走西口

  想搵第二個意思嘅話，請睇走西口 (搞清楚)。

走西口地圖

走西口（粵拼：zau2 sai1 hau2）係清代到民國時河北、山西、陝西人移民內蒙古中部地區嘅移民潮，同落南洋、闖關東合稱爲清朝三大移民潮。呢場移民潮分兩波，民國初年時內蒙漢人達300萬。

所謂「西口」

「口」係指明長城嘅關口，原先係軍防重地，喺大明同蒙古通關互市之後，變成漢蒙貿易通商口岸，其中有兩處最緊要，一個係河北張家口，稱爲「東口」；遞個係山西右玉縣嘅殺虎口，稱為「西口」。不過喺走西口嘅過程中，「西口」唔係殺虎口嘅專稱，而係張家口以西、晉北陝北同內蒙嘅長城沿綫各口，呢啲都可以叫做「西口」。

史

前史

明代前半期，畀朱元璋逼退漠北嘅北元一直同明朝敵對，長城地方一直戒備。1571年，蒙古土默特部首領俺答汗同明朝達成隆慶合議，漢蒙之間先通關互市，喺長城地方交易。呢陣時就有一啲內地唐人私自出長城去蒙古做生意。

清兵入關之後，將蒙古人睇成係同盟，於是想隔開蒙漢，所以封禁蒙古，唔准漢人自己出關入蒙，而且沿住長城北面劃咗南北闊五十里、東西長兩千里嘅禁區，禁區內唔準耕田、遊牧，年年燒荒，所以禁區內嘅泥好肥，變成咗黑土，畀啲人嗌做「黑界地」。

不過唔同封禁滿洲咁嚴格，順治曾經畀小批嘅冀晉陝農民去蒙古墾荒，不過必須春去秋回，唔准喺長城北定居，亦唔准帶家眷，所以蒙古地方始終係蒙地。從明朝後期到清初，就有唐人去蒙古，不過未成為移民潮。

第一波浪潮

喺康熙時，社會穩定，人口增加，尤其係康熙推行攤丁入畝，話「滋生人丁，永不加賦」，人口就爆炸增長，人多地少越來越明顯，呢時朝廷放鬆蒙古封禁，畀部分蒙地開墾，於是內地唐人大規模移民出去。

第二波風潮

從光緒到民國時，中國內憂外患。1901年，中國簽《辛丑條約》，其中規定中國要畀巨額賠款，清廷爲咗籌款，全面放禁蒙古，然後墾荒農民要交「押荒銀」，畀咗錢就可以有土地永久使用權，史稱「清丈土地」。同時沙俄北方壓境，攞咗中國嘅外東北、外西北，中國嘅對策係「移民實邊」，號召內地百姓移民邊疆，於是有好多唐人過咗去。

地理原因

走西口移民最多係山西嘅西部、北部同陝西北部，呢帶屬黃土高原，環境認真差：植被少，地赤，多災。光緒初年發生咗場丁戊奇荒，旱災多年，好多地方種唔到嘢，各地饑荒。有山西民歌唱「河曲保德州，十年九不收，男人走口外，女人挖野菜」。

而內蒙古嘅河套平原就喺隔籬，淨隔咗條長城，反而一馬平川，地力好，水草茂，至關鍵係地廣人稀，所以有大把晉陝災民湧入呢度。主要有歸化城（呼和浩特）、伊克昭盟（鄂爾多斯）、烏蘭察布、包頭、巴彥淖爾。

影響

晉商同內蒙城市化

大多數移民係農民，去到耕田，亦有係商人，晉商係中國大商幫，有好多就係起家自旅蒙貿易。

康熙年間蒙古就有晉商，最初嘅晉商係跟住平定準噶爾叛亂嘅清軍做隨軍貿易，之後就同沿途嘅蒙古人交易。

政策放鬆之後，越來越多晉商去蒙古，比如乾隆年間有名嘅晉商喬貴發就係後生時移民包頭，先係做當舖夥記，十幾年後搵着啲錢同老友開間商號「復盛公」，之後成為包頭最大嘅商號。有好多內蒙城市係發展自晉商貿易地，比如包頭就有講「先有復盛公，後有包頭城」，而呼和浩特亦類似，佢係貨運重地，亦都係晉商嘅活動之下發展爲內蒙商業中心同大城市。

走西口亦都改變咗山西文化，令佢喺農耕文化當中多咗啲商業文化。

山西文化傳佈

走西口嘅移民源地基本上都係晉語區，所以今日內蒙古中部地方雖然係蒙古自治區，不過當地查實係講晉語嘅，大約有晉語張呼片、五臺片、大包片，都同山西同聲同氣。

因為語言一致，所以佢哋同山西、陝北人屬同一族群，叫做晉綏民系，「晉」係指山西，「綏」係指內蒙古中部。

蒙地漢化

中國歷史上長期以來，長城係漢地嘅北界，胡漢之間長期喺長城拉鋸，闖關東、走西口，令唐人嘅分佈過咗長城。今日滿洲變成東三省，係名副其實嘅漢地，而內蒙古雖然叫自治區，查實好多地方漢人嘅比重大過蒙古族，不過後來中共建制時有蒙古族武裝力量支持，同時蒙古武裝領袖烏蘭夫提出要恢復蒙古族嘅歷史地域範圍，於是就設立咗內蒙古自治區。

喺設自治區之前，呢啲地方其實係設省，因為走西口形成嘅就有兩個：察哈爾省、綏遠省，內蒙古中部之所以嗌「綏」，就在於綏遠。而今日一啲內蒙城市，查實係有唐名，比如呼和浩特嗌「歸綏」。

出面網頁

• 走西口創造了西口文化
• 走西口漫談