盧亭

出自維基百科,自由嘅百科全書
盧亭嘅圖畫

盧亭lou4 ting4,又有嗌做盧餘lou4 jyu4[1],係自古相傳喺大嶼山嗰頭出沒嘅半人半魚異形。喺大清時期(17 世紀至廿世紀早期)啲粵人留低咗好多有關佢嘅記載,目擊者包括咗高官、文人、同埋啲漁民等。佢亦都留低咗一啲珍貴嘅圖畫,就連大明後期嘅儒學者顧炎武喺佢本《天下郡國利病書》都有關於盧亭嘅文字描述。

古代記載[編輯]

相傳盧亭嘅起源係喺東晉(3 至 4 世紀)地方官盧循起兵作反打輸咗之後走佬到去廣東,同剩低嘅手下匿埋喺大嶼山嘅水域嗰度,慢慢變咗種做人魚

廣東新語》有咁講:「有盧亭者,新安大魚山與南亭竹沒老萬山多有之。其長如人,有牝牡,毛髮焦黃而短,眼睛亦黃,而黧黑,尾長寸許,見人則驚怖入水,往往隨波飄至,人以為怪,競逐之。有得其牝者,與之媱,不能言語,惟笑而已,久之能著衣食五穀,攜之大魚山,仍沒入水,蓋人魚之無害於人者。」[2]而 17 世紀東莞鄧淳本《嶺南叢述》又有咁講:「大奚山,三十六嶼,在莞邑海中,水邊岩穴,多居屹蠻種類,或傳係盧循遺種,今名盧亭,亦曰盧餘。」[3]查實早喺東晉嗰時就已經有記載有關「盧亭人」嘅講法,不過對呢啲盧亭人嘅描述同今日「盧亭魚人」嘅傳說好唔同,所以呢個講法未有得到證實。

盧亭一族[編輯]

相傳話盧亭一族世代都住喺大奚山(今日嘅大嶼山、港島、同萬山呢柞島仔嘅總稱)嗰度,本嚟同中原嘅古漢人冇乜嘢紛爭。後嚟南宋皇朝以盧亭一族冇佢哋許可賣私鹽做理由,喺宋寧宗嗰年出兵大奚山,對島民進行大屠殺。盧亭一族幾乎冚唪唥畀佢哋殺嗮,而據講佢哋啲倖存者就係今日嘅蜑家人嘅祖先,而按呢個講法,喺澳門海邊魚艇上出世嘅音樂人冼星海就係盧亭人嘅後代。

17 世紀粵人詩人屈大均曾經坐船路經大奚山,有感而作咗首《盧亭詩》:

老萬山中多盧亭,雌雄一一皆人形。
綠毛遍身只留面,半遮下體松皮青。
攀船三兩不肯去,投以酒食聲咿嚶。
紛紛將魚來獻客,穿腮紫藤花無名。
生食諸魚不煙火,一大鱸魚持向我。
殷勤更欲求香醪,雌者腰身時嬝娜。
在山知不是人魚,乃是魚人山上居。
編茅作屋數千百,海上漁村多不如。[4]

盧亭山村[編輯]

據講而家喺珠海梅華西路盡頭再向西一公里嗰度就有一條古村落-「盧亭山村」[5],但係已經消失咗。

流行文化[編輯]

  • 《一九八四,盧亭的告別》:詩人廖偉棠嘅短詩, 以「盧亭」隱喻香港。收錄於《櫻桃與金剛》(香港:牛津,2017)。
  • 美人魚》:2016年電影,片中美人魚家族嘅原型來自「盧亭」。
  • 三夫》:2019年電影,陳果導演,入面講主角「小妹」(曾美慧孜飾)可能係盧亭嘅化身[6]
  • 十二傳說》:2019年無綫電視劇集,單元「盧亭魚人殺人事件」(第11-13集)用咗盧亭傳說做題材。

睇埋[編輯]

註腳[編輯]

  1. . 原著喺2017年6月23號歸檔. 喺2017年10月5號搵到.
  2. 《廣東新語·卷二十二·鱗語》
  3. 《嶺南叢述·卷五十七·諸蠻》
  4. 香洲渔民穿越海上风云 百年港湾面临转型难题
  5. . 原著喺2020年3月28號歸檔. 喺2017年10月5號搵到.
  6. 陳穎思 (2019-03-28). 主角真有其人? 盧亭人魚傳說道出港人悲哀. 港01 (香港中文). 原先內容歸檔喺2020-08-07. 喺2021-08-30搵到.