光孝寺 (廣州)

**光孝寺**
中國全國重點文保單位; 光孝寺
所在	廣州
類	古建築同埋歷史紀念建築物
時代	五代至明
號	1-83
登錄	1961年

光孝寺係喺中國廣東廣州一寺，喺越秀區。東靠海珠北路；南靠淨慧路同埋光孝路；西邊靠住嘅係人民北路；北靠彭家巷。

佢係羊城年代最古老、規模最大嘅佛教名寺^[1]。呢個地方喺羊城八景入面，有「光孝菩提」噉嘅名。

名

呢棟寺嘅所在地方，喺以前《光孝寺志》呢本嘢寫咗，喺西漢南越國時期，第5代嘅王趙皇帝嚟咗呢度起咗德王府。到咗三國嗰陣時，吳騎都尉虞翻就嚟呢度講點樣去練經嘅，後嚟呢度種咗好多訶子樹，嗰陣時啲人就嗌咗佢叫「虞苑」，後嚟又嗌咗「訶林」。虞翻嘅後代就將呢度王府整咗係寺，重改咗名叫「制止寺」。到咗東晉嘅隆安五年（401年），由於嚟自罽賓國（依家係喀什米爾）嘅僧曇摩耶嚟到咗廣州嘅淨慧路附近呢度嚟起佛殿，而奉敕就喺呢度譯經傳教，就將呢棟寺名改咗叫「王苑朝延寺」（簡稱「王園寺」）。後嚟呢棟寺又改咗幾次名——叫「乾明法性寺」、「乾明禪院」、「崇甯萬壽寺」、「天甯萬壽禪寺」呢幾個噉嘅名；到南宋時期嘅紹興廿一年（1128年）改咗名叫「報恩廣孝禪寺」；而到咗明憲宗成化二年（1466年）就開始嗌成「光孝寺」，而到咗明成化十八年（1432年）就犹豫明憲宗敕畀咗「光孝禪寺」呢個名。就係咁，「光孝寺」呢個名就一直用到依家。

歷史

清朝

1650年：清軍南下嚟炸廣州，嗰陣時光孝寺都入咗清朝打仗。而清軍入咗城之後就霸咗光孝寺做兵工廠。
1651年：由於廣東貢院喺清軍入城嗰陣時被人炸咗，結果佢哋就將光孝寺整成貢院。喺清軍入咗城之後嗰陣時，光孝寺進行過重新裝修。
1903年：光孝寺被廣南中學、八旗小學霸咗。

中華民國

1912年：被廣州市第廿七小學霸咗；
1913年：被廣東法官學校、警監學校同埋廣東課史館三間單位嚟霸嗮呢度；
1938年：被廣州鳴松學校、廣東大學附屬中學兩間學校嚟霸嗮呢度；由於國民黨嘅傀儡政權關係，呢度重一直被人霸咗嚟做偽政府嘅「和平救國軍總司令部」。
1946年：日本仔投咗降之後又被廣東省義理學院霸咗呢度，後嚟義理學院就走咗佬，結果又被廣東省立藝術專科學校霸咗，重喺寺入面開咗美術部、音樂部、戲劇部，將大部分嘅禪房、佛殿都霸埋。

中華人民共和國成立之後

1949年10月1號：由於寺院入面嘅僧侶對中國共產黨提倡嘅信仰自由而搞到好高興，佢就想將以前霸咗呢棟寺嘅學校全部踢走嗮。最後，「廣東省立藝術專科學校」都搬走埋，但係好快又變咗「華南人民文學藝術學院」呢個地方。
1953年：由於華南文工團要擴大建制，重要一分為二（分成華南歌舞團同廣東話劇團）嘅關係。結果，廣東話劇團就整咗喺舊陣時嘅東山區竹絲崗附近，但係華南歌舞團就重未有埞企。而廣東省當局就勒令將原先霸咗喺寺入面嘅華南人民文學院畀咗華南歌舞團。後嚟華南歌舞團就成為咗光孝寺嘅代名詞^[2]。
1961年：國務院公佈光孝寺係全國重點文物保護單位。
1966年——1976年：光孝寺成為咗廢除四人幫嘅重點對象。後嚟紅小兵、紅衛兵呢啲人起碼每日超過10次嚟呢度搞事。嗰陣時，院入面嘅革委會主任葉端文就企喺門口嘅高凳上面大聲鬧啲紅衛兵仔同埋啲革命小將嗌嗮佢哋返去嘅，有紅衛兵就質問佢哋嘅身份，但係一知佢係歌舞團革委會主任嗰陣就O嗮嘴，令光孝寺避過大難^[2]^[3]。
1974年8月：光孝寺進行全面裝修。
1979年：再由國務院畀咗600000蚊嚟整咗大殿同埋六祖堂。
1986年3月：由國務院批准咗光孝寺係宗教活動場所重對外開放。
1987年：廣東省文物管委會將光孝寺交返畀廣東省佛教協會。

古樹攔腰冧咗事件

響2013年4月20號晚黑，由於橫風橫雨，光孝寺入面嘅大雄寶殿附近有一樖超過300年史嘅細葉榕冧咗、以前呢樖樹係重定咗「廣州市古樹名木」嘅。搞到街坊一聲歎息，重鬧咗光孝寺喺平時嘅維護工作點解唔到位^[4]。

大整山門牌坊

喺2013年5月底，有消息傳出話光孝寺要重新起返個山門出嚟^[5]，甚至喺2014年5月底嘅光孝寺官方都證實咗呢單嘢^[6]，就喺2015年3月底，嗰度一片圍蔽嗮，而施工正式喺2015年5月13號開始，光孝寺正門嘅周邊都圍蔽嗮直到2015年10月11號起好兼開放。

建築特色

光孝寺入面重有唔少嘅歷史文物，例如大雄寶殿、洗缽泉、瘞發塔、石經鐘，千佛鐵塔、伽藍殿、六祖殿、同埋碑刻、佛像、菩提樹等。

大雄寶殿

大雄寶殿呢棟嘢，佢嘅面寬有35.63米，進深有24.8米，呢個寺係廣東入面最大嘅佛寺大殿。其中大殿嘅造形好有唐宋時期嘅風格。佢重係華南地區入面，保存得最古老嘅大殿。而呢座殿就喺東晉隆宇六年（公元401年）嗰陣時起嘅。

東西鐵塔

而東西鐵塔就係喺以前中國嘅五代十國嘅南漢時期，佢重係中國入面，保存得最古老、最完整嘅鐵塔。

西鐵塔

西鐵塔喺五代南漢大寶六年（公元963年）起嘅，佢係四角，以前有七層樓噉高，每層樓都有畫住佛像同埋寶蓮花，後嚟到咗抗日戰爭嗰陣時，座塔冧咗四層，搞到座塔得返三層樓。

東鐵塔

東鐵塔喺五代南漢大寶十年（公元967年）起嘅，佢嘅樣同西鐵塔嘅樣就一樣，每層樓有畫咗盤龍同埋佛像，其中有1000幾棟尊佛像，成身都係金嘅，所以東鐵塔又可以嗌「塗金千佛塔」。而呢座塔嘅雕刻同埋冶煉技術都好犀利下，到依家為止都重保存得幾好。

鼓樓

鼓樓係喺宋朝嗰陣時由住持僧本煥嚟起嘅，到咗明萬曆三十九年（1611年）就裝修咗，後嚟就冧咗。到咗1990年經過考古發掘，就喺原嚟舊陣時嘅鼓樓地方重新起咗棟鼓樓。鼓樓入面有法鼓，同鐘一齊對住。每次到咗比較隆重嘅法會嗰陣時，鐘鼓就一齊響嘅。而新鼓樓就係喺古代寺廟入面嘅鼓樓嚟做sample嚟重新起咗，鼓樓入面重有護法關雲長嘅神像^[3]^[7]。