范美忠事件

 范美忠事件（粵拼：faan6 mei5 zung1 si6 gin2） ，又嗌范跑跑事件faan6 paau2 paau2 si6 gin2，簡稱范跑跑，係2008年5月12號汶川地震期間，中國大陸爆出嘅道德觀念醜聞，引發中國大陸大多數網民嘅討論。

范美忠係四川都江堰市光亞學校教書嘅先生。事發喺2008年5月12號晏晝（UTC+8），范美忠上堂教緊語文課時，突發汶川地震。佢唔理班入面啲學生，自己先行落到地下嘅操場避難。隨後班級入面嗰10幾位高中生先至意識到發生地震而陸續到操場集齊。10日後，范美忠喺天涯社區發咗篇《那一刻地動山搖》（簡化字：那一刻地动山摇）嘅文章講嗮自己喺汶川地震嗰時啲經歷。篇文發佈之後引起部份網民話佢啲道德觀念有問題，一個禮拜後篇文達到至少14萬次嘅瀏覽量。期間引起好多中國大陸啲平面同網上媒體曝光之後俾好多網友猛咁討論，范美忠亦一夜成名，成為2008年中國新聞年度人物。重俾鳳凰衛視嘅《一虎一席談》節目曝光之後，引發網上新一輪拗數同引起部份網友反感。

後嚟范美忠俾光亞學校嘅波士炒咗，重喺2008年6月6號喺北京接受媒體採訪時公開道歉。同年6月中旬，網上流傳范美忠俾中華人民共和國教育部吊銷咗先生執教資格證，但俾教育部話冇噉嘅事，而係都江堰教育局啲領導親自到學校發佈傳達命令嚟取消范美忠嘅先生執教資格。范美忠喺採訪期間重一直表明自己從嚟未考過中國大陸嘅先生執教資格證。重進一步鬧到中國大陸嘅教育體制，話參加噉嘅先生資格考試等於「醜化自己」噉解。

2008年6月25號，中華人民共和國教育部修改咗《中小學教師職業道德規範》兼徵求意見，確定喺第三條「熱愛學生」嗰欄加入「保護學生安全」一句。

睇埋

• 汶川地震