窩姆斯議會
窩姆斯議會（Diet of Worms）係神聖羅馬帝國喺1521年1月28號到5月25號喺萊茵河邊鎮仔窩姆斯搞嘅帝國議會，由皇帝卡爾五世主持，會議入面有好多議題，但係最主要係講馬丁路德同宗教改革。
背景[編輯]
1517年10月31號，馬丁路德喺德國威登堡諸聖堂門口上張貼《九十五條論綱》，引起好大轟動同爭辯。1520年，教皇良十世發咗一篇叫《主起來吧》（Exsurge Domine）嘅訓令，話馬丁路德嘅《九十五條論綱》同埋其他著作有四十一個錯誤。神聖羅馬帝國皇帝卡爾五世於是召見馬丁路德，叫佢放棄或者重申佢嘅觀點。
議會開始之前，薩克遜選侯腓特烈三世要求卡爾五世承諾若果馬丁路德出席會議，佢嘅安全會受到保護，就算佢被判死刑，亦唔可以即刻拉去斬。因為揚胡斯喺1415年被康斯坦茨大公會議判刑後冇耐就被處決。
馬丁路德嘅抗辯[編輯]
喺1521年4月16號，馬丁路德到達窩姆斯。
喺17號，皇帝卡爾五世嘅代言人約翰埃克問馬丁路德係唔係《九十五條論綱》、《教會被擄巴比倫》等書嘅作者，同埋會唔會收返佢喺書中嘅言論。馬丁路德要求議會畀多啲時間佢考慮。於是議會畀佢一日時間，限期為第二日下晝四點。馬丁路德喺當晚祈咗好耐禱。
喺18號，馬丁路德又祈咗好耐禱，又諮詢咗朋友同埋調解人嘅意見，之後就出席議會。
當日埃克再次問馬丁路德係唔係《九十五條論綱》、《教會被擄巴比倫》等書嘅作者，同埋會唔會收返佢係書中嘅言論。馬丁路德就話佢只會接受《聖經》嘅權威，而唔接受教皇同埋議會嘅權威，因為兩者之間有矛盾。據傳馬丁路德回應佢話：
除非議會用《聖經》嘅證據或冇得辯駁嘅理由令我折服（因為我既唔相信教皇，亦唔相信議會單獨嘅理據，因為眾所周知，佢哋成日犯錯，自相矛盾），否則我就只會受我引用嘅聖經約束，我嘅良心被上帝嘅話所限。我唔可以亦唔會收返任何一句話，因為咁樣違背良心係唔安全亦唔啱。呢個係我嘅立場，我冇其他選擇。願上帝保佑我。阿門。
因為之前對薩克遜選侯腓特烈三世嘅承諾，皇帝卡爾五世喺議會後唔敢即刻向路德行刑。
喺25號，議會宣佈《窩姆斯詔書》，宣佈馬丁路德為異端同埋走犯，譴責路德係「臭名遠播嘅異端」，但冇即刻捉佢，喺對馬丁路德安全嘅承諾生效期滿後先驅捕行刑。
之後同埋影響[編輯]
馬丁路德離開窩姆斯之後，喺附近嘅木林被薩克遜選侯腓特烈三世派嚟嘅人騎馬擄走，帶到瓦爾特堡，佢喺嗰度隱居一段時間。當皇帝卡爾五世向薩克遜選侯腓特烈三世問到馬丁路德嘅下落，佢話佢都唔知到。
馬丁路德喺議會嘅發言亦觸動勃蘭登堡-安斯巴赫選侯格奧爾格，佢成為最早接受新教教義嘅貴族之一，佢亦同路德商唔少神學嘅問題。
1522年同埋1524年紐倫堡會議試圖對路德執行《窩姆斯詔書》嘅判決，但唔成功。
當馬丁路德喺出返嚟嘅時候，皇帝唔得閒捉佢，加上唔少人亦支持馬丁路德，令《窩姆斯詔書》最後冇得喺德國實行。但係皇帝卡爾五世直接控制嘅荷蘭地區，詔書被嚴厲執行，喺嗰度馬丁路德嘅支持者被嚴打。