野比大雄

出自維基百科,自由嘅百科全書
跳去導覽 跳去搵嘢
野比 大雄
日文原名野比 のび太(のび のびた)
配音Flag of Japan.svg太田淑子小原乃梨子大原惠
Flag of Hong Kong.svg曾慶珏盧素娟曾慶珏陸惠玲
簡介
第啲名大雄
年紀10歲
性別
星座獅子座
身高140cm
體重45kg
出世8月7號
日本東京都練馬區
國籍Flag of Japan.svg 日本
職業小學生
屋企人亞爸:野比大助
亞媽:野比玉子
資料
鍾意嘅嘢晏覺、玩花繩、射擊
拿手嘢考試食蛋、遲到
老婆靜香(第時)
仔女野比雄助(第時)

野比大雄粵拼je5 bei2 daai6 hung4日文野比 のび太,8月7號—,舊譯葉大雄、野比太、大寶等等)係日本漫畫多啦A夢嘅虛構角色,野比大助野比玉子個獨生仔。唔鍾意返學,體育更加係一塌糊塗。不過,佢有愛心、重感情、有義氣、槍法了得、玩花繩好勁。成日俾胖虎蝦。大個同源靜香結婚。

介紹[編輯]

住喺日本東京都練馬區嘅月見台鈴木原道,雖然時代改變緊,但係佢一直以東京小學生嘅身份出現,永遠都係十歲。

缺點[編輯]

  • 頭腦唔好,考試攞零分多過食飯,得兩次喺算術測驗攞到100分[1][2],佢覺得只要攞到十分就好滿足[3],攞30分,佢阿媽就好開心[4],但係,喺佢媽媽差嗰陣,考50分媽媽反而覺得好平常。同得85分就畀佢媽鬧嘅靜香形成鮮明對比[5],平均每五次考試就有一次係零分[6](有啲版本係每十次考試三次零分),到咗後期有好轉,每十次考試一次零分[7],都算有啲進步,連自己嘅名都會寫錯,成日將野比のび(「」字喺日本係三年級漢字)寫成野比のび(「」字喺日本係一年級漢字)。
  • 運動能力極差。成日因為接唔實棒球胖虎鬧,因此胖虎安排大雄喺棒球比賽入邊做執波嘅角色。其他運動都好差,例如跳箱經常跳唔過,跑步都好慢。
  • 懶,因而成日俾父母老師鬧
  • 依賴多啦A夢,每次受委屈或畀人蝦就即刻返屋企對住多啦A夢扭計,重成日用多啦A夢嘅法寶整蠱人,甚至得意忘形,因此成日招來團團圍剿,自食惡果。
  • 唔識反省。每次用多啦A夢借畀佢嘅法寶,都鑊鑊新鮮鑊鑊金,但係仍然唔肯。
  • 成日欠交功課,因此經常被老師要求去走廊罰企。欠交功課嘅原因係唔記得或唔想做功課。佢做功課好難持之以恆,最長時間為48分23秒,最短時間為3分30秒。
  • 成日遲起身,搞到返學遲到。
  • 睇到唔係漫畫嘅書就會腦筋混亂、頭昏眼花。
  • 偷睇靜香沖涼。
  • 鍾意嫉妒人哋,特別係小夫,成日因為睇唔慣小夫嘅曬命而要多啦A夢攞道具出嚟幫佢。
  • 成日不問自取,特別係未來百貨公司送錯畀多啦A夢,放喺房等候退回嘅道具。

優點[編輯]

  • 心地本為善良,並樂於助人,對動植物同玩具都好有同情心(有例外),曾願意放棄自己嘅禮物,換取人哋嘅快樂[8],有時會用多啦A夢嘅法寶行俠仗義。
  • 擅長結繩花射擊(射擊命中率接近100%,係一名好有天賦嘅神射手;識好多結繩花嘅花式,重識得自創花樣)。
  • 愛護大自然,關愛小動物同植物。因此就算佢阿媽唔畀佢養寵物,佢有時都會偷偷將受傷嘅小動物帶返屋企照顧。
  • 漫畫好有眼光,只要係畀佢讚有趣嘅作品,日後都會成名[9]
  • 多啦A夢大長篇嘅緊要關頭,通常表現得勇敢、突出。
  • 有時都會嘗試發奮圖強,嘗試自己去面對困難。雖然只維持咗好短時間,但係都可以睇到佢發奮嘅心。

興趣[編輯]

  • 玩花繩好叻,好有研究。經常自創唔同嘅花式,五花八門。並希望得到朋友嘅認同,但係通常都冇受到重視。所以成日攞多啦A夢嘅道具嚟宣傳自己嘅花繩枝術。
  • 好鍾意射擊,平時會用文具(例如鉛筆)嚟練習。命中率超高,接近100%。喺大長編或其他冒險中,危險關頭通常係因為佢射擊嘅高命中率起關鍵作用。
  • 鍾意睇漫畫,會因為睇漫畫而唔做功課,上堂期間都會偷偷睇漫畫。


參考[編輯]

  1. 第25卷「什,什麼!!大雄得了100分!!」
  2. "「趕走外星人!」(18:37/21:29)". 喺2011-06-14搵到.
  3. 第28卷「危險!小夫的答案」
  4. 第20卷「幸運丸」
  5. 第21卷「快活大道」
  6. 第23卷「學校轉來一個差生」
  7. 第42卷「鑽進去吧!蛤蜊箱」
  8. 「好事積分卡」結尾
  9. 第37卷「大人氣!克利斯丁·胖妹老師」