茶寮

出自維基百科,自由嘅百科全書
跳去導覽 跳去搵嘢
蘇州網師園入面嘅茶寮露華館,而家已經改咗做公開賣茶嘅茶館

茶寮係專門用嚟品茶、進行茶儀式嘅私家房間或者獨立屋仔。屠龍茶說文震亨嘅《長物志1許次紓《茶疏》都有專條。日本朝鮮多數叫做茶室,佢哋稱爲茶寮嘅,就其實係茶館。茶文化傳入西方之後,喺西方亦有一啲地方開設咗茶寮。

而家有啲私家庭園改建成對外開放嘅公園,有啲茶寮亦都改爲公開賣茶嘅茶館

東亞[編輯]

中國茶寮[編輯]

明代江南私家園林發達,另一方面,品茶藝術亦都追求茶嘅自然真味,茶藝造園藝術相融合,從而產生特別嘅茶寮建築。屠龍許次紓係茶學家、文震亨係造園家,佢哋喺唔同嘅出發點對茶寮提出唔同嘅要求。文震亨論述「茶寮」時,係作爲「室廬」篇章入面嘅獨立條目嚟討論。

明代文人講究喺園林入面佈置各種唔同用途嘅建築物,達到既多樣化而又實用嘅目的,例如拜佛有「佛堂」,彈古琴有「琴室」,沖涼有「浴室」。對於茶寮要求單獨嘅小房子,挨住山齋,裏面陳列各色茶具,仲要一個茶童專門伺候。

許次紓則由備茶嘅角度佈置茶寮內外。

  1. 茶寮入面左右兩壁各設一茶爐
  2. 茶寮入面有兩個茶几,一個放茶杯、茶壺,用嚟泡茶;另一個放其他茶具。
  3. 火炭一定要遠離火爐,一定要乾燥。
  4. 火爐一定要離開牆壁一啲距離,必須小心防火。
  5. 獨立小屋。強調茶寮一定要獨立。原因唔使多講。茶寮入面有火爐,仲要堆放火炭、松樹枝等燃料;而明代嘅建築多數係木結構,茶寮分開嘅好處,係可以更有效噉防火。

屠龍同許次紓嘅茶寮起喺書齋旁邊,而文震亨嘅茶寮起喺山齋旁邊,高雅一啲;屠龍同文震亨都有茶童,許次紓嘅茶寮冇茶童。文震亨、屠龍同許次紓嘅三種茶寮代表明代上等人家、中上人家同普通人家嘅茶寮。文震亨嘅茶寮最爲豪華,起喺園林入面,小山上有書齋,喺小山上離書齋唔遠亦有茶寮,仲有佛堂、琴室,又有小橋流水。呢三種人家嘅茶寮都係獨立式嘅,防火係一個原因,另外一個原因係明代嘅茶具種類繁多,例如許次紓嘅茶寮要安放27種茶具,再加上茶几茶凳、火炭,如果冇獨立一間屋,係擺唔晒嘅。

日本茶室[編輯]

日本兼六園嘅茶室,保留中國古代嘅茶寮風格

日本嘅茶室受到中國茶寮影響,而家有啲地方仍然保留類似屠龍同許次紓描寫嘅茶寮,但係稱爲「茶室」。面積一般以四半做標準,大過四疊半嘅稱爲「廣間茶室」,細於四疊半嘅叫做「小間茶室」。茶室專爲進行茶道而設。安土桃山時代後,亦有數寄屋造嘅形式,成爲住宅嘅一部份。

朝鮮茶室[編輯]

朝鮮半島受到中國文化影響,傳統庭園內亦設有茶室,用嚟擧行茶禮

西方[編輯]

西方一啲貴族亦會設置私家嘅茶寮,一般設置喺住宅、別墅或者私家庭園入面。

中東[編輯]

茶文化傳入中東後,當地亦有人設置私家茶寮。

參攷[編輯]

  • 註 1: (明)文震亨 原著:《長物志圖說》卷一第十一章《茶寮》,山東畫報出版社,2005年。 ISBN 7-8603-779-9