薑汁撞奶

薑汁撞奶

 薑汁撞奶（粵拼：goeng1 zap1 zong6 naai5） ，亦叫薑撞奶，係一種源自廣東番禺沙灣嘅甜品，係由凝固咗嘅牛奶製成。喺沙灣叫做薑埋奶（goeng1 maai4 naai5）。喺附近嘅廣州、順德、香港等地亦有好多間餐廳供應。做薑汁撞奶用嘅牛奶，以水牛奶為佳，因為水牛奶油脂多，亦都濃啲，一來容易凝結，二來口感都香醇啲。

原理

薑含有蛋白酶，可以同牛奶裏邊嘅蛋白質發生化學反應。牛奶裏邊嘅一種蛋白質由可溶嘅狀態轉成不可溶嘅狀態，令牛奶凝固。老薑嘅蛋白酶含量多啲，容易凝固啲。

點整

將牛奶加熱到約莫攝氏70到80度度，加入適量嘅糖，等溫度降到70度以下之後，倒到裝有一湯匙度薑汁嘅碗仔入面，大約一分鐘就搞掂嘞。放耐咗嘅薑汁，底部會有一啲沉澱物，呢啲就係令到鮮奶凝固嘅嘢。撞之前一定要攪勻先可以倒啲奶入去。

出面網頁

• 廣州特色甜品店大搜查