白雲新城

白雲新城（粵拼：baak6 wan4 san1 sing4）係廣州嘅一個商務綜合體，位置喺白雲區西南偏南，東到白雲大道南；南到廣園新村、雲苑新村一帶；西到機場路；北到黃石東路。

發展史

2004年8月4號，由於舊嘅白雲機場唔夠位用，廣州市人民政府決定將機場搬到花都花山鎮西城村一帶嘅空地入面繼續搞航空業務。機場搬走後，留低嘅用地一度變成無人區兼雜草叢生嘅地方，後嚟政府考慮到廣州市區發展達到飽和狀態，而開始規劃將佢改造成白雲新城兼設定路網；地鐵喺2007年正式批准喺白雲新城入面搞站。到2010年亞運會前夕開始有一定規劃編制，嗰時定位係白雲山西邊嘅宜居新城、主城區北邊嘅商業文化服務中心。同年2號綫一分為二之後，原先嘅用地俾房地產商入場搞。隨住規劃喺2015年正式落定後，用地逐漸改成商業範疇。兩年後，白雲區政府將佢列入全區八大產業園區兼定位做高端總部聚集區。有一大堆總部項目亦喺白雲新城入面開枝散葉。