蒸餾

附圖：實驗室蒸餾架撐

蒸餾（粵拼：zing1 lau6）係一種將液體混合物分開嘅方法，其原理如下：混合物入便，唔同嘅化學物質會保留各自嘅物理特性，所以佢哋嘅沸點（喺咩溫度蒸發）通常都會唔同，所以假想將隻混合物慢慢加熱，沸點低啲嘅液體會蒸發咗先－於是研究者就可以分開噉冷凝，收集每隻物質。

解釋

睇埋：沸點同物理特性

附圖就係喺實驗室做蒸餾用嘅架撐：

• 混合物入面嗰啲唔同嘅化學物質，會保留各自嘅物理特性（混合物嘅定義）所以混合物唔同成份之間嘅沸點（指每隻物質喺咩溫度會蒸發）通常都會唔同，而如果隻混合物裏面嘅嗰啲唔同化學物質沸點有明顯嘅差異，就可以用蒸餾將佢哋分開。
• 附圖裏面 13 同 14 等嘅部份會將隻混合物（裝喺 15 嗰個位）加熱；
• 加熱到咁上下，沸點最低嗰隻化學物質（暫且嗌做液體 A）會蒸發並且由管道引導去 8 嗰個位（同時研究者可能喺呢個時候調低 13 同 14 嘅熱度）；
• 喺 8 嗰個位，研究者會同隻化學物質做冷卻，簡單例子可以想像 16 係一盤冰水），等變咗氣體嘅液體 A 凍到變返液體；
• 跟住研究者就可以攞走 8 嗰個容器－呢個容器會裝住純嘅液體 A，然後佢就要換過個新嘅容器落 8 嗰度，並且加大 13 同 14 嘅熱度；
• 一路做上述嘅工序，做到攞到晒想要嘅純物質為止。

應用

睇埋：海水化淡

喺工業等領域，蒸餾有好多唔同嘅用途，例如：

• 海水化淡可以用蒸餾嚟做，原理係利用液體喺沸點嗰陣產生蒸氣，將海水入面嘅水份變晒做蒸氣，噉樣就可以將水分子同鹽分分開，再將水分子凝結返，就可以整到淡水。
• 喺石油產業，原油穩定可以用嚟減低原油蒸氣壓，令原油嘅儲存同運輸更加安全，亦都可以減少原油入面會揮發到大氣嘅碳氫化合物。
• 低溫物理學方面，可以透過蒸餾去分離空氣，產生出氧氣、氮氣同氬氣，呢啲都係工業上有用嘅氣體。
• 化學工業方面，蒸餾成日都會用嚟將化學合成之後嘅產物，分離出嚟，例如要將產物同雜質、未反應完嘅反應物或者其他副產品分開。

睇埋

• 蒸餾水
• 蒸餾酒
• 蒸餾醋
• 混合物