萬千熄機賀台慶
《萬千熄機賀台慶》係2013年11月嘅一場香港公眾運動，亦係無綫電視節目《萬千星輝賀台慶》嘅惡搞，主要指香港市民集體熄機罷睇《萬千星輝賀台慶》，以表達對香港政府唔發牌畀當時得到唔少公眾支持嘅香港電視網絡，但又唔明確交代原因，從而造成行業壟斷嘅不滿，同時反對無綫電視嘅立場同埋佢哋節目《東張西望》對香港免費電視牌照爭議所發表嘅偏頗見解。
有膠登音樂台嘅網民和應呢次行動，將《萬千星輝賀台慶》嘅主題音樂惡搞變成一曲《萬千熄機賀台慶》，歌詞批評無綫節目質素低劣。不過，面對當時網民嘅不滿，陳百祥就公然挑釁香港人，話如果佢哋可以熄機令到無綫得返兩、三點收視，佢就跪落嚟，一路由將軍澳錄影廠跪到返屋企[1]。
結果，2013年無綫台慶劇收視創近年新低，平均收視29點，最高31點，比前一年少5點。無綫企業傳訊部副總監曾醒明回應事件，就話喺風風雨雨，咁多衝擊下，仍然有29點收視，無綫感到滿意[2]。
參考
[編輯]- ↑ 〈阿叻：收視兩點我就跪〉。原著喺2017年1月21號歸檔。喺2021年11月19號搵到。
- ↑ 〈台慶平均收視29點 最高收視31點〉。《on.cc東網》 (香港中文)。2013-11-20。喺2021-11-19搵到。