玩轉腦朋友
| 玩轉腦朋友 | |
|---|---|
 | |
| 資料明細 | |
| 導演 | Pete Docter[*] Ronnie del Carmen[*] |
| 監製 | Jonas Rivera[*] John Lasseter[*] 安德魯史達頓[*] |
| 編劇 | Pete Docter[*] Meg LeFauve[*] Josh Cooley[*] Ronnie del Carmen[*] 標·赫特[*] 米高安特 愛美·寶拉[*] |
| 製片商 | 彼思 Walt Disney Pictures[*] |
| 產地 | 美國 |
| 話 | 英文 |
| 上畫同發行 | |
| 上畫日期 | 美國：2015年6月19號 中華人民共和國：2015年10月6號 2015年5月18號 西班牙：2015年7月17號 德國：2015年10月1號 希臘：2015年9月3號 瑞典：2015年8月28號 巴西：2015年6月18號 匈牙利：2015年6月25號 法國：2015年6月17號 |
| 前集同續集 | |
| 續集 | 玩轉腦朋友2 Riley's First Date?[*] |
《玩轉腦朋友》（粵拼：waan2 zyun3 nou5 pang4 jau5，英文：Inside Out ）係一套由和路迪士尼公司喺2015年發行嘅動畫戲電影，由彼思工作室喺2009年開始製作[1]，喺美國於2015年6月19號上畫。故仔講主角腦入面五個情緒嘅人格化角色：阿樂、阿愁、阿燥、阿憎、阿驚。[2]
情節大要
[編輯]套戲開場，首先係確立故事嘅世界觀，講到一個叫做韋莉・安德森（Riley Andersen）嘅細路女，喺佢個腦裡面，有五位情緒專員，佢哋分別係掌控喜樂嘅阿樂、掌控哀傷嘅阿愁、掌控憤怒嘅阿燥、掌控厭惡嘅阿憎同埋掌控恐懼嘅阿驚，佢哋喺韋莉嘅大腦總部，操作韋莉嘅情緒同行為，韋莉嘅經歷會變成一粒粒記憶球，每晚都會送去長期記憶嗰度儲起，當中最重要嗰五粒核心記憶，形成五座漂浮喺腦海入面嘅性格島，形成韋莉嘅人格。一路以嚟，阿樂一直喺大腦總部充當領導角色，並且盡量限制阿愁嘅影響，噉係因為佢覺得阿愁冇咩用，只會阻住韋莉開開心心噉生活。
喺韋莉十一歲嗰年，因為佢阿爸搵到新工，舉家由明尼蘇達州搬咗去三藩市。第一日返新學校，阿愁開始影響本來開心嘅核心記憶，令到韋莉喺全班面前喊咗出嚟，亦造成咗佢第一個悲傷嘅核心記憶。阿樂嘗試拋棄呢件記憶，但佢同阿愁爭執期間，將其他嗰幾粒核心記憶撞甩咗，結果導致性格島冚唪唥 down 晒。跟住阿樂、阿愁同埋啲核心記憶球，就一齊俾記憶通道吸咗出大腦總部。
大腦總部冇咗阿樂同阿愁，韋莉唔再感受到快樂或者悲傷，而阿燥、阿驚同阿憎決定自己控制系統，嘗試建立返快樂嘅核心記憶，但其成效非常惡劣，反而搞到韋莉慢慢疏遠父母同朋友，仲放棄咗佢不嬲最中意玩嘅冰球。隨住核心記憶消失，阿燥佢哋三個仲搞到啲性格島逐一崩塌，跌入記憶垃圾場（Memory Dump）：喺嗰度一切被遺忘嘅嘢都會慢慢消失。
喺長期記憶區域中，阿樂同阿愁撞返韋莉嘅童年假想朋友乒乓（Bing Bong）。乒乓建議一齊搭思想列車返去總部。與此同時，阿燥為咗令韋莉開心返，說服阿驚同阿憎，認為韋莉應該離家出走，返去以前屋企，即係返去有大量快樂回憶嘅地方。同時阿樂、阿愁同乒乓成功搭上思想列車，但喺呢個時候又有一座性格島崩塌，撞冧思想列車嘅路軌，而喺混亂之中，地面崩塌，阿樂同乒乓一齊跌入記憶垃圾場。
阿樂落咗一片陰暗嘅垃圾場，搵返一段段濕碎、開始甩色嘅回憶，期間佢搵到一個記憶球：佢醒返起，韋莉曾經打冰球打輸，當時雖然好唔開心，但因為得到父母同朋友嘅安慰，最後變成一段溫馨快樂嘅回憶。喺呢個時候，阿樂終於明白阿愁嘅真正作用：韋莉情緒低落嗰時，哀傷會提醒身邊嘅人嚟幫助佢。阿樂決心要修補佢嘅錯誤，同乒乓一齊嘗試逃出垃圾場，不過期間乒乓犧牲自己，令阿樂得以逃脫，而佢自己就喺垃圾場入便消失咗。
另一方面，阿燥嘅離家出走計劃搞到大腦總部嘅控制台短路，控制台完全冇晒反應，韋莉陷入抑鬱狀態，並且登上開往明尼蘇達州嘅巴士。正當阿燥、阿憎同阿驚唔知點做之際，阿樂帶住阿愁返到總部。而阿燥、阿驚同阿憎急忙噉叫阿樂嗱嗱臨搞返掂個控制台嘅時候，阿樂將控制權交俾阿愁，令到在場嘅其他情緒專員大為震驚。阿愁行前去控制台，結果成功將離家出走嘅諗頭攞走，系統恢復正常，韋莉於是就落車，急急腳趕返屋企。阿樂意識到韋莉需要向父母講出心底話，於是將核心記憶交俾阿愁，俾佢將記憶染上悲傷。韋莉忍唔住喊住對父母講，話好掛住家鄉。父母亦安慰佢，話佢哋自己都好掛住舊屋企。
最後，阿樂同阿愁一齊控制控制台，創造出一粒同時帶有快樂同悲傷嘅新核心記憶，新嘅性格島亦隨之誕生，象徵韋莉接受自己喺新屋企嘅生活。一年後，十二歲嘅韋莉已經適應晒新環境，又識到新朋友。喺大腦總部入便，五位情緒專員望住新形成嘅、由多種情緒混合而成嘅性格島，而大腦控制台亦變大咗，夠晒佢哋五個一齊合作。同時大腦控制台出現咗個新嘅掣—青春期。
粵語配音
[編輯]同一系列電影
[編輯]- 《玩轉腦朋友2》
