蔴雀史

蔴雀係一種中國以前流傳到而家嘅一種遊戲，由「馬吊」演變出嚟，最初係用紙牌玩，後來經改良而變成而家嘅骨牌形式。不過由於以前蔴雀畀人視為一種難登大雅之堂嘅玩具，所以好少關於麻雀歷史或者起源嘅記載，多數關於蔴雀起源嘅講法都只係根據一啲傳說同揣測而來，好難作實。

由馬吊到麻雀

麻雀前身係「馬吊」，而「馬吊」就源自「葉子戲」。最初好似「十五胡」咁，只係一副紙牌。

清代作家李汝珍喺佢本小說《鏡花緣》入面，有描寫玩馬吊嘅情節，馬吊原來只係兩個人玩，叫做「梯吊」，因為梯有兩隻腳，咁兩個人玩「吊」，就叫「梯吊」。另外有三個人玩，叫做「蟬吊」，因為蟬有三隻腳。到四個人玩，就叫「馬吊」，因為馬有四隻腳，四個人玩「吊」，所以就叫「馬吊」。

吊牌嘅吊，係指「掉」，摸一隻牌，掉一隻牌，就係「吊」嘅玩法，之後馬吊再演變而成為蔴雀。

但後嚟話說喺唔知邊個朝代，啲士大夫因為沉迷打蔴雀而荒廢朝政，搞到朝廷要下令禁止打麻雀，後嚟麻雀呢種遊戲傳咗去啲水上人度，因為水上人出咗海，重使乜怕朝廷禁令。不過喺船上面打蔴雀如果用紙牌會濕晒玩唔到，而且大風大雨，重好容易吹走晒，就算喺船上面要收埋都好困難，於是就發展成而家嘅骨牌麻雀，之後麻雀解禁，又由水上傳返去陸上，麻雀就係咁由紙牌變成骨牌，一直流傳到而家。

骨牌麻雀

骨牌麻雀相傳係元朝之後，大約喺同治三年，即西元1864年咁上下，由一個叫陳魚門嘅寧波人改良而變成而家咁樣，由原本嘅「十字、萬字、索子、文錢四門」，變成只有「萬、索、筒」總共 108 張，由於陳魚門嘅航海背景，令麻雀術語入面有好多水上人味道，好似「索子」，又或者叫「條子」，係源於船上面嘅繩索，由於船上面嘅繩索最高就係桅桿上面拉帆條繩，而上面又成日企咗好多海鷗喺度，所以一索嘅圖案係隻雀，就係咁解；「筒子」就係船上面裝淡水同糧食嘅木桶；「萬子」，就係銀両數目。而「東南西北」四風，好明顯都同航海嘅風向有關。至於「中發白」，就係當時計銀両嘅單位，白係最細，而發就係半両，中就係一両。最初係連住萬字寫，後來先分開。

同時又由於陳魚門係寧波人，寧波方言將麻雀讀為麻將，所以麻雀又叫做麻將，另外好似糊，原本係叫「和」，亦因為寧波方言原因而變成糊，但日本仍然保留叫返做「和了」。不過呢啲傳說而家確實好難考證。

護糧牌

有關資料記載，喺江蘇太倉縣曾經有皇家嘅大糧倉，平時囤積稻穀，嚟到「南糧北調」。糧多就自然雀患頻生，每年因為雀患就損失咗唔少糧食。管理糧倉嘅官吏為咗獎勵捕雀護糧者，就用竹製嘅籌牌記錄捕雀數目，憑啲牌發放酬金，呢個就係太倉嘅「護糧牌」。呢種籌牌上面刻住各種符號同數字，既可觀賞，又可遊戲，亦可用嚟兌取獎金。呢種護糧牌，佢嘅玩法、符號同稱謂術語全部都同捕雀有關。

例如，「筒」嘅圖案就是火藥槍嘅橫切面，「筒」即係槍筒，幾筒就表示幾多支火藥槍。「索」即係「束」，係用細束繩串起嚟嘅雀，所以「一索」嘅圖案就用雀去代表，幾索就係幾多束雀，獎金就係按雀嘅多少去計算。「萬」即係賞錢嘅單位，幾萬就係賞錢嘅數目。

另外「東南西北」就係風向，所以叫「風牌」，因為用火藥槍射雀要考慮風向。「中、白、發」：「中」即係射中嘅意思，所以係紅色；「白」即係白板，射空炮嚇走啲雀；「發」即係發放賞金，領賞金嚟發財。

玩法演變

最古老嘅麻雀玩法，叫做老章麻雀，老章同天九玩法相似，都係以閒家鬥莊家咁玩，莊家贏閒家計雙，贏咗可以冧莊，每冧一次莊可以加莊，即係原本贏咗計雙，冧莊之後計三，再冧莊就計四，如此類推，變成閒家要合力鋤莊家。

之後加入咗出銃，邊個出銃畀人食糊，就要輸雙倍，而自模就贏晒三家，喺老章麻雀都冇呢啲嘢。有咗出銃之後，加莊制度就廢除咗，呢個時候開始就發展出一種叫清章麻雀嘅玩法，亦即係而家好多人玩緊嗰種。

有咗清章麻雀之後，莊閒之間變得平均咗，同時麻雀策略亦變咗，閒家由合作鋤莊家嘅關係，變成另一種合縱連橫嘅關係，例如你發現某一家正喺度做緊大牌，而你副牌又好難食糊，就寧願出銃畀下家輸少啲，唔使輸得咁甘，又或者某一家特別旺，其他三家夾埋鋤旺家，都係有咗出銃制度之後而有咁嘅改變。

而喺清章麻雀之後，又發展出新章麻雀，亦有人叫「新派清章」，新章其實係喺清章玩法之上，加入六獨、十八番、無奇不有呢啲花式，令玩法有更多變化。

而基於呢幾種玩法之下，加上各地唔同文化影響，而又發展出其他唔同玩法。

流傳

喺鴉片戰爭後，寧波辟為「五口通商」之一，好多海輪泊喺寧波江廈。唔同地方嘅商人都係度打躉，結果呢啲商人就將呢種遊戲帶返去自己嘅地方，然後又因為各地文化差異，而發展出唔同嘅玩法，而影響力比較重要嘅地方，可算係江南、福建、廣東。

江南麻雀

俗稱心皇麻雀，係江南文人雅士嘅玩意，以十五章麻雀成手，另外一隻為心皇麻雀，即收埋喺心道嘅百搭皇牌。

用一子百搭方式鬥快食糊，唯一規則係四隻下海嘅牌唔可以成百搭，明槓亦當作四隻下海。

台灣

台灣麻雀原本係福建麻雀嘅一個支流，台灣麻雀嘅十六張牌玩法就係師承自福建麻雀，後來又受日本麻雀影響而自成一格。

日本

日本麻雀就喺日本明治末期傳入，係以江南麻雀為宗。但後來青出於藍勝於藍，日本人將麻雀視為一種競技，而唔係賭博，所以日本將玩法改良到競技成份比運氣成份大。而發展甚至可以話追過咗中國，而家喺日本唔單止有好多麻將雜誌、麻將大賽，甚至有麻將博物館。

美國

而喺二十年代，蔴雀重曾經傳到去美國，而發展出美國麻雀。最初傳入去嗰陣好受歡迎，但到咗大不景氣時代出現之後，蔴雀突然間變得唔再受歡迎，冇人解釋到點解。但喺之前由於亦有好大發展，所以亦種咗根，而家美國有一個已經有十幾年歷史嘅全國麻雀協會，重每年都有麻雀大賽，不過好少華人參加，因為美國麻雀玩法甚至連基本結構都同華人玩開嗰種好唔同。美國麻雀最接近老章玩法，但而家已經發展到同中國玩開嘅蔴雀完全唔同，甚至可以話係完全另一樣嘢。

香港

香港蔴雀受廣東麻雀影響最大，而蔴雀甚至可以話係香港文化一部份，香港人將蔴雀變成生活一部份，發展出將蔴雀當做一種交際工具嘅衛生麻雀，重有蔴雀館，呢啲都係喺蔴雀世界文化中最大特色，因為全世界都冇好似香港咁將蔴雀變成生活一部份，同埋蔴雀館呢種公然打麻雀賭錢嘅場所。不過喺1871年香港政府曾經頒令禁賭，為咗唔會犯禁賭法例，蔴雀館牌照上面嘅英文名全都都改晒做 Mahjong School，即係「麻雀學校」。不過而家嘅蔴雀館已經改為由影視及娛樂事務處發麻將/天九牌照運作。

越南麻雀

越南麻雀係序數牌同字牌之上加入十六隻有條件限制嘅百搭牌，全副共152隻。呢十六隻牌之中，八隻叫做「花、元、喜、合、筒、索、萬、總」，另外八隻就無名或名為「一皇、二皇、三皇、四皇、一后、二后、三后、四后」。

另外，功能百搭牌：「花」，亦有人將佢改為「番」，就會變成「番、元、喜、合、筒、索、萬、總」。各款功能百搭牌功能如下：

• 花：當花用，額外加番數
• 番：可以當作任何一種字牌，即東/南/西/北/中/發/白
• 元：只可當作三元牌其中一種，即中/發/白
• 喜：只可當作四風牌其中一種，即東/南/西/北
• 合：可當作任何一種序數牌，即1-9筒/1-9索/1-9萬
• 筒：可當作任何一種筒子，即1-9筒
• 索：可當作任何一種索子，即1-9索
• 萬：可當作任何一種萬子，即1-9萬
• 總：當係乜嘢牌都得，因此又叫「通天百搭」

現代

到家陣時網上遊戲興起，令呢種古老遊戲唔單止冇被淘汰，重被推上另一高峰。