程天固
程天固（粵拼：cing4 tin1 gu3）（1889年—1974年9月15號）幼名天顧，字守德，廣東香山（宜家嘅中山）南蓢安定鄉人。原先係民國廣州市工務局首任局長，中華民國政治人。
1906年喺新加坡加入同盟會，係星洲分盟最後生嘅會員。宣統三年（1911）三月，隨同盟會同志由香港搭「佛山號」客輪去廣州，準備參加廣州之役，點知事機不密，粵督張鳴岐搜捕革命黨人，下令由港上省各輪搭客，一律唔准埋岸原船回航。後尾奉阿媽之命返鄉拉天窗。1911年夏同老婆去咗美國，入讀加州大學政治經濟學院，畢業後入讀研究院，獲碩士學位，繼續留校深造。
1921年廣州建市，獲邀出任廣州市工務局局長，任内拆卸舊城墙，開闢太平路（而家人民路）、沙基路（六二三路），係廣州第一次開馬路。1924年任廣東大學法科教授、法學院院長。1927年後，先後做過廣州稅務署署長、北平稅務總署署長、廣州中山大學教授、廣州市工務局局長兼廣州市城市設計委員會主席等職。期間，提出過改革稅制芻議；制訂過《廣州工務兩年計劃》，規劃改善市內交通網，整治渠道，拓展市內商業及住宅區，促成興建中山紀念堂，重修鎮海樓，修築黃埔公路等。
1931年參與廣州反蔣派國民政府。民國24年（1935）11月當選國民黨第五屆中央執行委員會候補委員。同年12月當選為國民黨第四屆中央執行委員會委員。歷任西南政務委員、廣東省政府委員兼工務局局長、廣東省建設廳廳長、廣州市市長等職。1937年初去咗做南京國民政府實業部政務次長、代理部長。任內提過發展瓊崖嘅計畫。南京淪陷後，去咗武漢做實業部代部長，兼做商標委員會主席。任內試過草擬「戰時實業計畫」，因軍事一再失利，無法付諸實行。1938年秋，實業部併入咗經濟部，渠就改咗做行政院高等顧問。冇耐入咗外交部，以外交專員名義寺南洋、歐美各國整理駐外使館，足跡遍布幾十個國家。1941年2月起先後任駐墨西哥公使、大使，成功處理墨西哥排華浪潮，保障華僑權益，榮獲墨西哥大學頒發名譽法學博士學位。1944年7月去咗做巴西大使[1]。
1945年5月當選國民黨第六屆中央執行委員會候補委員。1947年12月離任巴西大使，獲巴西大學授予名譽法學博士學位。1948年1月回國，離開政壇。1949年10月搬咗去香港住。1965年任香港各屆紀念孫中山先生百年誕辰籌備委員會委員。1974年9月15號喺香港九龍寓所度過身，終年85歲。寫過嘅作品有《聯俄討論》、《程天固回憶錄》。