海南雞飯
海南雞飯係響世界各國出晒名嘅一道飯菜，好多唐人餐館都賣，原型係海南島嘅「文昌雞飯」。雞嘅做法同一般白切雞冇乜大分別，重點係碗飯，一定要以雞油雞湯去煲。海南雞飯係由海南人將文昌雞飯帶到去星馬演變出嚟同埋發揚光大，當地嘅海南雞飯通常都配酸辣醬、甜豉油同埋薑茸一齊食。
起源
[編輯]海南雞飯係源自海南島嘅文昌雞飯，關於呢個飯嘅歷史有好幾種講法。有人話佢係嚟自星加坡一位叫王義元（Wong Yi Guan）嘅人，佢1936年去到星加坡搵食，開始拎住個竹籮喺星加坡附近一帶叫賣，後唻有啲積蓄，就開始喺茶餐室入面開檔賣雞飯。因為王義元賣嘅雞飯好出名，慢慢就開始喺馬來半島各地流傳。
但根據馬來西亞嘅講法，最早將海南雞飯發揚光大嘅係嚟自海南島嘅梁居清，喺1920年代，佢開始喺馬六甲跟啲同鄉一齊學藝整雞飯，並且喺1930年代移居雪蘭莪嘅巴生開檔擺賣。
另外，喺吉隆坡蘇丹街有間好出名嘅海南雞飯店——南香，喺1938年開業，都有好耐歷史。
不過美食家蔡瀾喺《海南雞飯研究》提到：「海南雞飯該歸功於星加坡『瑞記』餐廳的老闆莫履瑞這個人。莫履瑞在二十世紀二三十年代從海南島到星加坡以賣雞飯為生，他與一般小販不同，用雙手提着兩個竹籠：一個裝雞，一個裝飯，圓圓胖胖的飯球頗有特色」。
同海南文昌雞飯嘅差異
[編輯]海南雞飯雖然係由海南嘅文昌雞飯演變而成，但係做法已有差異，已經演變成一種唔同料理。海南雞飯係將雞放入水浸熟，文昌雞係隔水清蒸而成，文昌雞嘅口感比海南雞飯濕潤。
香港特別行政區行政長官林鄭月娥喺2021年4月21號Facebook專頁講述出席博鰲亞洲論壇行程，貼文末段表示「我希望好快見到香港青年去海南實習、就業、創業，享受椰林樹影同港人鍾意嘅海南雞飯！」，引起咗星馬兩地網民強烈不滿。因為海南雞傳到東南亞發揚後，早已經涇渭分明，文昌雞同海南雞分庭抗禮，文昌雞傳到南洋後，兜兜轉轉就靠家鄉煮法賣雞，慢慢演變出海南雞飯，係當地華僑演變出嚟一種文化融合食物。
菜譜
[編輯]- Singapore Hainanese Chicken Rice from Let's get Wokking!
- Hainanese Chicken Rice Recipe from Rose's Kitchenette