艾勤賢

艾勤賢，2018年5月28號

艾勤賢（粵拼：ngaai6 kan4 jin4；英文：Kevin Barry Egan，1947年—2018年6月17號），係香港大律師，原籍紐西蘭同澳洲昆士蘭。英治時期，佢做過香港政府律政署副首席檢控官，專責廉署案件。後來佢私人執業，亦專接廉署案件。同律師林炳昌及前廉署執行處副處長徐家傑，合稱為廉署「天、地、人」三魔。

2017年，艾勤賢確診患上食道癌或喉癌。經過9個月治療之後，病情有好轉。2018年6月17號晚黑，艾勤賢喺屋企暈低，送往瑪麗醫院之後不治離世，終年七十歳。

官司

艾勤賢喺律政署做主控官嗰時，負責過「楊元龍造馬案」。私人執業後曾代表錢志明處理轟動一時嘅字母小姐案件。2002年8月，前冠軍騎師霍達被控造馬，佢做辯護大律師。

2004年7月15號，艾勤賢被指喺無合法權限或合理辯解下，企圖向一名報章記者披露一名參與廉政公署保護證人計劃嘅女證人身份及資料，事件觸發廉署搜查多間報館。2006年6月16號，佢同另一名涉案律師林炳昌被法庭裁定妨礙司法公正罪名成立，林炳昌入獄四年，艾勤賢入獄兩年六個月。

2009年2月12號，艾勤賢上訴成功，無罪釋放，但林炳昌嘅定罪維持不變，重要加刑。林炳昌卒之喺2010年6月28號上訴成功，獲撤消所有控罪。

專業資格

• 澳洲大律師公會會員（1972）
• 香港大律師公會會員（1990）

屋企人

佢早年喺澳洲結婚，後來離咗婚。有兩個仔，其中一個仔喺2004年死咗。