羅鷹石
 |
| 羅鷹石 | |
|---|---|
| 出世 | 1913年 |
| 死 | 2006年9月1號（93歲） |
| 職業 | 鷹君集團創辦人 |
| 配偶 | 羅杜莉君（1919–） |
| 仔女 | 羅慧端（1936–） 羅鴻璇 羅孔瑞（1941–） 羅旭瑞（1944–） 羅嘉瑞（1947–） 羅康瑞（1948–） 羅慧琦（1949–） 羅鷹瑞（1952–） 羅啟瑞（1959–） |
羅鷹石（英文：Lo Ying Shek，1913年—2006年9月1號）係香港地產商鷹君集團嘅創辦人，廣東普寧泗竹埔村人。
佢同老婆羅杜莉君生咗6仔3女[1]，包括二仔羅旭瑞（百利保控股主席）、三仔羅嘉瑞（香港創業板之父）、四仔羅康瑞，三個都係香港地產商人。
羅鷹石阿爺喺大清年代已經到泰國做工，所以羅鷹石7歲嗰時亦跟阿爸到泰國生活，做雜貨布疋買賣，賺咗一筆錢。1938年佢帶住三萬元返香港，初時喺南北行做洋雜生意，連廣東話都唔識。到1956年，見內地難民大量湧入，於是搞地產，一年內賺十萬蚊，豐厚利潤令佢決心大搞。1963年成立鷹君，好快就壯大，成為一線地產商。
鷹君助理董事李澄明形容羅鷹石為人純樸，熱愛工作，過身前十年雖然半退休，但每日仍然按時返工。羅嘉瑞亦會定時向佢匯報公司事務，大事一定同老人家商量。老婆羅杜莉君85歲都重係公司董事。佢哋兩公婆白手興家。
羅鷹石平日最鍾意行山、睇書、寫書法。逸東軒就掛住佢嘅墨寶。雖然家財億萬，但羅鷹石出入冇保鑣跟身，着衫樸素、飲食簡單，喺街度同平常老人家冇分別。據鷹君員工所講，佢對公司上下相當客氣，從來唔發脾氣或呼喝下屬。
羅鷹石家教甚嚴，但深得仔女敬重。雖然1980年代羅旭瑞敵意收購鷹君旗下富豪酒店及百利保，令人以為他們兩父子不和，但李澄明話一切事過境遷，羅家一家人經常一齊食飯，絕無芥蒂。
