越南高速鐵路

南北高速鐵路（粵拼：naam4 bak1 gou1 cuk1 tit3 lou6；越南文：Đường sắt cao tốc Bắc Nam／塘鐵高速北南），係越南一條打算起嘅高速鐵路，起點喺河內，終點喺胡志明市，沿途經過越南21個省市，包括河內、胡志明市同峴港；全長1,570公里，比舊有嘅南北鐵路短159公里，預期造價係558.5億美元，將會用日本同越南政府提供嘅政府開發援助嚟興建。

綜覽

響由日本同越南聯合成立嘅工程隊伍完成測繪同地理考察之後，越南南北高鐵嘅頭兩段：河內–榮市段同胡志明市——芽莊段，預定響2011至2015年嘅階段中落成啟用，而榮市——芽莊段預定會響2020年落成。越南政府話，越南嘅高鐵將會採用日本新幹線子彈火車嘅高鐵技術；呢條高鐵用嘅技術同路軌規格同現有嘅南北鐵路唔同，會係一條複線嘅標準軌鐵路，設定時速300公里，係現有南北鐵路時速嘅六倍。高鐵落成之後，乘客坐高鐵由河內去胡志明市嘅時間將會大大縮短至7個鐘，比坐現有鐵路由河內去到胡志明市所需32個鐘快。

喺越南政府總理阮晉勇響2006年到訪日本之後，日本政府承諾會提供政府開發援助，支援越南起高鐵。當時越南同日本政府共同簽署咗一份關於越南高鐵同北南高速公路工程嘅「諒解備忘錄」。

計劃再次評估

響2010年6月，越南國會經過一個月嘅審議，最終否決咗當時政府提出嘅高鐵計劃，據報道，國會否決提案嘅原因係高鐵預計造價為560億美元，造價太貴。當地一位資深經濟師曾經批抨高鐵計劃係「經濟上唔健全」嘅計劃，又表示高鐵起好之後，唔能夠為大部分越南人民服務，因為有百分之70嘅越南人都係住喺農村嘅農民。據報道，越南國會一啲議員要求越南政府對高鐵項目作出進一步嘅研究。去到2010年10月，越南交通部證實高鐵計劃被擱置。當時越南國營鐵路公司嘅主席話，越南政府會響2011年越南共產黨領導層換屆之後再提交一個新嘅高鐵計劃。越南政府副總理黃忠海響2010年10月一個同交通部進行嘅會議上面，檢討越南各地重要嘅交通基建項目嘅工程進展，據報道，佢又命令交通部成立一個指導委員會，接受日本為上述兩段高鐵線路而提供嘅技術援助。

日本國土交通省一個鐵路局局長表示，日本政府目前有意將日本嘅基建技術，例如新幹線，引入去經濟日益發達嘅地方，但係日本會將越南高鐵項目視為一個長期項目；響2010年8月嘅一次會談，佢又話現有嘅越南鐵路係未電氣化嘅單線鐵路，如果要由呢個階段邁進去發展高鐵嘅階段，越南需要吸納、培訓熟知鐵路技術嘅專業人才同制定適當嘅法例。