潘能敬堂
(由能敬堂跳轉過嚟)
| 潘氏祖祠 能敬堂 | |
|---|---|
 | |
| 主祀 | 潘氏歷代先祖 |
| 家族信息 | |
| 家族 | 龍溪潘氏 |
| 起源 | 福建同安 |
| 修建史 | |
| 始建 | 1776年 |
| 方位 | |
| 地址 | 廣州市海珠區潘家祠道1、2、5、6、8、10、13、13-1、14、15號[1] |
| 朝向 | 坐北向南 |
| 現時尚存 經已掛牌 | |
| 登錄名 | 同福西路潘家祠 |
| 等級 | 廣州市歷史建築 |
| 籌 | GZ-03-0039 |
| 登錄時間 | 2016年1月20號 |
潘能敬堂（粵拼：pun1 nang4 ging3 tong4），又叫潘家祠（pun1 gaa1 ci4），堂號能敬（nang4 ging3），係十三行同文行潘氏家族嘅祠堂，喺廣州河南龍溪鄉日生社栖柵巷[1] 。潘家祠保留咗部分閩南建築嘅特徵，係建築藝術史上廣府同閩南地域文化融合嘅典型代表[2]。2016年，潘能敬堂被列為廣州市歷史建築。
歷史
[編輯]開基建祠
[編輯]清朝之前，潘家祠嘅所在地係一片田塘草埠[3]。乾隆四十一年（1776年），同文行處於全盛時期，行商潘振承用一部份商業利潤喺廣州河南南溪西岸買落三百畝土地，起名叫龍溪鄉，起住宅同祠堂。潘振承嘅籍貫係福建省泉州府同安縣積善里明盛鄉白昆陽堡栖柵社，就將祠堂所在嘅巷起名叫栖柵巷，表示自己唔會忘記祖宗[1]。同文行潘氏家族另有潘氏家廟一間，喺龍慶坊北約。
家道衰落
[編輯]鴉片戰爭之後，潘振承家族從第四代開始，無咗外貿生財嘅優勢，一度出現咗家道中衰嘅跡象，甚至有子孫賣咗族人公有嘅祭田，重諗住賣埋間祠堂。好彩後嚟，族裡頭有德高望重嘅長輩出面阻止祠堂變賣，重救返因為族人賣祭田未交稅而畀人拉咗嘅長房兆鑾公[3]。
建築
[編輯]祠堂坐北向南，原先佔地5000平方米，長度同闊度都有七十幾米，而家剩返600平方米。祠堂建築整齊雄壯，有三四層樓咁高。祠堂總體佈局分成三路雙護厝，即係中間三路，左右兩邊係「從厝」，有後樓，格局同閩南地區傳統大厝佈局基本一致，印證咗潘振承「不忘先人」嘅講法[3]。祠堂由前廳、正廳同兩邊偏房組成。另外有放先人牌位嘅祠廳一間，對面曾經係祠堂嘅正門[3]。原嚟能敬堂嘅大門口經過拆除改建，門口嘅一對石獅亦都搬咗去近住海幢寺北門嘅碑廊[4]。
祠道界碑
[編輯]
祠道界碑有兩塊，打棟寫住「潘能敬堂祠道界」，一塊喺栖柵街街口（龍溪首約55號門口[3]）；另一塊喺栖柵街另一邊，塊碑有一半埋落地底。
族譜
[編輯]- 《河陽世系龍溪潘氏族譜》
- 《廣東省廣州府番禺縣茭塘司河南龍溪鄉日生社栖柵能敬堂潘氏族譜》，民國九年（1920年）刊行
攷
[編輯]- ↑ 1.0 1.1 1.2 〈廣東十三行之一：同文行行商潘啓其人〉。中國評論新聞。原著喺2020年9月8號歸檔。喺2015年8月9號搵到。
- ↑ 〈南華西二期潘家祠紅磚洋樓騎樓老街區都要保〉。《新快報》。新快網。2011年11月17號。原著喺2014年9月7號歸檔。喺2015年8月9號搵到。
- ↑ 3.0 3.1 3.2 3.3 3.4 〈龍溪首約：看盡行商興廢事〉。《南方日報》。南方網。2014年10月14號。喺2015年8月7號搵到。
- ↑ 〈南華西歷史文化之潘家大院〉。《海珠區政府網》。海珠區南華西街道。2013年4月18號。喺2015年8月7號搵到。
{{cite web}}: CS1 maint: url-status (link)