華倫西亞

	華倫西亞; Valencia
市旗	市徽
	基本資料
國家	西班牙
自治區	華倫西亞自治區
現任市長	Rita Barberá Nolla
面積	134.65km2
人口	767,654人
坐標	北緯39°29′0″西經0°22′0″
網站	http://www.valencia.es/

華倫西亞（華倫西亞話：València，西班牙文：Valencia）係西班牙第三大城市、歐洲第二十一大城市，位於東部沿岸地區，係港口同工業城市。係華倫西亞自治區嘅首府。

名

公元前138年，羅馬人發現呢座叫 Valentia [wa'lentia]嘅城市。喺拉丁文中 Valentia，意思係「力」、「活力」。喺摩爾人佔領嗰陣叫做 Balansiya。經過變音，華倫西亞語和西班牙話中分別變成 València [va'lensja] 同 Valencia [ba'lenθja] 。喺加泰隆尼亞中部地區，València 嘅發音係 [bə'łεnsjə]。

歷史

華倫西亞市距離地中海得3公里，橫跨圖尼亞河，係歐洲最富饒嘅區域之一。市內運河交織咁穿越陸地，稱為水田，周圍都係適宜耕作嘅平原，盛產橙同檸檬。摩爾人當華倫西亞係人間天堂。回教徒統治呢塊土地成500年咁耐，爾座城靚到吸引咗西班牙英雄熙德（El Cid）注目。公元1094年，熙德征服咗華倫西亞城，但佢死後，華倫西亞又再落入摩爾人手中。公元1238年，華倫西亞被海梅一世攻陷，仲納入阿拉貢王國版圖中。15世紀嘅華倫西亞盛極一時嘅黃金時期，當時華倫西亞超越巴薩隆拿做咗地中海嘅金融中心，除咗農業財富同新興港口，製陶業同絲織業都急速成長，重喺1474年成立全國第一間印刷所。華倫西亞的繁榮一直持續到1609年，菲臘三世將摩爾人逐出西班牙，咁樣令到華倫西亞嚴重受創，冇一個城市好似華倫西亞咁流失咗三分之一人口，而且流失嘅大部分人口都係農工。受到嚴重傷害嘅華倫西亞喺十八世紀初淪為馬德里嘅一個附屬省份。1936年，西班牙內戰爆發，國民軍嘅裝備係共和軍嘅十倍有多，共和軍喺馬德里嘅控制權好快被打倒，被迫遷都華倫西亞，華倫西亞成為共和軍最後最重要嘅要塞，就係因為咁受到裝備精良的國民軍猛烈轟炸，遭受到極嚴重嘅破壞。1982年華倫西亞成為西班牙新嘅自治區，華倫西亞城理所當然就做咗華倫西亞自治區嘅首府。

蝙蝠傳說

傳說喺13世紀，為咗驅趕入侵嘅摩爾人，阿拉貢國王海梅一世率大軍東征，想收復華倫西亞城。喺一場戰役，一支敵箭射向集中緊指揮場仗嘅海梅一世，啱啱嗰時一隻蝙蝠飛過，幫佢擋咗呢支攞命箭。華倫西亞城光復後，為咗多謝蝙蝠嘅庇護，封佢做保護神，重被排入城徽。咁樣，蝙蝠滲透華倫西亞嘅文化。