釣魚台列嶼

釣魚台列嶼位置

1910年，喺島上做嘢嘅日本人同支日本國旗合照。

 釣魚台列嶼（粵拼：diu3 jyu4 toi4 lit6 zeoi6） ，北京政府叫做釣魚島及其附屬島嶼，日本名尖閣諸島，琉球文就叫佢做「魚國久場島」，係東海群島，喺台灣東北140公里、琉球石垣西北170公里，依家由日本政府實際控制住，但中華民國同中華人民共和國政府都認為佢係附屬台灣嘅島，主權應該歸中國。列嶼中包括釣魚台、黃尾嶼、赤尾嶼、南小島、北小島同埋周圍嘅一啲岩礁，都位於中國大陸同台灣本島所處嘅大陸架邊緣，總陸地面積大概係6.1636-7平方公里，主島釣魚台面積喺3.82-4.38平方公里之間起落（潮差變化），高363米。

釣魚台列嶼啲泥唔係幾厚、風浪比較大，得主島釣魚台上有淡水溪流。1896年去到1940年期間曾經有日本人喺島上面開海產加工廠，1909年最多人嗰陣有成248個人住喺島上面，但1945年之後啲人走曬，家下全部都係無人島。1955年開始，美國政府向琉球政府同埋古賀善次簽咗份租約，每年俾2500萬日圓借黃尾嶼、赤尾嶼嚟做美國海空軍訓練演習場地。1970年7月，琉球政府喺各個島都棟咗塊警告牌，警告啲人無攞批准嘅話唔准上岸。

名

釣魚台嘅航拍相（日本國土交通省1978年影）

官方文件中，呢個群島喺台灣叫做「釣魚臺列嶼」；中國大陸啲官方新聞稿就叫做「釣魚島及其附屬島嶼」；民間同傳媒中，「釣魚台」以及「釣魚台群島」都可泛指成笪列嶼。「釣魚台」可以僅指主島，有時亦可指成個群島。佢個主島「釣魚島」喺日本就叫做「魚釣島」。

釣魚嶼曾經喺明朝著作《順風相送》、《使琉球錄》出現。喺《使琉球錄》入面，陳侃提及過嗰陣同佢一齊坐船嘅閩人（福建人）船員唔識點揸船去琉球，搞到佢好擔心，於是陳侃喺福州問琉球國進貢船使者條路點行，琉球國之後又派咗三十個琉球船員代班福建人揸船去琉球，而途中陳侃就曾經喺呢段路上紀錄低「釣魚嶼」呢個名。

1845年，英國海軍調查呢啲島，軍艦三寶壟（Samarang）艦長愛德華·卑路乍（Edward Belcher）頭一次採用「Pinnacle Islands」（「尖頂群島」嘅意思）形容頂峰呈敎堂尖頂狀嘅南小島同北小島，之後日本海軍响19世紀早期紀錄叫主島做「Hoapin-su」，赤尾嶼就叫做「Raleigh Rock」等，同英軍之前用嘅名一樣。

1900年，日本博物學家黑岩恒將「Pinnacle Islands」譯成日文，並攞來命名南小島同北小島以及周邊的小岩礁，就叫「尖頭諸嶼」。再將釣魚嶼、黄尾嶼同「尖頭諸嶼」合埋一齊叫做「尖閣列島」。佢嘅調查報告「尖閣列島探險記事」入面，無寫到「赤尾嶼」。後尾日本政府將赤尾嶼計埋入「尖閣列島」入面，之後再慢慢改叫做「尖閣諸島」。

喺國際社會，中文名通常翻譯成Diaoyu Islands、Diaoyutai Islands、Tiaoyutai Islands、Diaoyutai、Diaoyu Dao、Tiaoyutai、Tiaoyu Tao，或閩南話「釣魚島」白話字形式Tiò-hî tó。