踏莎行

踏莎行（莎讀梳、行讀恆，粵讀：daap⁶ so¹ hang⁴）係隻小令詞牌，58字，就似首七言律詩喺首聯同頸聯各添一字噉。相傳係北宋人寇準所創，個名源自唐詩「踏莎行草過春溪」。呢個詞牌開始時係寫春遊，後尾內容變成傷春感懷、悲嘆時光易逝。

其他名

有呢啲名：

• 柳長春（粵讀：lau⁵ coeng⁴ ceon¹）：趙長卿用過呢個名。
• 芳心苦（粵讀：fong¹ sam¹ fu²）：語出賀鑄用呢隻詞牌寫嘅詠荷名作，取自其中一句「紅衣脫盡芳心苦」。
• 踏雪行（粵讀：daap⁶ syut³ hang⁴）：《鳴鶴餘音》嘅用名。
• 喜朝天（粵讀：hei² ciu⁴ tin¹）：曹冠用名。
• 平陽興（粵讀：ping⁴ joeng⁴ hing¹）：賀鑄用過。
• 江南曲（粵讀：gong¹ naam⁴ kuk¹）：賀鑄用過。
• 芳洲泊（粵讀：fong¹ zau¹ bok⁶）：出自賀鑄本詞牌作品一句「蘭橈明夜芳洲泊」。
• 度新聲（度讀道，粵讀：dou⁶ san¹ sing¹）：出自賀鑄《江南曲》「紫簫閒捻度新聲」。
• 思牛女（粵讀：si¹ ngau⁴ neoi⁵）：賀鑄用過。
• 惜餘春（粵讀：sik¹ jyu⁴ ceon¹）：賀鑄用名。
• 陽羨歌（粵讀：joeng⁴ sin⁶ go¹）：賀鑄用名。
• 暈眉山（暈讀運，粵讀：wan⁶ mei⁴ saan¹）：賀鑄用名。
• 踏雲行（粵讀：daap⁶ wan⁴ hang⁴）
• 題醉袖（粵讀：tai⁴ zeoi³ zau⁶）：賀鑄用名。
• 瀟瀟雨（粵讀：siu¹ siu¹ jyu⁵）

踏莎行典故

隻「莎」字

香附（古時所講嘅莎草之一）

蓑衣

「踏莎行」隻「莎」字好易畀人讀成「沙 saa¹」，之所以讀「梳 so¹」，在於呢隻字意指「莎草」（讀so¹ cou²）呢類植物，呢類植物生喺濕地，田頭、塘基常見，莎草舊時用來整笠、蓑衣，啲雨打上面會疏而唔沾，所以民間又嗌「蓑衣草」「蓑草」。

先秦時啲人就識得莎草，但嗰時所謂嘅莎草係個樣都差唔多嘅濕地草類嘅通稱，唐宋時「莎草」收窄定義，指氣味清新、個樣優雅修長嘅種類，而且入埋詩文，比如生曬莎草嘅花園、石級讚佢做「莎庭」「莎階」。明朝時《本草綱目》先至將莎草確定爲香附，話「其根相附連續而生，可以合香」，條根入藥做香附子，醫塞滯。

古代文人春遊

古人有春遊習俗，主要係喺屋企匿咗一冬，啲人就出去行下。文人士大夫素有「曲水流觴」宴飲作樂嘅傳統，從魏晉開始，啲人祭完上巳節，就會坐喺水邊，將酒杯放落條溪，隻杯漂咗去邊個度，邊個就要飲曬杯酒。呢個習俗一直流傳到唐宋，就加咗一項吟詩對舉，吟嘅題目大多數係春日風光。《踏莎行》嘅詞牌就係寇準玩呢隻遊戲時所創嘅。

作者其人共創作

寇準係北宋名相，性格爽朗不羈、敢作敢爲，佢試過逼宋真宗留喺宋遼戰場，最終打贏場仗，亦試過皇帝嬲嬲哋要走時扯住龍袍要皇帝聽完佢進諫，因為太忠直，就貶咗做知州，詞牌就係佢貶斥期間春遊作嘅，但無話顯得好激憤噉樣。

寇準作牌時用嘅係唐人陳羽「踏莎行草過春溪」嘅意象，來應眼前春遊嘅景色。詞牌嘅名、曲調都係佢作嘅。第一篇作品雖然係寫春景，不過最後兩句「倚樓無語欲銷魂，長空黯淡連芳草」意境淒涼，所以後來呢個詞牌就經常寫感傷悲嘆的內容。

格式

正格係上下兩闕各三仄韻，要求各闕頭兩句對仗。

仄仄平平，平平仄仄，平平仄仄平平仄。平平仄仄仄平平，平平仄仄平平仄。

仄仄平平，平平仄仄，平平仄仄平平仄。平平仄仄仄平平，平平仄仄平平仄。

有轉調踏莎行，爲雙調64字或66字，押仄聲。

名作

• 秦觀《踏莎行·郴州旅舍》

霧失樓臺，月迷津渡，桃源望斷無尋處。可堪孤館閉春寒，杜鵑聲裏斜陽暮。

驛寄梅花，魚傳尺素，砌成此恨無重數。郴江倖自繞郴山，爲誰流下瀟湘去？

• 寇準

春色將闌，鶯聲漸老，紅英落盡春梅小。畫堂人靜雨蒙蒙，屏山半掩餘香裊。

密約沉沉，離情杳杳，菱花塵滿慵將照。倚樓無語欲銷魂，長空黯淡連芳草。

• 賀鑄

楊柳回塘，鴛鴦別浦，綠萍漲斷蓮舟路。斷無蜂蝶慕幽香，紅衣脫盡芳心苦。

返照迎潮，行雲帶雨，依依似與騷人語。當年不肯嫁東風，無端卻被秋風誤。

參攷

• 詞牌踏莎行介紹 古詩文網