胡志偉 (作家)

出自維基百科,自由嘅百科全書
Jump to navigation Jump to search
Disambig.svg
呢篇文章講嘅係香港作家。想搵香港議員,睇下「胡志偉」。想搵中國大陸作家,睇下「鄭義」。
胡志偉,2016年12月

胡志偉英文Woo Chih Wai1942年—)係香港男作家。佢係上海人,喺上海出世,1979年移居香港。[1]

生平[編輯]

胡志偉屋企係上海望族。佢阿爸胡賡佩(1906–1991)係茂昌眼鏡公司嘅創始人。佢有多個兄弟姊妹,包括大佬香港理工大學眼科視光學教授胡志城、病理學家胡志翔、兩位現居中國大陸嘅姐姐、細佬眼科醫生胡志鵬。[2][3]

胡15歲就開始幫北京、上海嘅刊物同電台撰稿。1958年,佢因為向中國大陸以外嘅親友通報大躍進勞民傷財嘅消息,信件俾公安局截查,以「現行反革命罪」判刑五年,喺山西大同煤礦太原煤礦服刑及勞改,強迫留場戴帽管制,長達20年。[1]

1979年胡移居香港,除咗做過報刊編輯、編譯1年幾之外,一直鬻文為生,先後以鄭義林同華衷田豐朱有道馬失途等等百幾個筆名寫作,喺香港各大報章同期刊,以及中國大陸、台灣星加坡等地媒體,發表社論、專欄文章、小說等各類作品,總共超過4千萬字。作品結集出版嘅,有《鄧小平傳》、《江澤民傳》、《朱鎔基評傳》、《李瑞環正傳》、《中共情報首長》、《國共間諜戰七十年》、《天安門民主血》、《書評集錦》、《藏書票百家選》等等。《火柴盒上的中國現代史》俾香港電台聽眾一人一票推選為1992年香港十大好書之一。[1]

胡做過香港作協理事,香港筆會會長,1993年參與創辦文學刊物《香港筆薈》。1997年11月,佢以五倍高票擊敗左派候選人潘銘燊,當選香港藝術發展局委員,并以全票當選文學委員會主席。兩年任期內,佢著力推展香港文學,譬如參與舉辦香港文學國際研討會,主導纂修《1997年香港文學年鑑》,主持撥款資助10家文學刊物以及四家報紙嘅文學版,推行「小作家培訓計劃」,重印香港文學經典名著。對於推動香港文學發展及提升作家地位,胡志偉貢獻良多。[1]

1997年開始,胡參與香港作家黃世仲紀念館嘅策劃、陳列以及資料徵集工作,第年出任紀念黃世仲基金會顧問,主持編纂黃世仲研究叢刊10種。2001年夏,佢策劃同主持《黃世仲與辛亥革命》國際學術研討會。[1]胡仲做過香港中國現代史學會會長。

2012年,胡翻譯出版咗《張發奎口述自傳》。佢嘅譯註更正唔少英文原版嘅訛誤。[4]

胡獲香港藝發局資助,出版自傳《悲壯的歷程:胡志偉回憶錄》。

胡已婚,老婆喺巨流傳媒會計[5]

胡自詡「八不居士」,即係「不賭不嫖不吸煙不飲酒不喝咖啡不娶妾不信教不入黨」。

入獄[編輯]

1999年,胡被廉政公署控告同開益出版社嘅王鍇「串謀訛騙」藝發局10萬港紙。10月27號,因為次被告王鍇早已認罪並判刑,東區裁判署裁判官李家齊判胡罪成,監禁6個月[6]。胡不服,向高等法院原訟庭同時就定罪及刑罰提出上訴。2001年5月,法官湯寶臣駁回定罪上訴,但裁定判刑上訴得直,改判即時入獄4個月[7]。胡認為此案係佢得罪咗何志平等香港藝發局官僚而俾人裝彈弓。[3]

銅鑼灣書店事件[編輯]

內文: 銅鑼灣書店事件

2015年,銅鑼灣書店股東同員工連環失蹤(俾中國國安喺國外綁架返中國大陸)。胡獲悉事件,11月6號開始向書店老世李波自告奮勇捱義氣喺書店幫手。佢喺書店最艱難嘅時期擔任經理,見證怪事。[8][9]2016年8月,《南華早報》報導,銅鑼灣書店大概25萬本庫存書俾人運到深圳銷毀,當中包括大約2萬本胡有份編著嘅書刊。佢感到不滿,揚言向李波追討損失。[10][11]

榮譽[編輯]

2005年7月7號,胡獲得美國萬人傑新聞文化基金會第13屆新聞文化獎。[12]

參考[編輯]

  1. 1.0 1.1 1.2 1.3 1.4 胡, 志偉 (2005). "胡志伟文集:胡志偉簡歷". blog.boxun.com. 喺2018-05-29搵到. 
  2. "理大眼科視光學院與茂昌眼鏡後人結緣廿載 - 香港理工大學". www.polyu.edu.hk (用中文寫). 2008-05-18. 喺2018-05-29搵到. 
  3. 3.0 3.1 胡, 志偉 (2018-04-23). "我所認識的何志平 /胡志伟文集". blog.boxun.com. 喺2018-05-29搵到. 
  4. "胡志伟:我怎样译注《张发奎上将回忆录》". 自由写作网刊 (用中文寫). 2015-04-24. 喺2018-05-29搵到. 
  5. 胡, 志偉 (2016-05-09). "銅鑼灣書店倖存者的遺言 /胡志伟文集". blog.boxun.com. 喺2018-05-29搵到. 
  6. 案件編號:ESCC 2434/1999
  7. 案件編號:HCMA 603/2000
  8. 香港01記者 (2016-05-10). "【01獨家】作家鄭義《我在銅鑼灣書店的日子》爆內情". 香港01 (用中文寫). 喺2018-05-29搵到. 
  9. 陳, 健佳 (2016-05-10). "【01專訪】《我在銅鑼灣書店的日子》作家鄭義:我仍是書店經理". 香港01 (用中文寫). 喺2018-05-29搵到. 
  10. Chou, Oliver (2016-08-04). "Author demands payment from Lee Po after Causeway Bay Books 'trashed' 20,000 works". South China Morning Post (用英文寫). 喺2018-05-29搵到. 
  11. "銅鑼灣書店 國民黨名將自傳被消失". Apple Daily 蘋果日報. 2017-06-14. 喺2018-05-29搵到. 
  12. "专访香港作家胡志伟". Radio Free Asia (用中文寫). 2005-07-15. 喺2018-05-29搵到. 

出面網頁[編輯]