越秀山體育場

出自維基百科,自由嘅百科全書
Jump to navigation Jump to search
越秀山體育場
越秀山、觀音山
JyutSauSaanTaiJukCoeng.jpg
喺2015年2月13號影嘅越秀山體育場,嗰時廣州富力隊喺度打緊亞冠。
基本資料
前名 粵秀山公園運動場
位置 廣東廣州越秀區
越秀山鎮海樓南邊
業主 廣州市人民政府
草坪表層 草地
容納人數 18,000[1]
Construction
施工 1926年左近始建,1950年改擴建
啟用 1926年左近
建築師 陳炯明(1920年代)
葉劍英(1950年)
使用者
廣州富力足球會(2012年~而家)

 越秀山體育場粵拼jyut6 sau3 saan1 tai2 juk6 coeng4廣州市嘅一間體育場,喺越秀區越秀公園入面,鎮海樓嘅正南邊,應元路嘅東邊。呢個體育場三邊有越秀山圍住,凈係得南邊嘅路去到應元路嗰頭。北邊嘅幾個門口平時係唔對外嘅,凈係得足球場有大型比賽或活動嗰陣先至開畀人(重要有門飛先至可以入去)。呢間體育場見證南粵足球嘅興起同埋衰落,重俾人話係廣州人最有回憶嘅體育場(啫係廣州街坊話嘅「福地」噉解)[2]

歷史[編輯]

清代原先重係彈藥庫,到民國後,陳炯明時代規劃好搞成運動場地,1926年前啟用。命名粵秀山公園運動場,當其時重係泥地,設施較為簡陋。

喺1949年10月易幟後,嗰年嘅11月由於廣州市要辦「慶祝廣州解放文藝演出」,就要起間可以坐到成萬個觀眾嘅場地,最後就揀咗呢嚿荒廢咗好多年嘅舊泥地足球場,而呢個舊嘅泥地足球場係嗌過「觀音山足球場」嘅名。嗰度三面環山,東西長180幾米,南北闊83米,啱好搞到個群眾性大型活動嘅地區。

就喺1950年元旦,廣州市政府又組織咗好多個項嘅體育表演喺觀音山足球場度辦。而越秀山體育場就喺1950年3月開始逳手起喇,有成萬位廣州市民組成嘅義務勞動大軍,喺嗰陣時嘅廣州市市長——葉劍英元帥嘅號召嚟負責起嘅[3]。到咗1950年10月14號,越秀山體育場正式投入營運。嗰時啱好係辦到慶祝廣州解放一周年嘅廣州市第一屆人民體育運動會。到咗1953年,越秀山起咗個大型足球場同一條400米嘅跑道,而1956年嗰陣重整大咗個大門同埋東南、東北兩邊挾埋可以坐到28000觀眾嘅看台。

1957年11月7號,越秀山體育場辦咗紀念俄國十月革命40周年嘅文藝同埋煙花晚會,就喺19點30分到嘅5號門附近發生咗單嚴重嘅人踩人事件。因為啲差佬攔唔住出面想入場嘅觀眾,搞到場面失控,而門入面嘅梯形座位度,前面幾排人冚唪唥都俾後面衝入嚟嘅人壓到。呢單嘢有33個人死咗、16個人重傷、41個人輕傷[4]

文革嗰陣,廣州地區組織幾萬人參加嘅集會遊行、批鬥大會都喺呢度辦。

1972年8月17號,廣東隊同香港流浪隊喺越秀山體育場踢嘅比賽入面發生咗波迷喺上面跌咗落嚟壓冧下面看台嘅觀眾,搞到有死傷。呢單嘢係越秀山體育場入面,唯一一次冧看台。

2009年3月6號,越秀山體育場做過廣州醫藥(今日嘅廣州恆大淘寶)嘅主場。

1987年11月20號——1987年12月5號,第六屆全國運動會嘅足球比賽喺呢度辦過。

2001年11月11號——2001年11月25號,第九屆全國運動會嘅足球比賽喺呢度辦過。

2010年11月12號——2010年11月27號,第16屆亞運會嘅足球比賽喺呢度辦過。

2011年,由於越秀山體育場唔符合亞足聯畀嘅亞洲冠軍聯賽球場嘅標準,廣州恆大隊就將聯賽主場比賽搬到去天河體育中心嗰度,喺越秀山體育場入面凈係踢過2011年嘅中國足協杯比賽、預備隊比賽同埋二隊嘅比賽。就喺嗰年7月份,深圳鳳凰隊就嚟解散時俾富力地產收購咗,重喺2011年嘅中甲聯賽入面,波隊改咗名嗌廣州富力足球俱樂部,而波隊嘅主場都重係丼喺越秀山體育場度踢重一直用到而家。喺2012年嘅中超後半賽季,由於越秀山體育場按返亞足聯嘅標準嚟升級嘅關係,所以佢嘅主場比賽暫時搬咗去大學城體育場度。就喺嗰年10月,廣州富力足球俱樂部同埋廣州市體育局、廣州市足協、越秀山體育場快相關決策層商提咗份亞足聯嘅整改方案,其中廣州富力隊要負責起座位同VIP通道呢2項最緊要嘅嘢,雖然話足球會識喺水泥級度起個座凳,但凈係得18000個到,有可能要睇水嚟加差唔多20000個到嘅活動座凳出嚟。

喺2015年初,由於廣州富力隊入咗亞冠,結果呢個場地攞咗嚟做富力隊嘅亞冠主場,但係富力隊喺嗰度唔爭氣,三場主場正賽唔單止未贏過,重一球都入唔到。

設施[編輯]

呢間體育場係包括咗一個標準足球場同埋田徑跑道。而場上嘅梯級觀眾位係用水泥鋪出嚟嘅,從南向北嚟睇,一共劃開咗27個區,其中南邊同埋北邊嘅看台有頂棚,東邊冇看台,但係有好似座塔噉嘅門樓,佢係體育場嘅日常辦公場地。而呢間體育場先後喺1956年、1977年、1980年、1987年、1997年同埋2009年搞咗大規模嘅裝修,家陣嘅田徑跑道已經改咗係國際標準嘅105×68米嘅塑膠地跑道。而足球場嘅草皮方面,就係鋪住中國內地比較先進嘅「蘭引三號」。[5]而梯級觀眾位、電子顯示屏、功能房都搞咗下升級之外,重搞咗個流水噴泉入嚟。[6]

足球紀錄[編輯]

南看台23區嘅波迷陣

由於越秀山體育場長期都係廣州隊嘅聯賽主場。所以越秀山體育場嘅氣氛都幾火爆下,而呢個火爆喺中國內地係出嗮名。

1960年8月7號,嗰陣時嘅廣州足球隊同黎巴嫩嘅李星隊喺越秀山體育場度踢,結果廣州隊主場6-0狂炒李星隊,呢個紀錄係越秀山體育場踢嘅廣州隊,喺國際賽事入面最多贏波嘅記錄。

呢個足球場重出過好多位廣東省市同國家級嘅優秀運動員。尤其係中國足壇入面比較出名嘅南粵波星——楊菲蓀容志行古廣明趙達裕彭偉國胡志軍等都喺越秀山體育場入面踢過波先至出咗名。

2004年嘅中甲聯賽,廣州日之泉嘅主場比賽出現咗一個賽季未輸過波嘅紀錄。

2006年嘅中甲聯賽,廣州醫藥隊嘅平均入場人數甚至高過除咗山東魯能之外嘅冚唪唥中超聯賽球隊主場嘅平均入場人數,重喺2007年聯賽最後一輪入面,創咗越秀山體育場嘅入場記錄。嗰時每場比賽都有2個電視台同1個電台嚟搞直播,喺中國足壇入面好少見。其中體育場南看臺嘅23、24區重係波迷聯盟嘅年票區。[7]

2008年,嗰時廣州賽區嘅越秀山體育場俾中國足協列入年度中超最佳人氣賽區。

越秀山體育場重攞過廣東省優秀場館經營示範單位。[8]

附近嘅交通[編輯]

[編輯]

  1. "存档副本". (原先內容喺2015年2月4號歸檔). 喺2015年10月26號搵到. 
  2. "广州冲超十年磨一剑 越秀山体育场见证历史". 网易. 喺2009-03-06搵到. (簡體中文)
  3. "兴建越秀山体育场纪事". 广州文史. 喺2009-03-06搵到. (簡體中文)
  4. "五十年前的严重挤踩事故". 广州足球网. (原先內容喺2006-12-09歸檔). 喺2009-03-06搵到. (簡體中文)
  5. "越秀山体育场拟投2000万建瀑布喷泉". 《南方都市报》. (原先內容喺2007-09-26歸檔). 喺2009-03-06搵到. 
  6. "超千亿元亚运投资如何监管". 南方报业网. (原先內容喺2010-09-11歸檔). 喺2010-09-08搵到. 
  7. "中超颁奖-山东黄袍加身 上海外援荣膺最佳球员". 中國足協. 喺2009-03-06搵到. (簡體中文)
  8. "场馆介绍". 广州体网. (原先內容喺2009-03-28歸檔). 喺2009-03-06搵到. (簡體中文)

座標: 23°08′21″N 113°15′39″E / 23.13917°N 113.26083°E / 23.13917; 113.26083