轉封畀兩萬幾人。

元始三年(3年),王莽將自己得15歲嘅女嫁畀12歲嘅漢平帝。隔一年漢平帝就立咗王莽個女做皇后。到5年,王莽用毒酒毒死咗得14歲嘅女婿漢平帝,然後立咗只得兩歲嘅孺子嬰做皇太子。就喺呢個時候不斷有人用各種名義叫王莽上台登基。結果喺居攝三年(公元8年),王莽廢咗孺子嬰,再喺第二年正式登基,改國號為「新」,改年號始建國」,立王臨做皇太子。

王莽坐上皇帝個位之後,依照周朝嘅制度推行新政,換咗好多貨幣,改晒啲官名;恢復井田制,叫「王田制」;將一啲行業轉為國營。由於政策好多都不切實際(離地),好多百姓唔妥王莽,一啲貴族開始乘機起兵反王莽。

17年地方出現赤眉兵同埋綠林兵嘅大規模反抗,史稱「綠林、赤眉起義」。

23年王莽正喺度舉行大典,同年綠林軍攻入京城長安,王莽喺混亂中畀人(有人話係生意人杜吳)殺死,新朝滅亡。在位15年,終年69歲。

佢被校尉公賓就斬首,吊喺宛市嗰度,佢嘅頭顱被東漢朝廷收藏,直至西晉嗰陣(295年),洛陽武庫火燭,燒嗮佢嘅頭顱。

評價[編輯]

王莽係中國史上第一個通過篡位做皇帝嘅人。因為傳統儒家「忠君愛國」嘅觀念,王莽畀人鬧得好犀利。好似《漢書》就將王莽列為「逆臣」。

錢穆喺《國史大綱》入面話,王莽嘅失敗,最主要在於佢嘅政策「多迂通而不合實情處」。