網景

出自維基百科,自由嘅百科全書
Jump to navigation Jump to search
網景通訊
Netscape logo.svg
成立 1994年4月4號
結業 2003年7月15號
總部地址 Flag of the United States.svg 美國加利福尼亞州山景城
Flag of the United States.svg 美國維珍尼亞州杜樂絲(被AOL收購後)
緊要人物 馬克·安德森占姆·克拉克
產業 互聯網軟件電信
產品 網路套件網頁瀏覽器互聯網服務供應商入口網站
員工數 2500[1]
母公司 美國線上
網址 isp.netscape.com

網景通訊英文Netscape Communications ),以前叫網景通訊公司Netscape Communications Corporation),大部分通常被簡稱為網景Netscape)。曾經係一間美國嘅電腦服務公司,因為佢整咗一個網頁瀏覽器Netscape Navigator而出名。當佢重係一間獨立公司嘅時候,佢嘅總部設喺加利福尼亞州嘅山景城[2]

網景喺市佔率方面曾經一度佔據主導地位,但係之後喺第一次瀏覽器大戰當中輸咗畀Internet Explorer。Netscape嘅市佔率從1990年代中期嘅90%跌到去2006年底嘅唔夠1%[3]

網景發明咗JavaScript ,呢個係網頁嘅客戶端腳本中用得最廣泛嘅語言。呢間公司重開發咗用嚟保護線上通訊安全嘅SSL,喺繼任者TLS取代之前係俾人最廣泛使用嘅協議[4]

網景股票從1995年開始進行買賣,去到1999年俾AOL併購後採權益聯營嘅交易方式,佢嘅市值最終去到100億美元[5][6]。喺俾AOL收購冇幾耐之前,Netscape公開咗瀏覽器嘅程式碼,同埋建立咗Mozilla組織嚟協調產品嘅未來發展[7]。Mozilla組織以Gecko排版引擎為基礎重寫咗成個瀏覽器嘅原始碼[8];而往後嘅Netscape版本都係基於呢個被重寫嘅程式碼。Gecko引擎技術隨後都用喺Mozilla基金會嘅Firefox瀏覽器。

根據AOL,網景嘅瀏覽器開發持續到2007年12月,當時AOL宣布直至2008年初,該公司將停止支援Netscape Navigator瀏覽器[9][10]。直至2011年,AOL依然持有網景呢個品牌,以Netscape為名嘅重包括佢嘅廉價互聯網服務[11][12]

歷史[編輯]

早期[編輯]

網景通訊公司想要你將互聯網視為一本百科全書——一本唔設限嘅、圖形豐富嘅頁面、電子郵件同埋文件嘅連結、網路新聞群組同線上購物,而唔係一條高速公路。
Netscape NavigatorMacworld(1995年5月)[13]

網景係第一間嘗試利用全球資訊網嘅公司[14][15]。喺1994年4月4號成立嗰時名叫馬賽克通訊公司Mosaic Communications Corporation),由占姆·克拉克邀請馬克·安德森共同創立。並得到知名風險投資公司凱鵬華盈嘅投資。克拉克同埋安德森嘅第一次會議所討論嘅並唔係討論有關軟件或者服務,而係更多關於一種類似任天堂嘅產品[16]。克拉克從SGINCSA Mosaic招募咗團隊早期成員[15]。馬克·安德森同占姆·克拉克最初喺任天堂任天堂64創建咗一個20頁嘅線上遊戲雛形,但係冇達成共識。馬克·安德森解釋:「如果佢哋提早一年,我哋可能就唔會整Netscape啦。」[17]

呢間公司嘅第一個產品係網頁瀏覽器──Mosaic Netscape 0.9,喺1994年10月13號發行。喺發布嘅四個月之內,已經佔據咗四分之三嘅瀏覽器市場[16]。由於勁過好多競爭對手,例如Mosaic,佢喺短時間之內成為咗互聯網用戶嘅主要瀏覽器[16]。為避免同NCSA嘅商標擁有權產生問題,呢套程式之後改名做Netscape Navigator(中譯為「網景領航員」),公司亦改名做「網景」[18]。網景第一批員工,雖然曾經喺NCSA做過,創建Mosaic瀏覽器,不過Netscape Navigator冇用過Mosaic瀏覽器嘅任何代碼[19]

1995年8月9號,網景首次公開募股獲得巨大成功。原本股票價值係每股14美元,但股價因為一個臨時決定倍增至每股28美元。第一日收市,股價升至每股75美元,幾乎係當時創記錄嘅「首日獲利」。1995年,呢間公司嘅收入每季都會上升一倍[20],網景嘅瀏覽器市場佔有率去到70%[21]。網景嘅成功令到馬克·安德森喺1996年成為時代雜誌嘅封面人物[22]

網景嘅一個目標,係為所有作業系統嘅使用者提供跨平台一致嘅互聯網使用體驗。Netscape Navigator嘅使用者介面喺多個平台上始終如一。網景更多次嘗試開發一種可以畀使用者透過瀏覽器嚟存取同修改佢哋嘅檔案嘅網上應用系統。佢哋咁樣做引起咗微軟注意,因為呢個概念跨越咗作業系統界線,微軟睇做對Microsoft Windows嘅直接威脅。有人聲稱,有幾個微軟嘅執行人員喺1995年6月曾經參訪網景總部,提議分拆市場,即係容許微軟開發Windows瀏覽器,而網景就負責喺其他作業系統上開發產品[23][24],網景當時拒絕咗[25]。不過,微軟否認呢個指控,因為噉係違反反壟斷法

微軟發佈Internet Explorer 1.0,當時只係Windows 95嘅Microsoft Plus!附購品。根據前Spyglass開發者Eric Sink嘅說法:正如大家相信嘅,Internet Explorer並冇基於NCSA Mosaic,而係基於由Spyglass開發嘅Mosaic版本[26]。微軟好快噉推出咗幾個Internet Explorer嘅連續版本,呢啲版本都係捆綁喺Windows作業系統,使用者可以免費使用(網景領航員當時要收費)。微軟更以自己公司嘅其他部門嘅收入,調配喺開發Internet Explorer嘅資金中。呢段時期,依家被叫做「瀏覽器大戰」。當時,網景同微軟為咗超越彼此,喺佢哋嘅瀏覽器增加好多功能(雖然未必可以正常運作),「版本號碼」亦都增加得好快(雖然未必合邏輯)。當時Internet Explorer因為擁有專業人才、資金充足,處於上風。Internet Explorer到咗3.0版,喺功能上差唔多等同於Netscape Communicator(中譯「網景通訊家」);而到4.0版,使用者認為Internet Explorer運作比較穩定。對於網景嘅其他產品,微軟亦都提供咗對應嘅免費產品,例如:隨Windows NT附送嘅Internet Information Server伺服器軟件。

網景對抗唔到微軟嘅「免費程式對上收費程式」策略。同時,網景面對越來越多對佢產品程式錯誤嘅批評。批評者認為,網景過度偏向「增加功能」,忽視運作穩定,特別係喺1997年第4季同1998年1月的大規模裁員之後,大眾對網景嘅印象越嚟越差。1998年網景嘅瀏覽器市場佔有率重有超過50%,但喺下一年微軟瀏覽器嘅市佔率就超越咗網景[27]

開放原始碼[編輯]

1998年1月,網景開始展開Mozilla開放原始碼計畫。喺Internet Explorer成為瀏覽器市場龍頭之後,網景希望透過開放Netscape Communicator 4.0嘅原始碼,令到佢變成有成就嘅開源計劃。佢以Netscape公眾授權條款(Netscape Public License,簡稱NPL)發佈原始碼,Netscape公眾授權條款相似於GNU通用公眾授權條款(GNU General Public License,簡稱GPL),但係容許網景繼續喺公開嘅原始碼中加入專有部分。之後,網景繼續開發Netscape Communicator 4.5,並專注改善電子郵件同埋企業嘅功能。

開始咗一段日子之後,開源社群終於發覺,佢哋好難喺當時原始碼嘅基礎上繼續開發Netscape Communicator。佢哋決定放棄舊有嘅原始碼,重新編寫下一代瀏覽器。利用新開發嘅Gecko排版引擎,瀏覽器有咗一個更加模組化嘅結構,並容許大量開發人員一齊工作。新瀏覽器亦包含咗一個基於XML嘅用戶介面標記語言——XUL。喺XUL嘅幫助下,一次性嘅「用戶介面開發」就可以喺Windows、Mac OS同Unix中穩定運作。

1998年5月,美國司法部控告微軟,並提出反壟斷訴訟。網景喺該案件中唔係原告,雖然佢嘅行政人員曾經收到法庭傳票;而網景亦提供咗好多證物,包括一個「壞脾氣」嘅內部討論區嘅所有內容[28]

1998年10月,網景耗資100萬美元收購網上目錄網站Newhoo,並重新命名為Open Directory Project,喺内容開放條例下發佈佢嘅資料庫。

被美國線上收購[編輯]

1998年11月24號,美國線上以42億美元、免稅換股嘅方式收購網景[29][30][6]。呢次合併被好多人批評,認為兩間公司嘅企業文化差距好大、唔可以相容。批評者重包括一個長期嘅網景開發者——占美·加文斯基[31][32]。有批評者認為,收購網景,成為美國線上同微軟討價還價嘅籌碼,減少美國線上對Internet Explorer嘅依賴。其他批評者相信,美國線上對Netcenter或者網景嘅「網絡資產」有興趣,因為佢哋係當時流量好高嘅網站。最終,網景嘅伺服器產品同專業服務團體成為iPlanet英文iPlanet嘅一部分。iPlanet係美國線上同太陽電腦之間嘅聯合行銷同發展聯盟。

2000年11月14號,美國線上跳過咗Netscape 5,釋出基於Mozilla 0.6原始碼嘅Netscape 6。失策嘅係,由於Mozilla 0.6穩定性唔夠,Netscape 6催化咗使用者放棄使用網景品牌。直到2001年8月,基於Mozilla 0.9.2嘅Netscape 6.1先比較穩定;一年之後,發佈咗基於Mozilla 1.0嘅Netscape 7

解散[編輯]

證實微軟因為濫用壟斷能力而敗訴之後,美國線上向微軟提出索償訴訟[33]。喺2003年5月,微軟同美國線上達成和解協議,願意賠償網景7.5億美元,並同意提供美國線上7年無限制嘅使用同散佈Internet Explorer嘅權利[34][35]。呢個認為係「網景結束嘅訊號」。

2003年7月15號,時代華納(當時叫做美國線上時代華納)解散咗網景,網景大部份嘅程式員被解僱,網景嘅標誌亦消失喺建築物。美國線上喺2004年8月18號發佈咗Netscape 7.2,不過呢個版本係內部開發,而唔係網景僱員[36]

2004年10月12號,美國線上關閉咗一個受歡迎嘅開發者網站Netscape DevEdge。DevEdge曾經係一個重要嘅、有關互聯網技術嘅資料來源,佢維護網景瀏覽器、同埋諸如HTML同JavaScript技術嘅說明文件、以及由業界同技術領導者(如丹尼·古德曼英文Danny Goodman)所編寫嘅文章。部份DevEdge嘅內容已經重新發佈到Mozilla Developer Center網站。

瀏覽器業務結束[編輯]

網景嘅品牌繼續被廣泛使用。公司亦都再一次有自家嘅程式設計師,開發同支援網景系列瀏覽器[37]

但係喺2007年底,美國線上決定停止網景瀏覽器嘅開發,佢由2008年3月1號起停止安全更新同所有嘅技術支援,並建議用戶改用Firefox瀏覽器[9]。2007年,用網景瀏覽器嘅使用者得番0.6%[38]

產品同技術[編輯]

網景初期嘅產品[編輯]

網景後期嘅產品[編輯]

  • Netscape Personal Edition,包含瀏覽器、PPP同帳戶創立精靈
  • Netscape Communicator,包含瀏覽器、郵件、新聞、日曆、VoIP同網頁撰寫嘅套件,並捆綁AIM同埋RealAudio
  • Netscape FastTrack和Enterprise網頁伺服器
  • Netscape Collabra Server,NNTP新聞伺服器
  • Netscape Directory Server,LDAP伺服器
  • Netscape Messaging Server,IMAPPOP3電郵伺服器
  • Netscape Certificate Server,簽發SSL證書嘅伺服器
  • Netscape Calendar Server,群組工作排程
  • Netscape Compass Server,搜尋引擎同埋網路蜘蛛
  • Netscape Application Server,設計網絡應用程式
  • Netscape Publishing System
  • Netscape Xpert Servers
    • ECxpert,EDI資訊交換伺服器
    • SellerXpert,B2B商用引擎
    • BuyerXpert,eProcurement引擎
    • BillerXpert,網上繳費引擎
    • TradingXpert,HTML EDI交易前端
    • CommerceXpert,網上零售商店引擎
  • Radio@Netscape、Radio@Netscape Plus

網景技術[編輯]

網景發明咗HTTP Cookie技術,令到網站可以將資料保存喺瀏覽器中,解決咗網頁伺服器因為HTTP係無狀態協議而唔可以依據用戶資料產生個人化頁面嘅問題。呢個技術被網站普遍用嚟提供購物車或者個人化服務[40]

網景發明咗依家廣為使用嘅JavaScript語言。JavaScript除咗增強瀏覽器嘅功能,網景亦係喺伺服器上使用JavaScript嘅先驅[41]:Netscape Enterprise Server支持網頁用JavaScript嚟查詢SQL資料庫,產生動態網頁,突破咗靜態網頁嘅限制。

網絡安全技術方面,為咗解決電子商務嘅安全同埋私隱問題,網景制訂並喺產品中支持傳輸層安全協議(SSL),到依家都被廣泛使用。輕型目錄訪問協議(LDAP)嘅發明者添姆·豪斯英文Tim Howes喺1996年加入網景,並以產品推廣呢個協議。為咗用瀏覽器安全有效咁執行Java軟件,網景發明咗JAR檔案格式,呢個格式將好多Java class檔案壓縮成一個檔案,並可以加上數碼簽章

佢亦都係「推送技術」(Push technology)嘅先驅。「推送技術」容許網站,定時「傳送」天氣、財經同包裹追蹤等資訊,到客戶端。網景將達成「推送技術」嘅方法,名為:Netcaster。但係,商界好快就發現人哋利用「推送技術」嚟傳送廣告,俾廣告攪到好煩嘅用戶,會關閉呢個功能。所以Netcaster只係短暫出現。

網景最廣為人知嘅,係喺努力改善功能,達到適用於跨平台。佢嘅客戶端軟體,曾經可以喺以下作業系統中運行,包括:Windows(3.19598NT)、Macintosh、Linux、OS/2BeOS同好多版本嘅Unix,包括DECSolaris、BSDI、IRIXAIXHP-UX。佢嘅伺服器軟件,通常唔會只係用喺Unix同Windows NT,某啲版本更可以喺Linux運行,而一個版本嘅。Netscape FastTrack Server,更可以喺Windows 95或者98上運作。依家,大部分嘅網景伺服器軟件繼續喺Sun Java System媒介延續。

2012年4月9號,微軟以10億5千6百萬美元購買800項美國線上嘅專利或者專利授權,專家認為網景嘅SSL、Cookie等專利可能係微軟願意出高價嘅理由之一[42][43][44]

文化影響[編輯]

網景推出產品嘅節奏比過去嘅軟件公司快好多,被稱為Internet Time,被好多其他網絡公司仿效[45][46][47]

網景制定咗臭蟲獎勵計劃英文Bug bounty program用嚟獎勵發現產品漏洞嘅研究者,隨後俾其他公司同組織所仿效[48]

David Winton喺2000年拍攝咗一部紀錄片代碼奔騰》(Code Rush),描述網景工程師推出Mozilla開放原始碼嘅故事[49]

網上服務[編輯]

Netscape.com網站[編輯]

Netscape.com係佢瀏覽器嘅首頁網站喺1990年代中期有好多訪客,之後成為獨立部門。1997年呢個網站同雅虎合作設立網站導覽Netscape by Yahoo!,雅虎兩年之內要畀網景至少三千萬美元[50][51]。佢喺之後逐步轉型成入門網站,提供搜尋服務同一啲會員專有服務,例如:站內信箱同埋個人首頁My Netscape。

2006年6月,網景重新設計Netscape.com,將佢變成一個類似Digg嘅社群新聞網站。佢嘅主設計者:白賴仁·阿爾維(Brian Alvey)[52];主開發者:亞歷士·魯德洛夫(Alex Rudloff)[53]。佢係由Weblogs英文Weblogs, Inc.公司嘅執行長賈森·卡拉卡尼斯英文Jason Calacanis負責,直至佢喺2006年11月離開美國線上為止。現時嘅經理為 係湯姆·德拉普(Tom Drapeau)。喺網站入面,用戶可以投票首頁嘅故事,更可以附上意見。呢個設計去到2007年9月被推翻,原本嘅社群網站改名做Propeller.com英文Propeller.com繼續經營,原來嘅Netscape.com就回歸做傳統嘅入門網站。2010年10月,美國線上關閉Propeller.com[54]

開放目錄計劃[編輯]

內文: 開放式目錄

開放目錄計劃(又稱DMOZ,衍生自原域名directory.mozilla.org)係一個多語言、內容開放嘅WWW目錄。佢係由網景擁有,並由自願編者組成嘅社群所編輯同維護。

網景互聯網服務[編輯]

美國線上以網景為品牌,提供一個廉價嘅撥號互聯網服務[55]。佢嘅主要競爭者係NetZero。網景互聯網服務嘅廣告對象,以年輕人為主,例如:大學生同啱啱畢業嘅人[56]

參考[編輯]

  1. "AOL meeting to address Netscape integration". Cnet News. 1999-03-23. Retrieved 2012-07-01.
  2. Swartz, Jon. "Company takes browser war to Netscape's lawn." San Francisco Chronicle. Thursday 1997-10-02. Retrieved on 2009-12-29.
  3. Mook, Nate (2006-07-10). "Firefox Usage Passes 15 Percent in US". BetaNews. 喺2015-09-29搵到. 
  4. "History of SSL". Publib.boulder.ibm.com. 喺2012-10-29搵到. 
  5. "America Online Inc. Completes Acquisition of Netscape Communications Corp.". Business Wire. 1999-03-17. Retrieved 2012-07-01.
  6. 6.0 6.1 "What's $10 Billion to AOL?". Morningstar. 1999-04-05. Retrieved 2012-07-01.
  7. "Mozilla Stomps Ahead Under AOL". Wired.com. (原先內容喺2014-06-03歸檔). 喺2012-10-29搵到. 
  8. "Press Release". Web.archive.org. 2001-12-13. (原先內容喺2001-12-13歸檔). 喺2012-10-29搵到. 
  9. 9.0 9.1 Tom Drapeau (2007-12-28). "End of Support for Netscape web browsers". Netscape Blog. (原先內容喺2008-01-03歸檔). 喺2014-09-13搵到. 
  10. Tom Drapeau (2008-01-28). "Netscape Browser Support extended to March 1st". Netscape Blog. (原先內容喺2008-02-07歸檔). 喺2014-09-13搵到. 
  11. "FORM 10-K". Sec.gov. 喺2012-10-29搵到. 
  12. Netscape ISP home page of 2014 with link to Netscape ISP Terms of Service update of 2014-09-15.
  13. Hawn, Mathew (1995年5月). "Netscape Navigator. (Netscape Communications World Wide Web browser) (Software Review)(Evaluation)". Macworld. 原先內容歸檔睇2011年6月24號. 喺2011年5月17號搵到. Netscape Communications wants you to forget all the highway metaphors you've ever heard about the Internet. Instead, think about an encyclopedia—one with unlimited, graphically rich pages, connections to E-mail and files, and access to Internet newsgroups and online shopping. 
  14. "AOL will pull the plug on Netscape's tech support". Los Angeles Times. 2007-12-29. 喺2014-05-18搵到. 
  15. 15.0 15.1 Adam Lashinsky (2005-07-25). "Remembering Netscape: The Birth Of The Web". Fortune Magazine. (原先內容喺2006-04-27歸檔). 喺2014-09-13搵到. 
  16. 16.0 16.1 16.2 Zook, Matthew A. (2005). The Geography of the Internet Industry: Venture Capital, Dot-Coms, and Local Knowledge. Oxford: Blackwell Publishing. 第 104頁. ISBN 0-631-23331-8. 
  17. "OPSWARE INC. / On the record: Marc Andreessen". SFGate. 2003-12-07. Retrieved 2012-07-24.
  18. "Mosaic Communications changes name to "Netscape Communications Corporation"". Netscape Communications Corporation. (原先內容喺2012-05-13歸檔). 
  19. Clark, Jim; Owen Edwards (1999). Netscape Time: The Making of the Billion-Dollar Start-Up That Took on Microsoft. St. Martin's Press. 第 160–170 [167]頁. ISBN 978-0312199340. 
  20. David Sheff. "Going Public as Netscape Did, before making a dime in profits". Wired 8.08. Lycos. 喺2006年7月14號搵到. 
  21. The ’90s Startup That Terrified Microsoft and Got Americans to Go Online
  22. "Netscape's Marc Andreessen". Time Magazine. 1996-02-19. 喺2007-02-03搵到. 
  23. "Government alleges illegal campaign by Microsoft". (原先內容喺2006-07-08歸檔). 喺2006-07-14搵到. 
  24. "Paul Maritz and Marathon Man: Both Got a Real Drilling". 喺1999-01-26搵到.  檢查日期值喺: |access-date= (詳情)
  25. "IV: The Browser Wars". 喺2008年7月搵到.  檢查日期值喺: |access-date= (詳情)
  26. "Memoirs from the Browser Wars". (原先內容喺2008年5月17號歸檔). 喺2006年7月14號搵到. 
  27. Behind the numbers: Browser market share 互聯網檔案館歸檔,歸檔日期2000-08-16.
  28. "Microsoft Subpoenas Bad Attitude". (原先內容喺2008年10月13號歸檔). 喺2006年7月14號搵到. 
  29. "AOL buys Netscape for $4.2 billion". 
  30. "America Online Inc. Completes Acquisition of Netscape Communications Corp.". 1999-03-17. 
  31. "netscape and aol.". 原先內容歸檔睇2015年7月3號. 喺2006年7月14號搵到. 
  32. "netscape and aol/time warner: part two.". 原先內容歸檔睇2015年9月6號. 喺2006年7月14號搵到. 
  33. "AOL's Netscape Sues Microsoft". (原先內容喺2012-07-14歸檔). 喺2006-07-14搵到. 
  34. "Microsoft to pay AOL $750 Million". (原先內容喺2012年7月17號歸檔). 喺2006年7月14號搵到. 
  35. "Is this the end of Netscape?". (原先內容喺2012年7月12號歸檔). 喺2006年7月14號搵到. 
  36. "Netscape Internet Software Updated". (原先內容喺2005-08-20歸檔). 喺2006-07-14搵到. 
  37. "Netscape Announces Cross-Platform Netscape 9 to be Developed In-House". mozillaZine. 2007-02-04. 
  38. "AOL Kills Netscape's Future, Leaves Firefox to Battle IE". Informationweek. CMP Media LLC. 2007-12-28. 喺2007-12-29搵到. 
  39. "Internet Archive Wayback Machine". Web.archive.org. 2008-04-06. (原先內容喺2008-04-06歸檔). 喺2012-10-29搵到. 
  40. IETF RFC 2109: HTTP State Management Mechanism
  41. Back to the Server: Server-Side JavaScript On The Rise. Mozilla Developer Network
  42. Microsoft’s AOL Deal Intensifies Patent Wars
  43. Why Microsoft spent $1 billion on AOL's patents
  44. What Microsoft's AOL/Netscape patent purchases mean
  45. Shona L. Brown; Kathleen M. Eisenhardt (1998). Competing on the Edge: Strategy as Structured Chaos. Harvard Business Press. 第 166頁. ISBN 978-0-87584-754-2. 
  46. David B. Yoffie; Michael A. Cusumano (16 November 1998). Competing On Internet Time: Lessons From Netscape and Its Battle With Microsoft. Simon and Schuster. ISBN 978-0-684-83112-1. 
  47. Netspeed At Netscape
  48. "History of Bug Bounties". Bugcrowd. (原先內容喺2016-12-08歸檔). 
  49. 網景》喺互聯網電影資料庫嘅資料(英文)
  50. Netscape, Yahoo! Team Up To Offer Guide to Internet
  51. Karen Angel (2002-10-01). Inside Yahoo!: Reinvention and the Road Ahead. John Wiley & Sons. 第 136頁. ISBN 978-0-471-42102-3. 
  52. "Netscape, my Netscape". 喺2006年6月16號搵到. 
  53. "See you later, navigator". 喺2006年6月22號搵到. 
  54. "Propeller.com Spinning to a Stop". 喺2010年9月23號搵到. 
  55. "GetNetscape Home Page". 喺2008-03-20搵到. 
  56. "Netscape Launches Low-Cost Internet Access Service". 原先內容歸檔睇2004-11-03.