糧食安全

  提示：呢篇文講嘅唔係食物安全。

1945 年越南發生饑荒期間嘅相

糧食安全係指某一個群體嘅成員，係咪個個都有足夠嘅糧食保持健康。國家、城市或者地區嘅糧食安全，由佢哋嘅經濟等因素主宰，而家庭嘅糧食安全就往往取決於佢哋嘅社經地位。食物安全講緊係指人有可靠嘅途徑，接觸到量夠、可負擔、同埋健康嘅食物。達到糧食安全嘅人唔會長期捱餓，亦唔會成日驚住要捱餓。此外，糧食安全仲包括抵禦未來供應中斷嘅能力，例如突然間發生旱災、水災、航運受阻、燃料短缺同打仗等嘅情況，都可以會導致食物供應突然斷絕，而糧食安全亦講到個群體係咪抵禦到呢啲風險。

定義

睇埋：糧食

2007 年，羅馬舉辦嘅有機農業與糧食安全國際會議，將糧食安全嘅多方面含義——包括供應、獲得、穩定性同利用——定義為：

• 糧食供應：透過國內生產或者進口，可以得到充足同高質素嘅糧食。
• 獲得糧食嘅機會：指每個人都有足夠資源（同權利）去獲得有營養嘅膳食。呢啲權利定義為：根據社區嘅法律、政治、經濟同社會安排，每個人所擁有去支配全部商品組合嘅權利（包括獲得公共資源等傳統權利）。
• 糧食穩定性：要做到糧食安全，一個民族、一個家庭或者個人必須隨時都能夠獲得適當嘅食物。就算遇到突發事件（例如經濟危機或者氣候災害）或者週期性事件（例如季節性糧食短缺），佢哋都唔應該面臨失去食物嘅危險。所以，穩定性呢個概念涵蓋咗供應同獲取兩方面。
• 糧食利用：透過合理飲食、清潔食水、衛生同醫療，將糧食有效利用，達到身體健康所需嘅營養平衡。呢一點揭示咗非食物投入（例如醫療同衛生）對糧食安全係幾咁重要。

成因

睇埋：食物價格

糧食安全出問題，好多時係因為食物太貴。世界糧食計劃署指出，新冠疫情等嘅大流行病，有可能會削弱相關機構維持糧食安全嘅能力

喺 2022 同 2023 年，多個地區爆發糧食危機，食物價格持續上升。2022 年，全球出現嚴重嘅糧食通脹，並且喺幾個地區出現重大糧食短缺問題，當中以撒哈拉以南非洲、伊朗、斯里蘭卡、蘇丹同伊拉克受影響最深。當時小麥、粟米、麵包、意粉、麵粉、煮食油、糖、雞蛋、鷹嘴豆同埋肉類等價格都上漲。

參見

• 饑荒
• 供應
• 糧食通脹
• 食物沙漠