蜜蜂針

一條由隻蜜蜂身上甩咗出嚟嘅針

蜜蜂針（英文：bee sting）係指蜜蜂嘅針。

當一隻蜜蜂想攻擊敵人嗰陣，佢會將佢支針拮落個敵人身上，支針帶有一啲毒液－蜂毒（apitoxin）。支針好多時喺拮完個敵人之後，就會由隻蜜蜂嘅身體嗰度甩出嚟，但就算係噉，因為支針有佢自己嘅神經節等嘅結構，所以仲可以繼續插喺個敵人身上同埋向佢注射毒液，毒液會令個敵人有痛嘅感覺。除咗噉之外，當一隻蜜蜂感覺到有危險嗰陣，佢會釋放一種費洛蒙，呢種費洛蒙會刺激佢四圍嘅同伴，令到佢哋一齊進入攻擊狀態。分泌呢種費洛蒙嘅腺（gland）同隻蜜蜂支針有關係－插咗入敵人體內支針會繼續係噉釋放嗰種費洛蒙，令到其他蜜蜂跟住一齊攻擊個敵人。

蜜蜂同其他多數嘅蜂唔同嘅係，佢哋啲工蜂嘅針上面有啲好似倒勾噉嘅刺喺度。如果隻蜜蜂拮嘅敵人係一啲皮膚有返咁上下厚嘅動物－例如係人類－啲刺通常會令到支針由隻蜜蜂個腹嗰度甩出嚟，而隻冇咗支針嘅蜜蜂會喺幾分鐘之內死亡。呢種構造之所以會進化出嚟，可能係因為蜜蜂要應付脊椎動物用嘅－除非插咗入肉，支針多數唔會甩出嚟。