賀歲盃
賀歲盃（英文：Lunar New Year Cup）係香港足球總會舉辦多年嘅傳統足球賽事，通常喺每年農曆年初一同年初四舉行，係慶祝農曆新年嘅節目之一，曾經係香港球壇一年一度嘅盛事。
歷史
[編輯]喺第二次世界大戰前後，賀歲嘅足球賽事都係以埠制賽為主。1950年起，香港足球總會改為邀請一隊或者多過一隊世界級球隊到香港獻技。喺1982年或之前，每年嘅賀歲足球賽事都係習慣安排上演三場比賽，分別由香港足球代表隊或者港聯出擊頭關或者第二關，而尾關則由華聯把守。
1983年起，賀歲足球比賽搵到主要嘅贊助商，自此每年改為邀請三隊外國球隊到香港獻技。而1983年嘅賀歲足球比賽就係第一屆賀歲盃。喺1993年至2007年期間，香港足球總會都係邀請國家隊到港。2008年，冇咗主要贊助商，新任足總主席梁孔德再次將邀請對象改為外國球會，應邀嘅球隊包括南韓蔚山現代、克羅地亞夏德同烏拉圭彭拿路。
2020年嗰屆因為武漢肺炎疫情影響而取消。
