西灣 (西貢)

出自維基百科,自由嘅百科全書
Jump to navigation Jump to search
西灣對出嘅大洲(左)同埋尖洲(右),已經成為咗地標性嘅海景啦。
大浪灣

西灣,全名叫做大浪西灣,係香港新界西貢區最出名嘅海灘,名列西貢大浪灣「四灘一尖」入面嘅「四灘」之首。由於地處萬宜水庫去大浪灣嘅入口,而且麥理浩徑喺旁邊經過,所以係西貢遠足人士一個好重要嘅補給同埋休息地點,而水清沙幼嘅海灘,亦都成為咗唔少遊艇假日嘅落腳點。

歷史[編輯]

海星聖堂,據村民話係用大理石起嘅,棟樓喺六十年代左右荒廢咗,而座牌樓上邊寫住1903同埋天主堂三隻字,左邊寫住海星聖堂,但而家行去棟嘢嘅路都荒廢晒啦,而當年曾經係村入面唯一嘅小學。

西灣全名叫做大浪西灣,意思係指呢個灘係喺西貢大浪灣嘅最西邊,大浪灣舊陣時叫做鳳灣[1],而西灣自古就係呢頭漁船避風嘅地方,而喺岸邊就慢慢形成咗今日見到嘅西灣村啦,西灣村嘅歷史好久遠,有本《大浪西灣黎氏族譜》話,西灣村嘅歷史最耐可以追到去明朝成化年間,距離而家有成六百年歷史啦。

西灣村喺未起萬宜水庫之前,只可以坐船過去,所以村內齋靠個海都已經夠晒食,而天主教會亦曾經係1903年,起咗一間教堂──海星小堂,並係教堂入面附設小學,間教堂係用大理石嚟起嘅,至而家重仍然企咗係度。

雖然係1960年代嗰時,香港政府係萬宜村起咗個水庫,而亦因為咁,塞住咗官門水道,搞到西灣嘅水路交通變咗做陸路[2],迫住令西灣嘅交通要對外面開放,同時亦因為新任牧師腳患嚴重,爬唔過座西灣山,搞到西灣嘅傳教同埋教育事務返唔到落去,再加埋香港工業化帶嚟好多工作機會,令啲後生仔係咁離開西灣,而條村亦都變咗做條老人村啦。

1980年代去到1990年代,政府起咗一大堆遠足徑,引咗好多普羅大眾去行山,而麥理浩徑貫穿成條西灣村,再加埋個西貢東郊野公園嘅設立,令到旅遊觀光,好似士多呀、租屋呀、沖身咁,慢慢變成當地好重要嘅經濟支柱,而到2003年SARS嘅流行,更令到西灣呢個比較接近市區,而座山又唔算太難行嘅郊野,變成一個非常旺場嘅渡假地點。

景觀[編輯]

大浪西灣曾經得到由香港郊野公園之友會國際獅子總會港澳三0三區同埋漁農自然護理署舉辦嘅「香港十大勝景選舉」第一名[3]。可以知道見西灣景觀個靚法,晨咁早就得到官方同民間嘅肯定,而佢本身又被人公認為大浪四灘之首,(另外三個海灘由南至北為鹹田大灣同埋東灣)。

西灣本身分咗做南灘同埋北灘,而西灣又喺西灣山以及獨孤山北面,西灣山標高雖然得314米,但係因為座山好斜,而且南北兩面都有道路連接,所以唔理由西灣山望落去西灣及鹹田,定係掉返轉由西灣望過去西灣山,風景都係一絕,而西灣對出個海度,可以見到大洲尖洲兩座小島,更加係西灣的代表性海景,而由北灘向北行無幾耐,更加可以行到去香港九大石澗之一嘅雙鹿石澗鹿湖,當然,西灣最出名嘅都重係佢嘅水清沙幼,未受污染嘅原始海灘,而海灘對出個海域,都係屬於大浪灣 嘅海域,所以同埋大浪四灘都可以享受呢個海天一色嘅海景,同埋有「香港大堡礁」之稱嘅龐大珊瑚礁

而由於西灣一帶無乜人,而且大多數重保持住傳統農村嘅作息生活,而喺正隔離嘅萬宜水庫又將西貢市區的人煙遠遠擋住喺外面,所以西灣亦係香港無乜幾個,喺強勁嘅光害之下,重望得到星星嘅地方。

生態[編輯]

香港東邊海岸由於距離珠江口啲污染物好遠,而且重要面對住個開闊嘅太平洋,而沿岸多山嘅地形亦阻住人口發展同埋由此而嚟嘅污染,令香港東邊海域成為大群珊瑚聚落嘅溫床,就好似好出名嘅海下灣同埋大浪灣咁,而當中大浪灣更被行山界形容做「香港四大奇景」之一,所以喺西灣出海無幾遠,就可以好容易咁睇到唔少珊瑚礁,而根據村民嘅描述,五十年代喺西灣重可以好容易咁捉到海參啦,而跟住珊瑚而形成嘅生態系,亦因為咁而成形。

而喺陸上,由於西灣係一條季節性嘅河道出海口,所以喺啲海水唔鹹唔淡嘅地方會有好大片嘅紅樹林,而隨住紅樹林嘅形成,有唔少魚呀、蝦呀咁嘅生物亦都會係紅樹林度生活,重會引來好多鳥類同埋昆蟲定居或者覓食,當中有好似係全球都唔多見嘅紫背葦鳽咁啦,都會喺包括西灣在內嘅大浪灣範圍活動,而政府亦因為咁,而喺2001年嘅《大浪灣分區計劃大綱草圖》入面,將部份地區列做自然保護區同埋具特殊科學價值地點而保存咗落嚟,可以知道呢處喺成個生態系上面嘅重要地位[4]

而且作為西貢一個地標性嘅優美地點,西灣嘅自然環境對成個香港氣候嘅調節仍然起到一定嘅作用。

交通[編輯]

西灣嘅交通係大浪灣以東最方便嘅,經水路、陸路同埋空路都可以嚟到。

水路方面,可以自己包隻船去西貢市中心或者黃石碼頭,亦可以自己開隻遊艇去。

而喺陸路方面,就有幾條路可以畀你揀,可以喺西貢市中心轉小巴直接去到西灣亭總站,再沿住條山路過去,亦可以先搭車去到北潭涌郊野公園服務中心,再行過去萬宜水庫另一邊,爬過獨孤山同埋西灣山,亦可揀飛的直接去到水庫迴旋處,然後行過獨孤山同埋西灣山,大概行六公里左右就嚟到。

而反方向行嚟嘅話,亦可以由黃石碼頭出發,經過赤徑大浪村鹹田到度,再經過吹筒坳去到西灣亭坐小巴走人。

而係空路方面,西灣嘅北面有一個小型直升機停機坪,不過家陣只係畀緊急服務用,普通民眾係唔可以自己搭直升機出入嘅。

設施[編輯]

西灣重有一個政府露營營地,而且有燒烤爐設備,衛生設施方面,就只係得旱廁,而水源亦都只有間歇性嘅溪澗,而村入面嘅人家一般有井水,有必要嗰時可以試吓問佢哋借[5],而手機呢一般都收唔到,而係有需要嘅時候,可以試吓問士多房老細借個電話嚟用,村入面有幾間士多房,亦都唔少有提供租房同埋衛浴設備嘅,不過一般都係要收錢嘅,而係士多入面可以買到一般燒烤用品以至各式飲品,而且亦有簡單餐點可以畀你堂食,當地嘅民風淳樸,不過非假日嘅日子唔一定會開門。

危機[編輯]

2000年,香港政府發表《大浪灣分區計劃大綱草圖》(No.S/SK-TLW/1),劃咗將區內好多地方入保護區,重打算喺五個鄉村發展區鼓勵起丁屋,希望喺十年之內,區內人口由廿幾加到千幾。因為計劃好大而且包括西灣,有可能危及成個大浪灣嘅歷史古跡同自然環境[6],所以大浪灣之友之類嘅組織成立,組織起嚟反對計劃;而香港民間嘅保育意識高咗,而且生態旅遊亦都開始興,所以反對聲音得到好大迴響。城規會喺2000年11月同反對代表見面,係2001年嘅,決定大幅減少起丁屋嘅規模,限制喺原有丁屋重建同埋已批准項目[7]

但係,當大眾興起行山,有啲無公德心行山人會留低啲垃圾;而沙灘外面又停住一大堆遊艇,帶嚟好多油污,再加埋要處理當地居民嘅基本生活需求,要唔想破壞成個環境,係西灣未來發展嘅挑戰。

[編輯]

參攷[編輯]

  1. 《香港九龍兼新界形勢圖》,香港中華書局,1940年
  2. "香港漁農自然護理署--西灣營地". (原先內容喺2007年12月2號歸檔). 喺2007年12月17號搵到. 
  3. "「香港十大勝景選舉」". 郊野公園之友會. (原先內容喺2007年12月13號歸檔). 喺2007年12月17號搵到. 
  4. "大浪灣". (原先內容喺2007年7月8號歸檔). 喺2007年12月17號搵到. 
  5. "香港漁農自然護理署--西灣". (原先內容喺2007年12月2號歸檔). 喺2007年12月17號搵到. 
  6. "大浪灣". (原先內容喺2007年7月8號歸檔). 喺2007年12月17號搵到. 
  7. "(地理教學網站)大浪灣". (原先內容喺2007年12月12號歸檔). 喺2007年12月17號搵到.