與格

與格（粵音：jyu5 gaak3；拉丁文：cāsus datīvus；英文：dative case），卽名詞第三變法，又叫名詞第三座，係名詞一格，通常擺喺動詞之後。簡化講，語法格係指名詞要視乎佢喺語句入便扮演咩角色嚟變樣，而與格就係指緊名詞「扮演接受物品或者幫助」嗰時要變嘅樣。用粵語做例，陳仔畀支筆細輝呢句說話之中，細輝個位，係接受緊物品，就係與格嘅位置。

好似粵語噉嘅漢語偏向分析語，本身近乎毫無詞形變化，但係好似英文等嘅歐洲語言就有：例如英文喺一般情況下，男性嘅第三人稱代名詞係 he（近似粵音：hi1）而假如語句中嘅男性佢扮演主格角色（簡單講即係做出動詞所指行動嗰一方）就要以 he 嘅形態出現，不過假如句中嘅男性佢係接受緊物品，就要變成 him 與格，例如想講你畀本書佢噉嘅意思：

錯誤例子：You give he a book.

正確例子：You give him a book.

此處 him 就由原格 he 轉成與格 him。就算講嘢嘅人唔正確噉使用與格，聽嘅人都有可能 get 到佢想講乜，但係講出嗰句說話就會錯語法。有啲語言（例如梵文同埋希臘文）甚至係語序唔緊要，靠格嘅變化確定意思。

基本概念

内文：語法格

睇埋：名詞同間接賓語

首先睇吓英文。廿一世紀初嘅英文已經演變到冇咩格詞形變化，得返代名詞等少數嘅詞語會有格方面嘅詞形變化：

1. He bites the dog.

   → 粵譯：「佢咬隻狗。」

2. The dog bites him.

   → 粵譯：「隻狗咬佢。」

响句一當中，He（男性佢）係咬人嗰方，係句子主語而句二當中嘅 him（男性佢）係被咬嗰方，係句子賓語。即係話英文入便嘅男性佢要按照「做緊句子主語定賓語」而變樣－做主語嗰陣隻詞要變做 he 而做賓語嗰陣隻詞要變做 him 噉。諸如拉丁文、德文或者俄羅斯文仲有更複雜嘅格變化；對於呢啲語言，可以想像「做主語做賓語隻詞會唔同樣」嘅情況，唔只用於 he 同 she 等嘅代名詞，仲會普遍噉用喺所有名詞身上。

與格（歐文簡寫 DAT）係語法格一種，用嚟標記動詞嘅間接賓語，簡單講係「接受物品或者幫助嗰一方」嘅名詞。諸如英文同德文等嘅日耳曼語言，以至捷克文同俄羅斯文等嘅多種斯拉夫語言，都有與格方面嘅語法規則。

話與格係「表達隻名詞扮演接收物品或幫助」嘅意思，查實係有少少簡化咗。喺某啲語言中，與格可以扮演其他角色。例子可以睇吓喺印度斯坦話之中，與格有時可以用嚟標記語句嘅主語。

語言實例

好似粵語噉嘅漢語，傾向冇乜詞形變化。但係印歐語言（東至印度、西至歐洲嘅一個大語系）就有豐富嘅語法格系統，好多時都會有與格變化。

睇埋

• 變格