落南洋

出自維基百科,自由嘅百科全書
Jump to navigation Jump to search

落南洋粵拼lok6 naam4 joeng4*2)係唐人因打工、做生意等落南洋定居嘅移民現象,作為熱潮係指清末到民國初嘅移民潮,同闖關東走西口合為清朝三大人口遷徙。落南洋熱潮大概持續咗一個世紀,截至日本侵華前,大約有1300萬人過去南洋,以廣東、福建人最多,最多去泰國印尼大馬星架坡菲律賓

南洋定義[編輯]

南洋係晚清以來唐人對東南亞嘅稱呼,嗰時啲人習慣將中國做天下中心,按方位將同中國交往嘅外國地方籠統分為四個洋。東洋就係日本,西洋指歐美,北洋係渤海、黃海同朝鮮半島周邊,南洋就係今日東南亞嘅大馬菲律賓印尼,廣義上南洋重包括澳洲紐西蘭呢啲地方。

[編輯]

同闖關東、走西口比,落南洋作為潮流開始得晏,但作為現象就出現得好早,可以追溯到漢朝

晚清之前[編輯]

西漢時,一條從華南到東南亞、南亞嘅「通夷海道」就出現,除咗有使節來往,亦都有民間商人喺呢條航線上走動。噉商船呢有時會因為風浪啊、事故啊要埋岸滯留,啲船員就住落當地,時間耐咗就喺當地繁衍生息,呢班人就係南洋最早嘅唐人居民。

另外有啲人係因為政治原因而出走唐山、落南洋避難。

  • 唐末黃巢起義攻打廣州時,就有好多人要出走到印尼嘅蘇門答臘島避難。
  • 康熙年間,為咗隔絕鄭成功呢啲海外反清勢力同內地聯繫,朝廷多次頒行「遷界令」,要將沿海居民全數內遷幾十里地,有啲人唔想內遷於是流離失所,就落南洋。
  • 明清易代時,有啲遺民中嘅反清志士大規模南逃南洋,自居「明鄉人」。

晚清之後[編輯]

喺中國,清朝時人口劇增,地就咁多,結果有好多農民無地耕;鴉片戰爭後,國門大開,西洋商品大量流入廣東等沿海地區,衝擊當地經濟,越來越多人失業。

喺南洋,呢時都做曬西方列強殖民地鬼佬喺南洋開農莊、挖礦山、鋪路建築等要人力,為咗發展事業,鬼佬就睇啱咗中國有大把廉價勞工,於是就想爭取華工落南洋做勞工。

第二次鴉片戰爭後,朝廷承認華工出國合法,由於海禁放鬆,南洋大把就業機會,大棚人出埠搵食。除開打工,亦可以落南洋撈魚、經商。

不過當中有好多係「賣豬仔」過去,啲人話係招工,查實係拐賣、誘騙啲人去做咕喱。而清廷未重視過呢個問題,所以啲勞工畀人當豬仔運來運去,備受虐待,部船未埋岸有啲人就冇咗命。

影響[編輯]

落南洋嘅移民卒之喺當地落地生根,令漢族成為東南亞一個重要種族,中華文化亦都流傳到嗰度,乃至大馬同星架坡成為中華文化圈嘅一部份。

  • 唐人大多聚居,於是南洋有好多城市有唐人街,往往係一個城市中最繁華嘅地段。比如越南胡志明市嘅堤岸區通用粵語,號稱「小香港」,係當地最繁華嘅商業區;菲律賓嘅馬尼拉唐人街有60萬唐人,大多係福建人,閩南話係當地通用語。
  • 唐人喺南洋帶來咗全新嘅飲食,比如大馬出名嘅肉骨茶就係福建唐人嘅發明,個名就來自閩南話;星架坡嘅海南雞飯就源自海南島

落南洋亦都造就一批富商望族,比如菲律賓第一位女總統阿基諾夫人就係華裔,佢嘅許家喺當地係名門來嘅;香港影業大王邵逸夫嘅身家就係落南洋時起嘅,後來邵氏四兄弟開影業公司,後來公司困難,都係去南洋開市場來發達事業。

參考[編輯]