同病毒共存

喺武漢肺炎大爆發之下，世界各國去到一段時間都無辦法做到零確診，基於經濟同人民生活原因，有啲國家決定放棄零確診嘅目標，採取同病毒共存嘅政策。英國係呢個政策嘅開路先鋒，而之後世界各國相繼跟從。自從武漢肺炎病毒變種做傳播力極高但殺傷力極低嘅Omicron變種病毒之後，由於清零政策唔合時宜，無法阻止病毒大規模擴散，浪費人力物力之餘，又對經濟同社會運作產生極為嚴重嘅損害，所以除咗中共喺習近平命令下，仲喺度夾硬搞所謂嘅「動態清零」之外，基本上清零政策已經畀世界各國抛棄，轉而推行更符合社會經濟現況嘅同病毒共存政策。

背景

喺武漢肺炎疫情初期，好多國家都有唔錯嘅防疫成績，例如台灣、香港、星加坡、紐西蘭同南韓等，但呢啲都係依賴封鎖邊界、隔離旅館同埋境內嘅嚴格封鎖等措施。

不過，喺高傳染性嘅Delta變種病毒出現之後，各國就發現疫情根本難以控制。市民難以忍受長期封鎖嘅生活，經濟亦受好大嘅打擊，所以，有啲國家就採取「同病毒共存」嘅做法，希望回復相對正常嘅生活。

科學家嘅理據同建議

喺2021年1月，科學雜誌《自然》訪問咗全球百幾名免疫學家、病毒學家同衛生專家，近90%嘅受訪者認為，武漢肺炎病毒唔能夠根治，又話有證據表明，病毒可能會成為地方性病毒，並繼續喺世界各地傳播。

此外，根除傳染病其實並唔常見。事實上，世界衛生組織到而家都只係宣佈咗天花同牛瘟被正式根除。

政策倡議下各地嘅做法同反應

中國大陸

睇埋：武漢肺炎中國大陸疫情

中國大陸去到2022年仍然堅持清零政策。中共總書記習近平多次強調中國要實行「動態清零」，絕對唔會同病毒共存。前中國衛生部長高強亦喺官媒撰文，話中國必須堅持嚴格防控，打消同病毒共存嘅想法。

喺揚州，有教師喺網上發文，建議揚州試辦同病毒共存，降低封控措施強度，雖然只係政策討論，但結果就被警方以「發布涉疫情不當言論，造成不良社會影響」為由，行政拘留15日。另外，上海復旦大學附屬華山醫院感染科主任張文宏發表言論，話中國應考慮「同病毒共存」，亦因為自己同官方立場唔同，遭受網絡暴力欺凌。

星加坡

睇埋：武漢肺炎星加坡疫情

星加坡政府喺2021年6月宣布，要採取同病毒共存嘅做法，並且以佢哋嘅高疫苗接種率作為依據。總理李顯龍喺10月9號表示，星加坡喺病例穩定時達到新常態，將可放寬限制措施。佢又預計，星加坡邁向新常態要3至6個月時間。

香港

喺香港，政府堅持推動「動態清零」做法，但坊間亦有討論同病毒共存嘅做法。2022年1月25號，民主黨公布一項民調結果，指65%受訪者贊成香港應該就同病毒共存策略作準備。

雖然係公共衞生議題，而且建議亦得到一定民意支持，但親中派立法會議員何君堯就話，就算呢啲討論都係違反北京未經諮詢或香港人同意而強行嘅《港版國安法》，結果引起部分親民主派人士批評，例如台灣香港協會理事長桑普就因此大鬧何君堯係垃圾，就連香港政府都話，呢啲純意見討論唔涉及違法。