海幢寺

海幢寺大雄寶殿塔殿
廣州市文物保護單位
喺邊	海珠區南華中路188號
類	古建築
時代	清朝
冧	4-5
登錄	1993年8月
地圖

海幢寺（幢讀唐，粵拼：hoi2 tong4 zi2）係喺廣州河南嘅其中一棟寺，佔地大概1.97萬方，係廣州五大叢林（另幾大分別係光孝寺、華林寺、六榕寺同毀咗嘅長壽寺）之一。喺大清時期係第一個向外國人開放嘅佛教寺院，喺大中華史入邊有過好重要嘅文化、政治同外事功能。1993年8月，海幢寺被定為廣州市文物保護單位。

海幢寺原址喺南漢時，係做皇家嘅園林，入邊仲起咗個千秋寺，後尾就丟荒再做埋民房。到咗明代末年，有商人再買低改作自己嘅私家花園，後再轉贈俾光牟、池月兩位法師，就改造成最初嘅海幢寺。

史

1860年廣州府城地圖中嘅海幢寺

喺明代後期富商郭龍岳買低咗個地皮，同自己起咗個私家花園「蘭園」。收尾光牟、池月兩位僧人向郭氏募緣得到咗幅地，就改建做佛堂，佢哋係根據咗佛經「海幢比丘（梵文：Sa^gara-dhvaja）潛心修習《摩訶般若波羅蜜多心經》成佛」嘅意思，將佛堂改名做海幢寺。

平南王屠廣州城後

睇埋：明末清初嘅屠殺同庚寅之劫

喺清軍屠城佔據咗廣州後，平南王尚可喜聽從咗天然和尚嘅勸導，帶頭捐錢俾海幢寺擴建，以超度十日屠城而屈死嘅亡魂。喺尚可喜嘅支持下，新建立嘅官府內外人等，都一齊跟著捐錢俾寺院，而陸續買到寺隔離啲田地搞擴建。由康熙五年（1666年）去到康熙十八年（1679年）嘅十幾年入邊，成個寺院就起到有23間堂舍。其中平南王嘅老婆、王妃舒氏就捐建咗大雄寶殿，平南王本人就捐建咗天王殿，總兵許爾顯捐建咗韋馱殿、伽藍殿，廣東巡撫劉秉權捐建咗山門（而家嘅南華中路度，位置原本係海皮）……隨著寺院啲堂舍猛咁擴張，最初起嘅佛堂、准提堂都改成咗客堂，仲起埋回廊環繞著凸顯壯觀。原本好樸素嘅海幢寺，仲開始用嗮啲綠琉璃磚瓦做屋頂，呢樣建材喺嗰時係最華麗名貴嘅，連啲顯赫嘅王府都未必會用到。

中華民國後

喺中華民國初期，當局將寺南北兩側嘅地，割咗出嚟改建成南華路、同福路，而寺院嘅面積就大幅縮減，部分寺地仲轉咗成私人地。粵東紅十字會會長陸如磋就試過喺民國五年（1916），將一幅佢得到嘅、原屬海幢寺普同塔嘅地捐咗俾紅十字會。開闢同福路嘅時候係腰斬咗個寺園成南北兩部分。到咗民國十七年（1928年），廣州市政府再將部分嘅海幢寺房地劃出改做「河南公園」，喺民國廿二年（1933年）9月改名做「海幢公園」。到中華民國政府遷去台灣前，海幢寺唔少嘅殿房都因為開馬路而拆咗，剩低嘅有大雄寶殿、天王殿、舍利塔殿等。

海幢寺普同塔嘅畫（1903年）

海幢寺僧（1903年）。

1949年中共建政後，試過幾次修葺個公園，而寺度仲有乾慧、素仁兩位僧人留守打理。

到咗1966年文化大革命海幢寺遭遇浩劫，四大天王殿被啲紅衛兵清拆，寺入邊啲佛像被揼爛嗮，文物大多流失同損毀。到咗1980年代尾，大雄寶殿就變成音樂茶座兼舞廳。

廣州市佛教協會喺1992年獲准接收咗殿堂。到咗1993年1月就成立埋海幢寺重修委員會，同年3月7號經廣州市人民政府批准，海幢寺舉行灑淨儀式，恢復返宗教活動，由市佛教協會副會長新成法師擔任方丈，同時負責海幢寺嘅重修復建。成個重修嘅工程共投入咗1000幾萬，修復返大雄寶殿，重建咗天王殿、塔殿、放生池同7层高嘅僧舍、藏經閣綜台樓等。1997年又喺大雄宝殿前地東側，新起咗座叫寶嚴塔嘅石塔。

大雄寶殿（1840年代）

用途

指定嘅外商遊覽地

清代去廣州做生意嘅外商同啲家屬，朝廷只俾佢哋喺官府指定嘅十三行商館範圍度活動，仲要求喺季風後、佢哋搞完交易就要退去長期嘅居留地澳門。外商受唔到啲咁嚴重嘅人身限制、仲多番向官府抗議。為咗安撫外商，收尾朝廷同地方官府就同意咗放寬限制，會適當咁擴大自由活動嘅範圍。據載喺乾隆五十九到六十年間（1794年—1795年），根據留粵英商波朗嘅稟求，經埋兩廣總督長麟嘅核准，大清朝廷開始准許咗外商喺每月嘅初三、十八兩日，可以過海到河南嘅海幢寺同陳家花園郊遊；嘉慶二十一年（1816），兩廣總督蔣攸銛再批准咗十三行外商，可以喺每月初八、十八、二十八日，由官員帶領同通事（翻譯）陪同、過海到河南嘅海幢寺同花地灣郊遊，每次限十人。

官府嘅外交場地

英王佐治三世派遣嘅馬加爾尼使團，喺1793年到北京拜會完乾隆，返程嘅時候南下最尾到咗廣州，嗰時新任嘅兩廣總督長麟就揀咗寺院接待同送別使團。海幢寺有著多年接待旅粵遊散外商嘅經驗，喺當局防範「外夷」嘅時代，以佢嘅地理位置優勢，就成為咗朝廷接待「粵道貢國」使臣嘅場地，逐步參與埋清政府嘅對外接待事務。1794年荷蘭駐八打威（Batavia）總督派遣咗使團去祝賀乾隆皇帝登基六十周年，使團經澳門到咗廣州後，喺10月13日長麟又係喺海幢寺接待咗荷蘭使團。1817年1月，再次喺北京外交失利嘅英國譚夏士（Lord Amherst）使團返抵廣州，喺1月7號兩廣總督蔣攸銛同樣咁揀咗喺海幢寺同譚夏士會晤。

俄國皇太子尼古拉（即末代沙皇尼古拉二世），22歲陣就環遊世界，旅程中喺1891年（光緒十七年）4月5號到8號就逗留過廣州，由沙面嘅法國領事館安排食宿，受到埋兩廣總督李翰章（李鴻章兄弟）嘅隆重接待。抵埠嘅嗰日喺晚餐前，皇儲就化名搭艇仔去咗河南島，參觀埋上邊嘅佛寺（即海幢寺）。

其他

喺清末，南武公學會愛咗海幢寺嘅諸天閣、圓照堂來辦學；中華民國建立後，部份地方亦曾經畀政府拎來做「海幢公園」。而家恢復返做「海幢寺」，仲重建咗天王殿、照壁、山門同牌坊。

存物同重建物

寺入邊留低咗明朝嘅鷹爪蘭、澹歸和尚墨寶同詩稿、幽冥鐘、清朝碑記。原址近岸，山門側近有「珠海波光」一景，家下因填海而離江稍遠。

到現代大雄寶殿供奉嘅3座銅佛，高有10幾米，叫做三世佛，即過去、現在、未來佛。過去佛係燃燈佛，現在佛係釋迦牟尼，未來佛係彌勒菩薩。重建後嘅天王殿入邊嘅四大天王，無論高度、體積都係廣東入邊嘅寺院之最。

軼事

咸豐十年（1860年）英法聯軍入北京，火燒圓明園。英軍喺華南佔領咗九龍司，仲一度兵臨廣州，佔據埋貢院，致使嗰年南海、番禺兩縣童生嘅應試地點，就改咗去海幢寺。

生於丹麥嘅安徒生，佢出名嘅作品《安徒生童話》入面，有個《沒有畫的畫冊》，喺呢個故事嘅第廿七夜，有提到過中國其中一個城市嘅景象。據中山大學歷史系教授蔡鴻生喺《廣州海事錄——從市舶時代到洋舶時代》嘅考證，〈第廿七夜〉喺1840年創作，而嗰陣中西通商嘅港口得廣州一個，而個故仔度描述嘅廟宇同四圍啲景色，係有著海幢寺同十三行嘅影子。

畫廊

• 
  澹歸和尚像
• 
  海幢寺（1838年）
• 
  海幢寺入邊（1874年）
• 
  海幢寺佛塔

出面網頁

• 〈海幢寺簡介－中國廣州網〉。
• 〈海幢寺 擾攘百年溺红塵，終是佛世界〉。《南方都市報》。