紐咸區

紐咸區（英文：Newham，國際音標：/ˈnjuːəm/，全名 London Borough of Newham 「倫敦紐咸區」，又意譯新村區）係英國倫敦東部一個行政區劃，區內出名韋斯咸足球會、倫敦奧運公園。

歷史

紐咸呢個地方名係喺1965年，英國政府將倫敦同周邊地區重劃成大倫敦嘅時候先作出嚟嘅。當年政府將屬於雅息士郡嘅韋斯咸 (意譯「西村」) 同伊斯咸 (意譯「東村」) 合併成一個新嘅區議會，就幫佢改咗個名做「新村」。

廿一世紀初，倫敦舉辦2012年夏季奧運，主場館選址區內嘅史察福一帶，令呢區大規模翻新。碼頭區輕鐵喺區內多咗條支線，史察福火車站有有升級工程，重開埋西田百貨，令史察福成為東倫敦嘅新樞紐。

紐咸係全英國最種族多元嘅地方^[1]。當地人口約三十萬，當中約四成係亞裔、三成係白人、三成係其他種族。紐咸區係全倫敦白人比例最低嘅地方，亦係全英國穆斯林比例第二高嘅地方，僅次於隔籬嘅塔村區^[2]。

政治方面，由1965年置區到而家，工黨一直係當地區議會嘅執政黨。自2010年開始，工黨更包辦全區所有區議會議席，一黨獨大^[3]。