蒲崗
(由蒲岡跳轉過嚟)
蒲崗（Po Kong），或者蒲岡，係香港地方同移平咗嘅村，屬於林氏。村喺香港新九龍東翼，家下黃大仙警署對面馬路個位[1]。舊時係九龍灣海皮，背面靠住個113呎嘅崗，即係山仔。
名
[編輯]蒲崗個蒲，係指福建莆田，因為佢哋嘅祖先係鶴佬。而崗係條村北便背住個崗。所以夾埋叫蒲崗。
地理
[編輯]蒲崗喺官富山前，落係九龍灣嘅冲積平地上便，而村就靠個113呎嘅山仔。周圍有涌流入九龍灣。
蒲崗西便有條沙田坳道。西南近有隔坑村，遠啲有衙前，再遠啲有九龍寨城；西有石鼓壟，北沿沙田坳道可以到竹園。東便過涌可以去到元嶺嗰幾條村[1]。之後亦有條蒲崗村道，由村嘅東面，一直向北伸入慈雲山區南便。
史
[編輯]家下維多利亞港，以前係中國南方同南洋海運必經之路。而佢嘅九龍灣，有唔少船停泊。而熟水性嘅福建人來到九龍一帶開村，以鹽為業。
而開村嘅林氏族譜有講，大中祥符元年戊申(1008年)，原藉福建莆田，以艚運為業嘅林松堅、林栢堅響佛堂門遇險，浮到去南佛堂山崖甩難。佢哋子孫有經商致富，響九龍彭蒲圍定居，之後搬到大磡窩蒲岡。考古發掘有唔少磁器響呢一帶搵到，好可能同海上貿易有關。
條村南便，1910年代到20年代，九龍灣有填海，變成啟德填地。家下叫呢笪填地北便邊邊，文理書院左近，同埋同村之間一帶，就做新蒲崗，畀彩虹道同太子道包住。
條村去到1940代，畀當時佔領香港嘅日本人拆咗，用來加大啟德機場跑道，開渠帶走雨水，而清水灣道（家下呢段叫彩虹道）起喺渠邊。村個位就沙田坳道尾嘅渠同馬路。之後機場搬南啲，改呢塊地叫新蒲崗，變成工業區同住宅區，原蒲崗就變成新蒲崗一部份。