粉嶺公路交匯處

粉嶺公路交匯處，香港公路交匯處之一，喺九龍坑橋頭，就近龍山隧道口，駁住香園圍公路同粉嶺公路，英文叫Fanling Highway Interchange。香園圍公路南端，就喺依個交匯處，向北伸無耐就入龍山隧道。交匯處喺九龍坑之西，南華莆之北，塘坑東村之南，和合石東南。

原本大窩西支路入九龍坑有條天橋。之不過要起交匯處，條橋就拆咗，喺南面南華莆同元嶺之間，另起新橋。而交匯處橋底麻笏河道，亦要重建，包括九龍坑尼龍壩。大窩東支路亦重修，駁通粉嶺公路。同時喺交匯處以北，粉嶺公路南行，開咗粉嶺公路巴士轉乘站。由於公路要更多位，大窩西支路亦西移，收地拆咗泰亨同南華莆嘅屋地。

路綫

粉嶺公路一直喺大窩谷地平原，呈南北通行。北行向粉嶺，南行向大埔。九廣鐵路火車路喺佢東面，夾喺大窩支東路之間。

香園圍公路，起自粉嶺公路。粉嶺公路北行入香園圍公路北行，喺南華莆主幹泵房處入天橋。對面，香園圍公路南行，有天橋直入粉嶺公路南行。而其他兩個方向，由於山坳窄，又唔可以郁火車路，而車速又高，香園圍公路，就起咗條好長嘅水滴形天橋，橫跨粉嶺公路上便，以便直出直入粉嶺公路。