費雪失控
 | 呢篇文 需要熟悉呢方面嘅人幫手寫。 |
費雪失控（粵拼：fai3 syut3 sat1 hung3；英文：Fisherian runaway）係有關性選擇嘅一個諗頭，指緊一種動物擇偶嗰時鍾意對象有某種有礙生存嘅特徵，令到後代嘅好多個體都喺生存上有困難。呢個諗頭係由廿世紀英倫生物學家羅納德·費雪提出嘅。
概論[編輯]
内文：性選擇
想像而家有一種雀鳥，公啲羽毛平均色水鮮艷過乸嘅少少，乸因為某啲緣故而開始偏好羽毛色水鮮艷嘅公—例如羽毛色水鮮艷令到公比較易畀捕食者睇到，可以做一種誠實訊號，話畀啲乸知「我身手好好，孭住啲噉嘅羽毛都生存到」—於是就會令色水鮮艷嘅公求偶成功度高咗（生到嘅後代數量多咗）；噉亦表示，下一代嘅公平均嚟講會顏色鮮艷過上一代嘅，如果呢種訊號係誠實嘅（色水鮮艷啲嘅公真係飛得快啲或者靈敏啲），呢種情況對乸嚟講都有利，表示佢哋生到嘅後代質素高咗，即係「偏好鮮艷羽毛嘅公」嘅乸進化上嘅成功度都會高咗；如是者，情況就開始失控—隨住一代一代嘅變化，乸愈嚟愈喜好自己伴侶鮮艷羽毛，同時啲公又變到愈嚟愈鮮艷[1]。
呢種情況仲可能會搞到一個群體嘅適應能力突然暴跌：例如啲公鬥鮮艷鬥到咁上下，佢哋迴避捕食者嘅能力跌到落去某個點以下，於是乎有大量嘅公畀捕食者殺死，就可能會危害成個物種存活[1]。
|
