現實政治

現實政治 (英文：Realpolitik) 係一個基於唯物論嘅外交同政治手法，著重現實多過著重跟意識形態、倫理、或者道德嘅規則。套用現實政治嘅出名政治人物包括：馬基雅維利、俾斯麥、基辛格、鄧小平、戴高樂、同埋李光耀等等。

歷史

喺中國古代，孫子世界知名嘅《孫子兵法》被認為係現實政治嘅古典例子。

喺文藝復興時期，最出名嘅現實政治人物係馬基雅維利，其中佢嘅書《君子論》提到嘅政治技巧，好多都係等同依家現實政治嘅手法。

喺19世紀尾嘅普魯士，總理俾斯麥係其中一個作為現實政治嘅刻板例子。喺1866年，喺普魯士打贏咗奧地利帝國之後，俾斯麥做咗一個似乎奇怪嘅決定，唔吞并任何土地。最終，佢因為呢個決定而受到當地嘅人同官嘅尊重，幫咗佢成功達到德意志統一。

到1960年代，新加坡國父李光耀喺啱啱成立國家嘅時候，表明會喺個國家成立一個有效嘅政府，包括實行唯才主義嚟避免貪污。喺外交方面，佢表明新加坡需要喺冷戰維持中立，但係同時亦都需要有足夠嘅軍事能力嚟自衛。

喺1970年代嘅美國，國務卿基辛格對總統尼克遜提出咗用現實政治嘅政策，嚟處理當時中蘇交惡之後嘅中國。尼克遜聼咗之後肯跟呢個概念，而中美之後亦能夠放低佢哋喺意識形態上嘅分歧，開始咗兵乓外交嚟一齊對抗蘇聯。

喺1980年代，巴基斯坦獨裁者哈克同美國嘅關係亦表明咗現實政治。當時，蘇聯喺蘇阿戰爭入面，入侵緊喺巴基斯坦隔離嘅阿富汗。當美國總統卡特一開始建議同哈克簽軍事合約嘅時候，哈克拒絕同一個非回教國家建立關係。但係後嚟，當總統列根再一次問嘅時候，哈克見住美國能夠幫到巴基斯坦一馬嚟對抗蘇聯，就改口同意咗。兩個國家最終簽咗值$32億美金嘅軍事協議。

睇埋

• 經濟人
• 事實上