甘卓

出自維基百科,自由嘅百科全書
Jump to navigation Jump to search
甘卓
季思
322年
襄陽
國籍 晉朝
籍貫 丹陽(而家安徽當塗)
父母 甘昌

甘卓粵拼gam1 coek3;?—322年),字季思gwai3 si1),丹陽人(而家安徽當塗),係晉朝嘅官員、將領。佢係秦朝丞相甘茂嘅後人,太爺係三國東吳嘅將領甘寧,阿爺係吳國尚書甘述,老豆係吳國太子太傅甘昌

生平[編輯]

喺東吳亡國後,甘卓一度留喺屋企唔出仕。後來做咗丹陽郡嘅主簿、功曹,然後獲察孝廉,做咗吳王司馬晏嘅常侍。

太安二年(303年)農曆十二月,張昌部將石冰作亂,議郎周玘討伐佢,甘卓亦有參與,喺遞年同陳敏一齊殺咗石冰。戰後晉惠帝封佢爵位做都亭侯。之後東海王司馬越任命佢做參軍,做離狐縣令。

甘卓睇天下大亂,於是棄官唔做,返江東避難。到歷陽時撞到陳敏。陳敏想割據江東,見到佢好開心,想同佢傾下大計,重嗌自己嘅仔陳景娶甘卓個女。永興二年(304年)農曆十二月,陳敏起兵,自號楚公。似周玘呢啲江南大族雖然表面聽話,查實唔制,永嘉元年(307年),周玘密使鄉里錢廣殺佢上頭嘅陳敏細佬陳昶,於是陳敏嗌甘卓討伐錢廣,陳兵於朱雀橋南。周玘派丹陽太守顧榮去遊說甘卓。甘卓向來敬仰顧榮,兼且見陳昶死咗個心驚,諗咗好耐決定背叛陳敏,詐病帶返個女走,整斷朱雀橋,同周玘一齊殺咗陳敏。

當年司馬睿南渡江東,任命甘卓做前鋒都督、揚威將軍、歷陽內史。永嘉五年(311年)討伐背叛司馬越嘅鎮東將軍周馥,然後平息杜弢叛亂,根據戰功,升爵位做南鄉侯,做豫章太守。之後改任湘州刺史,而又進爵爲于湖侯。

東晉建立後,甘卓擔任安南將軍、梁州刺史,假節去督沔北諸軍(而家湖北北部),鎮守襄陽。甘卓爲人外柔內剛,爲政簡惠,善於安撫民衆,又唔收估稅,維護市場價錢。甘卓將境內所有魚池收得嘅稅全部去救濟貧民,當地人都話甘卓好。

永昌元年(322年),王敦喺武昌(而家湖北鄂州)以誅殺劉隗嘅名義起兵進攻建康,派人講聲甘卓聽,想佢來支持。甘卓詐應承佢,個心唔制嘅,等王敦上船都無喐動到,重派孫雙去武昌勸阻王敦。王敦聽完勸阻後,話做乜甘卓反口呀,強調自己起兵係剷除劉隗嘅大義,重以事成之後封甘卓做公來引誘佢。孫雙報畀甘卓聽,勸話詐應承佢,等佢到咗建康就討伐佢,但甘卓無辦法決定點做。湘州刺史司馬承鄧騫遊說甘卓反叛王敦,不過甘卓嘅參軍李梁反而勸佢坐山觀虎鬥,於是聽完鄧騫同李梁拗撬,甘卓重係決定唔到要點做。

王敦見佢咁耐都唔來,驚佢會反叛,派佢嘅參軍樂道融去勸喐佢。但係樂道融反而想背叛王敦,於是勸甘卓打佢。本來甘卓就唔肯跟王敦叛亂,聽完樂道融啲話就決定咗反佢。於是派巴東監軍柳純、南平太守夏侯承、宜都太守譚該等十幾人宣佈王敦罪狀,正式宣戰。又派司馬贊、孫雙報畀朝廷聽,派羅英聯絡廣州刺史陶侃,鄧騫、虞沖聯絡司馬承,一齊討伐王敦。當時征西將軍戴若思先接甘卓嘅報告,於是上表朝廷,令朝廷非常之開心。而武昌啲人聽到甘卓大軍到,驚到四圍散咗。於是朝廷任命甘卓做鎮南大將軍、侍中、都督荊梁二州諸軍事、荊州牧。

甘卓雖然決定討伐王敦,但衰在性格唔夠果決,而且人老咗多疑,所以仲係好猶豫,將大軍屯駐係豬口耐耐唔前進。佢更加諗住先救畀王敦將領魏乂圍困嘅司馬承,但司馬承要佢先打武昌,武昌陷落咗長沙自然解圍。王敦好驚,派甘卓嘅侄仔甘仰求和。甘卓一直停喺豬口唔喐,而王敦攻陷咗建康,掌控咗朝政,殺咗周顗、戴若思,又送騶虞幡畀甘卓。甘卓就同侄仔講,佢就係驚攻擊武昌會令王敦劫持皇帝,危害皇室。於是佢落令退軍返襄陽。都尉秦康勸佢話既然起咗兵,就唔好半途而廢,下面啲兵都唔制無功而返,又獻計話出兵佔領彭澤(而家江西九江),噉就阻斷咗建康同武昌嘅聯繫,敵方自然離散,樂道融亦勸佢,但甘卓唔聽。

甘卓原本性格寬和,突然變到脾氣好臭,返到襄陽後脾氣暴躁,舉止失常。佢自己照鏡,話鏡度見唔到自己個頭,話個頭飛咗去花園樖樹度。之後佢屋企嘅金櫃自己響,啲聲清而悲,啲巫師話因爲有壞事發生,所以金櫃悲鳴。主簿何無忌同佢屋企人都勸佢小心,點知佢一聽就火滾。佢又落令所有士兵解甲歸田,完全唔留人做防衛,功曹榮建勸極都唔聽。襄陽太守周慮接到王敦密令,要佢剷除甘卓。佢知甘卓無防備,呃佢話湖度好多魚,嗌左右啲人去捉魚,然後趁無人喺寢室殺害甘卓,將首級送畀王敦。包括散騎郎甘蕃嘅四個仔都被害。

太寧二年(324年)王敦之亂先平息,之後追贈甘卓做驃騎將軍,諡號

參攷資料[編輯]