觀音兵

觀音兵（粵拼：gun1 jam1 bing1），又叫工具人，意思係指為咗討好自己嘅心儀對象而甘心為對方無償做嘢嘅人，喺華語地區各地有馱獸、觀音兵、舔狗、火山孝子、騎士團等類似嘅叫法。所謂「觀音兵」指緊嘅係一種依附住觀音生存嘅物種，聽候觀音差遣，斟茶遞水上刀山落油鑊乜都要做，但係冇實質名份，甚至連手仔都冇得拖嘅悲慘男性，喺香港叫呢啲男人做「觀音兵」係因為呢啲男性好似觀音座下嘅侍從小仙咁樣任由差遣 。「觀音兵」呢個字詞歷史久遠，喺香港俚語度用嚟形容某啲男性]為咗追某條女，而不顧一切為嗰個女人做各樣嘢。後嚟呢個詞引申去到互聯網論壇等嘅虛擬社群。畀人崇拜嘅女性就叫觀音、娘娘或者女神，而呢啲女性招攬觀音兵嘅行為就叫做「收兵」。而喺臺灣，接受奉獻嘅對象通常會畀人叫做公主、女神，而奉獻者就畀人叫做火山孝子或者騎士團，喺中國大陸呢啲觀音兵就會叫「舔狗」。

觀音兵嘅特徵

1. 好恨有異性朋友：呢個同日本文化毒男或毒女嘅特徵常有重疊，但唔係一模一樣。
2. 有啲就係因為對本身嘅伴侶冇乜信心，因為驚對方提出掟煲或者變心而特登討好嘅行為。
3. 另外，因為受到打令或者配偶嘅驅使，又或者刻意討好伴侶而幫手嘅人，都可以自嘲做觀音兵。
4. 有啲觀音兵可能會有劈腿行為──亦即係對每個拍拖對象都會特登討好，希望用噉嘅方法比自己可以同時同幾個人拍拖。
5. 有啲觀音兵本身都係第啲觀音兵嘅驅使者，甚至會利用第啲觀音兵去幫自己討好心儀異性者，例如要求觀音兵出錢幫自己買送畀心儀對象嘅禮物、要求觀音兵去幫自己心儀對象做嘢等等。