煙雨井

煙雨井（粵拼：jin1 jyu5 zeng2）係中國廣東省廣州市入面嘅其中一個比較出名嘅井，而呢個井係喺荔灣區芳村嘅大通寺入面。喺宋朝、元朝同清朝嘅「羊城八景」入面，佢同大通寺一齊攞埋「大通煙雨」嘅名。

史

傳說

喺舊陣時嘅大通寺度，有個水工唔小心將個鏟跌咗落個井度，後嚟喺白鵝潭度睇到。噉就出咗「扁擔放井流，白鵝潭上收，陽光照船影，井口見船浮。」嘅民謠出嚟。而煙雨井重有個出奇嘅嘢，就係喺出橫風橫雨之前，井就識噴煙；而天晴時重喺井口度睇到白鵝潭嘅帆影：而喺深夜嗰陣重可以喺井口度聽到尐喺白鵝潭傳過嚟嘅歌聲都有。由於個煙雨井喺大通寺入面，所以咪有「大通煙雨」嘅名響度喇。

逳手同落成

呢個井係喺南漢大寶元年（公元958年）由達岸禪師開山等南漢後主嚟出錢起緊大通寺嗰陣，喺天王殿前面嘅天階度整咗個深嘅井，之前係嗌過「龍霞井」，後嚟喺北宋時期改咗嗌「煙雨井」。

煙雨井嘅消失

民國嘅破壞

喺民國初年，由於廣州嘅社會動盪，搞到治安惡化且經濟蕭條，而之前成日好多人旅遊嘅大通煙雨就越嚟越少人去喇，搞到個廟成日被人整爛，變咗個賊佬避難嘅地區。喺20世紀30年代，由於日本仔殺到廣州，佢同大通寺一齊搞咗個駐防（重起埋個卡都有）嚟儲存啲糧食，搞到整好咗成千年嘅廟都冇埋。不過煙雨井重留咗喺度。

中華人民共和國成立之後

• 1953年：呢度變咗間一工廠（之前係廣州市農產品加工廠，後嚟變咗廣州果子食品廠）。
• 1958年：「大通煙雨」嘅牌坊俾人拆咗。後嚟間工廠重整大咗個曬場同職工嘅運動場，而重凈低嘅爛六角亭同塞咗嘅煙雨井都鏟走埋，得返兩樖老榕樹響度。

重建

1997年，本嚟話廣州果子食品廠就同香港嘅恒基地產公司嚟合作喺呢度搞棟高樓住宅嘅。但係喺2004年10月份，廣州市文物考古研究所就喺之前嘅廣州果子食品廠嘅工地度挖咗煙雨井出嚟，結果俾廣州市民關注。就係噉，成千年嘅古井重新出返嚟。到咗2005年7月，煙雨井已經俾廣州市人民政府加咗入去文物保護單位度。喺2008年8月27號，大通寺同煙雨井已經修復好，嗰度係一個細型嘅公共文化場所。

睇埋

• 大通寺 (廣州)

連出去

• 大通烟雨考 廣州文史