貝斯剛尼

貝斯剛尼（Silvio Berlusconi，1936年9月29號—），大陸叫貝盧斯科尼，係意大利前總理，亦係意大利球會AC米蘭嘅班主。

生平

貝斯剛尼喺意大利米蘭出世，入過大學讀法律。佢後生嗰陣成立咗建築工程公司同埋投資公司，專門搞投機生意。1980年貝盧斯科尼成立咗第一間意大利全國性私人電視台Canale 5，後尾重收購歐洲好多電視台，一時間佢成為咗傳媒大亨。

佢因為越嚟越有米，1994年佢開始投身政壇，成立咗意大利力量黨，同一啲右翼政黨結盟，贏咗1994年3月嘅選舉，當選總理。但喺1995年1月17號因為同盟成員內訌而解散。到2001年5月13號貝盧斯科尼又當選總理。

佢喺任內好多古靈精怪嘢搞，成日發表啲怪言論，一般人都將佢當做小丑看待。而且因為靠投機生意發達，貝盧斯科尼嘅背景一直係外界焦點。佢同佢嘅政府成日都被指貪污，好似2006年3月10號貝盧斯科尼就受到米蘭檢控當局有關貪污嘅起訴。而佢無耐落台，咁就係因為2006年4月佢領導嘅聯盟喺選舉度慘敗。2008年4月14號，佢領導嘅聯盟又贏得選舉，於是第三度坐上總理寶座。

2009年12月13號，佢喺米蘭一個政治集會畀人襲擊，塊面受傷，送咗去醫院留醫。

貝斯剛尼喺第三次執政後期因為歐洲債務危機而失去支持，佢喺2011年11月12號宣佈辭職。

AC米蘭

貝斯剛尼喺1986年收購AC米蘭。佢一手打造咗幾個冠軍，包括7屆意甲聯賽冠軍，同埋5屆歐洲聯賽冠軍盃冠軍。