語感

語感（粵拼：jyu5 gam2；參見德文：Sprachgefühl，大致係語言感覺噉解）係語言學上嘅概念，指緊以某隻語言或方言為母語嘅人，對以下呢條問題嘅直覺判斷：「面前嘅詞同句，係咪合乎我母語嘅語法同埋其他規則？」舉例說明，是但搵一個以廿一世紀初粵語做母語嘅人，即使佢未受過語言學相關訓練，唔識得同人解釋粵語語法，佢望住以下呢啲出自閩南話嘅詞句，依然能夠本能上 feel 到呢啲詞句唔似粵語：

「我無曉你講咩。」

「你欲去佗位？」

「有影無？」

語感嘅形成，源自人學習母語嘅過程中開始建立，當中原生嘅社會環境、教育經歷以及相關語言經驗，都扮演咗關鍵角色。不過即使過咗語言初習階段，語感仍然可以喺及後嘅生活之中透過密集語言經驗（包括日常溝通、媒體接觸等）培養同調整。

心理思考

睇埋：語言習得同內隱知識

所謂內隱知識，係講緊人明明識做某樣嘢，但就未必講得出自己究竟「知啲乜」。語言就係一個典型例子：細路學識咗母語時，可以好自然噉講出一啲語法正確嘅句子，但如果你問佢點解噉講係啱，佢哋好可能完全解釋唔到。即係話，佢識用語言，但唔識講點解佢識用。呢啲知識唔係靠背書或者規則學返嚟，而係透過大量實際接觸、模仿同互動慢慢噉累積返嚟。事實表明，未經語言學相關訓練嘅人，往往唔能夠正確噉向人講解自己母語嘅語法或者其他規則，但係佢哋自己使用母語嗰陣就能夠近乎完全正確噉用，即係話佢哋對母語有豐富嘅內隱知識。

喺社會化嘅過程中，細路唔單止係聽人講同跟人學，佢仲會自己喺腦入便消化、建構屬於自己嘅理解。呢啲事物包括生活事件、日常互動、語言交流... 等等。換句話說，語言學習唔淨只係學咗文法規則，而係成個人喺社會環境入面對語言、世界同自己之間關係嘅整體建構—好多時都係內隱發生，不經意之中慢慢掌握。

睇埋

• 心理語言學
• 社會語言學
• 語言相對論
• 接受度判斷
• 心靈詞庫

文獻

歐文文獻：

• （德文） Helmut Gipper: „Sprachgefühl", „Introspektion" und „Intuition". Zur Rehabilitierung umstrittener Begriffe in der Sprachwissenschaft. In: Wirkendes Wort. 26, Heft 4, 1976, S. 240-245.
• （德文） Wilhelm Köller: Philosophie der Grammatik. Vom Sinn grammatischen Wissens, J. B. Metzlersche Verlagsbuchhandlung, Stuttgart 1988.