醋酸

醋酸結構

醋酸（CH₃COOH），又叫乙酸，係一種有機化合物，被公認係食醋內酸味同刺激性氣味嘅來源。

醋酸係一種部分電離嘅酸，溶喺水嗰時，只有少量H⁺電離子出，所以算係種弱酸。

合成

氧化

可以透過氧化乙醇或者乙醛生產醋酸。當中可以用重鉻酸鉀來做氧化劑。過程中要回流加熱。

發酵

可以以醋杆菌屬嘅細菌氧化酒入面的乙醇，變成醋酸。通常係用蘋果酒同葡萄酒同麥芽、米等搞碎發酵。

反應

乙酸係一種羧酸，有酸嘅通性，可以同金屬或者鹼反應。亦會同碳酸鹽或碳酸氫鹽反應，產生乙酸鹽、二氧化碳同水。

渠係羧酸，所以可以俾人還原，可以用硼氫化鈉或者氫化鋁鋰做還原劑，出乙醇。渠仲可以同醇類發生酯化反應，產生相應嘅乙酸酯。例如乙酸同乙醇反應，用濃硫酸催化，加熱，可以出乙酸乙酯。

仲有，醋酸可以先同三氯化磷反應，再同氨反應，產生乙酰胺。

用途

有機合成

醋酸會同好多嘢反應，產生唔同嘅化合物。好似乙酸乙酯、乙酸丁酯等咁，渠可以用做有機溶劑等。仲有，兩分子嘅醋酸可以脫水生產乙酸酐，乙酸酐喺工業好重要，一般用去乙酰化。

食物

醋入面就有醋酸。醋可以用來調味，或者用去醃嘢。醋酸會加落唔同食物裏面，去增加酸味。有種乙酸鹽叫乙酸鈉，係一種調味料，可以加入食物度。

溶劑

醋酸係一種有機溶劑，但由於渠包含羧基，因此渠帶有極性。渠可以溶解好多化合物，亦可以用作重結晶嘅溶劑。