諫官

諫官係古代既官職，呢啲職位既主要工作係對國君進諫，將國君做錯既嘢，講返俾佢聽，同埋規勸佢，令佢改正錯誤。

春秋初年既時候，齊桓公就開咗大諫呢個位，係最早既諫官。晉國既中大夫、趙國既左右司過、楚國既左徒，工作性質都係屬於諫官。

根據《後漢書·百官志二》：「秦代置諫議大夫之官，專掌議論」，秦朝既諫議大夫可以歸納喺九卿裏面既郎中令，有幾十人咁多。

漢朝既諫官叫做光祿大夫、太中大夫、諫大夫、中散大夫、議郎等。呢啲官都係國君既近臣，奉國君既詔命做嘢。

到咗東漢，諫官叫做侍中、中常侍，係正式既官職。隋朝將侍中呢個位改名做納言，武則天主政既時候增加咗左、右拾遺同埋左右補闕呢啲有諫官作用既位。

喺三國到南北朝期間，諫官既作用比較微弱，有時呢個職位甚至係形同虛設。

宋朝將補闕呢個位改名做司諫，拾遺呢個位改名做正言，而且設置諫院，左右諫議大夫係諫院既長官，佢既下屬既官職係司諫同埋正言。

宋朝之後，諫官呢個位其實已經係名存實亡，甚至係連職位都取消埋。

簡單啲講，古代既諫官制度可以話係：源於春秋，興於秦漢，弱於三國，盛於唐宋，廢於元明。

重要性

根據《孔子家語·子路初見》，孔子講過「為人君而無諫臣則失正」呢句名言，可見諫官既重要性。而《白虎通·諫諍》講朝廷職官既時候，提到「設輔弼，置諫官」，可見諫官俾睇成同左、右丞相有相同重要性既官職。 司馬光喺《諫院題名記》提過：「夫以天下之政，四海之眾，得失利病，萃於一官使言之，其為任亦重矣。居是官者當志其大，捨其細，先其急，後其緩，專利國家而不為身謀」。 可以見到，諫官都係正直、不偏不倚，好勇敢咁將佢哋發現既朝政弊端能，準確而且及時咁同國君講，避免國君出於獨斷獨行、專橫獨裁，而對國家面對既問題產生咗嚴重既誤判，導致佢做出錯誤既決定。

資訊其實好重要，同依家既社會唔同，古代想收集資訊比較困難。當國君能夠廣開言路，就可以有多啲既人向佢進諫，佢就可以耳聰目明，從得到既資訊裏面權衡利弊，從而做出最好既決定。 從歷史角度睇，春秋初年既各個國家、漢武帝、唐太宗都係比較鍾意廣納諫言既人，而國君、皇帝善於納諫，對國家既發展，革故鼎新，持續繁榮都有貢獻；相反，春秋之前既商紂王、周朝既周厲王、隋煬帝楊廣，呢啲都係比較專制、橫蠻既領袖，唔願意聽勸諫，所以好容易引起民變或者政變。好似《東周列國誌》所講既周厲王，佢「暴虐無道，為國人所殺，此乃千年民變之始。」

春秋時期既文學家左丘明寫既一篇散文《召公諫厲王弭謗》裏面講周厲王既故事：

「厲王虐，國人謗王。」
「召公告王曰︰『民不堪命矣！』王怒。得衛巫，使監謗者。以告，則殺之。國人莫敢言，道路以目。」
「王喜。告召公曰︰『吾能弭謗矣，乃不敢言！』召公曰︰『是障之也。防民之口，甚於防川。川壅而潰，傷人必多，民亦如之。是故為川者，決之使導；為民者，宣之使言。故天子聽政，使公卿至於列士獻詩，瞽獻曲，史獻書，師箴，瞍賦，矇誦，百工諫，庶人傳語，近臣盡規，親戚補察，瞽史教誨，耆艾修之，而後王斟酌焉。是以事行而不悖。民之有口也，猶土之有山川也，財用於是乎出；猶其有原隰衍沃也，衣食於是乎生。口之宣言也，善敗於是乎興。行善而備敗，所以阜財用衣食者也。夫民慮之於心，而宣之於口，成而行之，胡可壅也？若壅其口，其與能幾何？』」
「王弗聽。於是國人莫敢出言。三年，乃流王於彘。」

周朝既周厲王好專橫、殘暴，國民都指責佢係暴君。召國既國君召穆公講俾厲王聽：「國民已經忍受唔到你既暴政！」厲王聽咗之後好嬲，搵咗個衞國既巫師，派佢暗中監視啲敢喺背後講佢既人，將啲講佢壞話既人殺死。住喺國都既人都唔敢隨便講嘢，行街既時候遇見熟人，大家都只係用眼神交流，唔敢傾偈。

周厲王對於呢個現象，覺得好開心，仲同召穆公講：「我有能力制止啲人講我壞話，國民再唔敢出聲鬧我。」召穆公話：「你咁樣做只可以塞住人哋把口，阻止國民講嘢既危害，遠遠超過咗堵塞住啲河川既危害。河道因為堵塞咗會造成決口，就會傷害到好多人。如果塞住國民把口，後果亦都會咁。所以，治水既人只能疏通河道，令到河道暢通，治民既人只能夠開導佢哋，等佢哋可以暢所欲言。天子處理政事既時候，俾上至三公九卿，下至各級官吏，都可以進獻一啲諷喻既詩，樂師可以進獻一啲民間樂曲，史官可以進獻一啲有借鑑意義既史籍，教師可以誦讀箴言，盲人可以吟詠詩篇、誦讀諷諫之言，建築工匠可以進諫，平民可以將自己既意見轉達俾君王，近侍既臣子要盡力規諫，君王同埋同宗都能夠彌補不足、監察國王既過失，樂師同埋史官用歌仔、史籍加以諄諄教誨，德高望重既師傅可以進一步勸誡。天子聽咗各人既意見之後，斟酌取捨，然後付之實施。咁樣，國家既政事先可能得以實行，而又唔會違背常理。國民有口，就好似土地上有山水一樣，社會上面既物資財富全靠佢哋出產；又好似高原同低地都有平坦肥沃既良田一樣，國民既衣食物品，全靠佢哋產生。所以國民發表言論，可以令到君主喺政事方面既成敗得失可以睇得見。國民認為係好既嘢，就盡力去實行，國民認為係失誤既嘢，就要諗辦法預防，咁樣先至係增加衣食財富既途徑。國民將內心諗既嘢講出嚟，咁樣內心既想法就會自然咁流露出嚟，點可以將人哋把口塞住呢？如果隔硬將國民既口都塞住，咁樣贊成既人可以有幾多呢？」不過最後周厲王都無聽到，後尾，國民再都唔敢公開發表言論，指出佢既問題。過咗三年，啲人終於頂唔順，將呢個暴君放逐咗，唔俾佢返嚟。

意思

「諫」呢個字，包含咗好多意思，最主要既意思係「直言以勸正」。高田忠周先生講過：「《周禮》『司諫』注：『諫，猶正也。』以道正人，蓋言說正道也。其言也不可不柬擇焉，諫之言柬也。」佢既意思係「諫」係表示以善言去勸戒，有規諫、勸諫既意思。