臨江仙
臨江仙（粵音：lam4 gong1 sin1）係隻中調詞牌，雙調60字，有時句式、字數會變。原先係唐教坊曲，五代時確定格律同調式，牌下詞作大多寫傷春、別離苦恨、緬懷舊事。
遞啲名
[編輯]有以下：
- 謝新恩（ze6 san1 jan1）：李煜用過呢個名。
- 雁後歸（ngaan6 hau6 gwai1）：語出賀鑄「人歸落雁後，思發在花前」。
- 畫屏春（畫讀話，waa6 ping4 ceon1）
- 庭院深深（ting4 jyun2 sam1 sam1）
- 採蓮回（coi2 lin4 wui4）：賀鑄用過呢個名。
- 想娉婷（娉婷讀乒庭，soeng2 ping1 ting4）：亦係賀鑄用名。
- 瑞鶴仙令（seoi6 hok6 sin1 ling6）
- 鴛鴦夢（jyun1 joeng1 mung6）
- 玉連環（juk6 lin4 waan4）
典故
[編輯]琴高
[編輯]「臨江仙」呢隻詞牌嘅曲調原先係唐朝嘅教坊樂曲，呢支曲唱嘅係琴高呢位水中仙人，到五代時確立爲詞牌，啲人就從民間詞集《敦煌曲子詞》中一句「岸闊臨江底見沙」，幫佢起名做「臨江仙」。
據漢籍《列仙傳》，就話戰國時期有個人精通音律，善於撫琴，世人唔記得佢嘅本名，祇嗌佢做「琴高」。話琴高係修道之人，身懷長生不老之術，喺冀州、涿郡一帶遊歷兩百幾年。有朝一日佢心血來潮，想潛落涿江捉龍子，臨行前同弟子約咗相見日子時辰，要喺水邊裝香等佢。時辰一到佢騎住一條大鯉魚返咗來。喺陸上留咗個把月，又騎鯉魚返條江度，唔再現身人間。
李商隱有句詩，「水仙欲上鯉魚去，一夜芙蓉紅淚多」，講嘅就係呢個典故。
水仙子
[編輯]
正因為曲調來歷同仙人相關，呢個詞牌創立之初所作嘅詞都同水仙相關，比如洛神、湘妃。
比如湘妃，相傳三皇五帝時，堯將自己兩個女娥皇、女英嫁畀繼位嘅舜。舜係明君，後來南巡時染沉痾而死，葬喺九嶷山（喺湖南永州），娥皇女英奔喪，見到係噉喊，啲眼淚留喺竹度，成為斑竹，又叫湘妃竹、淚痕竹。[1]
後來晏幾道將呢隻詞牌搦去寫美人，將心思嘅歌女小蘋比作仙女，抒發自己嘅記掛，自此從北宋到南宋，「臨江仙」嘅作品唔再得修仙、靚女呢啲題材開始有抒發心緒、緬懷過去嘅作品。而家「臨江仙」詞作中最廣爲流傳嘅係明代文人楊慎嘅懷古之作，因為呢首詞氣象雄渾，重有一種對歷史興衰嘅超然，畀羅貫中揀做《三國演義》開場白，自此流傳出去。
格式
[編輯]上下闋各五句，上下闋各三平韻，一韻到底。
- 仄仄平平平仄仄，平平仄仄平平。平平仄仄仄平平。平平平仄仄，仄仄仄平平。
- 仄仄平平平仄仄，平平仄仄平平。平平仄仄仄平平。平平平仄仄，仄仄仄平平。
作品舉例
[編輯]- 夢後樓臺高鎖，酒醒簾幕低垂。去年春恨卻來時。落花人獨立，微雨燕雙飛。
- 記得小蘋初見，兩重心字羅衣。琵琶弦上說相思。當時明月在，曾照彩雲歸。
- 煙收湘渚秋江靜，蕉花露泣愁紅。五雲雙鶴去無蹤。幾回魂斷，凝望向長空。
- 翠竹暗留珠淚怨，閒調寶瑟波中。花鬟月鬢綠雲重。古祠深殿，香冷雨和風。
- 夜飲東坡醒復醉，歸來彷彿三更，家童鼻息已雷鳴，敲門都不應，倚杖聽江聲。
- 長恨此身非我有，何時忘卻營營，夜闌風靜縠紋平，小舟從此逝，江海寄餘生。
- 滾滾長江東逝水，浪花淘盡英雄。是非成敗轉頭空，青山依舊在，幾度夕陽紅。
- 白髮漁樵江渚上，慣看秋月春風。一壺濁酒喜相逢，古今多少事，都付笑談中。
註、攷
[編輯]- ↑ 湘妃竹因為佢嘅圖案好靚所以作觀賞植物，兼做器具材料。竹嘅雲紋紫斑嘅形成未有定論，目前認為係竹筍受真菌侵蝕形成嘅菌斑。