鐵甲威龍2
| 鐵甲威龍2 | |
|---|---|
| 資料明細 | |
| 導演 | Irvin Kershner[*] |
| 監製 | Jon Davison[*] |
| 編劇 | 法蘭米拿 Walon Green[*] Edward Neumeier[*] Michael Miner[*] |
| 主演 | Peter Weller[*] Nancy Allen[*] Dan O'Herlihy[*] Belinda Bauer[*] Tom Noonan[*] Gabriel Damon[*] Felton Perry[*] Galyn Görg[*] John Glover[*] 法蘭米拿 John Ingle[*] Leeza Gibbons[*] Mario Machado[*] Mark Rolston[*] Robert DoQui[*] Roger Aaron Brown[*] Stephen Lee[*] Thomas Rosales Jr.[*] Willard E. Pugh[*] Brandon Smith[*] Tzi Ma[*] Wanda De Jesus[*] Fabiana Udenio[*] George Cheung[*] Adam Faraiz[*] Ken Lerner[*] |
| 攝影 | Mark Irwin[*] |
| 製片商 | Orion Pictures[*] |
| 產地 | 美國 |
| 話 | 英文 |
| 上畫同發行 | |
| 上畫日期 | 美國：1990年6月22號 瑞典：1990年11月30號 德國：1990年9月13號 |
| 前集同續集 | |
| 續集 | 鐵甲威龍3 |
《鐵甲威龍2》（RoboCop 2）係一部1990年嘅美國科幻動作電影，由Irvin Kershner做導演，Frank Miller同埋Walon Green編劇，套片係1987年電影《鐵甲威龍》嘅續集，而且係「鐵甲威龍系列」嘅第二部作品。主演係Peter Weller、Nancy Allen、Dan O'Herlihy、Belinda Bauer、Tom Noonan、Gabriel Damon。
劇情
[編輯]底特律市（Detroit City）嘅警察因為唔滿意管理佢哋嘅大財團 OCP 公司削減咗四成嘅警員福利而進行罷工，減薪背後嘅原因其實係之前 OCP 公司自願巨額貸款咗畀底特律市政府，而佢哋睇準市政府係冇可能喺限期內清還欠款，咁就可以引用借貸合約中其中一項「合約期滿後市政府如仍未清還欠債，可接收底特律市管理權及資產」嘅抵償條款；為咗達成將底特律市私有化嚟重新改造賺更多嘅錢，OCP 公司甚至利用警員罷工嚟製造市內治安混亂，等將來有藉口話要清理區內嘅罪惡，可以名正言順咁接收底特律市。
同時間，一種稱為「核靈」（NUKE）嘅毒品已經充斥整個城市，毒品集團直頭無法無天到公然喺記者會刺殺反核靈嘅衛生局長，而被通緝嘅集團首腦兼核靈教派領袖簡恩（Cain）更囂張到喺電視公開發表錄影聲明，話只要邊個想繼續快樂佢一定會滿足大家。
市內有差唔多九成警察罷緊工，所以市內嘅罪案幾乎冇人理，啲道友要搵錢買毒品就趁亂週圍搶嘢搵錢，就連啲賊仔呢頭走去搶人嘢嗰頭可以即刻俾另一個賊仔打劫返；雖然係咁，但仍然有一個好特別嘅警察，佢唔理咩警員福利咩係 OCP，一於盡忠職守繼續打擊罪惡，佢就係半機械身體但擁有人類心腸嘅鐵甲威龍，當然重有佢喺第一集時一齊出勤嘅好拍檔露薏思（Lewis）。
威龍喺毒品拆家嘅口中知道咗核靈製造工場嘅位置，於是隻身前去展開拘捕行動。工場裏面除咗好多守衛同埋黑市勞工喺度做緊嘢之外，核靈集團嘅首腦簡恩同埋佢嘅幾個頭號馬仔都喺度，威龍衝入工場鎮壓晒所有抵抗，但就俾簡恩佢哋趁亂走甩咗；當威龍巡視犯罪現場嘅時候，見到一個大約十零歲嘅細路拎住鎗指住佢，呢個叫賀寶（Hob）嘅細路原來亦都係簡恩嘅馬仔之一，佢因為一時走唔甩所以暱咗喺度，不過威龍嘅偵緝程裏面係唔容許佢傷害婦孺同埋細路，賀寶睇穿咗呢點，所以對威龍開咗一鎗之後乘機走埋，威龍當場呆咗喺度，而威龍嘅記憶庫裏面就勾起咗佢前身梅菲對個仔嘅回憶。
因為威龍重有梅菲生前嘅記憶，所以佢間唔中會揸車去到梅菲遺孀嘅住所度遠遠咁偷望梅菲太太同埋個仔，搞到梅菲太太愛倫（Ellen）成日覺得梅菲重在生，重用不人道理由入稟法院控告 OCP 公司改造咗佢老公；受到 OCP 公司嘅壓力，亦為咗要令愛倫死心，威龍忍住心痛咁向梅菲太太否認自己係梅菲，話自己只係一件機器，而呢個身體係用嚟悼念梅菲嘅英勇。
喺一次跟踪嘅行動之中，威龍見到一個叫達菲（Duffy）嘅警員竟然同賀寶仔有接觸，佢除咗收黑錢提供警察嘅行動線報畀核靈集團之外，原來亦俾核靈毒癮控制住，威龍展開拘捕嘅時候向達菲進行迫供，於是爆出咗簡恩嘅大本營係喺一個荒廢工場；威龍隻身去到呢個工場，點知原來簡恩佢哋一早有埋伏，最後俾簡恩同佢班手下肢解拆散，重將威龍嘅散件掉喺警局門口示威。威龍嘅電路受到嚴重破壞，生物系統陷入癱瘓，生命危在旦夕，而 OCP 為咗要令社區嘅壞治安得到持續，達到接收嘅目標，希望救威龍嘅同時，亦令威龍減低打擊罪案嘅效率，於是由 OCP 新嚟嘅女技術支援主任茱莉安費絲（Juliette Faxx）出馬，將好多好多九唔搭八嘅指令硬塞入威龍個命令區入面，例如：講嘢唔准有警官口吻、如果唔係親切嘅說話就唔好講、要有親善形象、遵守交通規則、唔准衝紅燈…等一大堆，企圖令威龍變成一個親善大使。當親善威龍孖住露薏絲出勤去到搶劫案嘅犯罪現場時，明明個賊佬向佢哋開鎗想逃走，威龍重慢慢同人講道理，但係有個人喺禁煙區食煙佢就開鎗嚇人，重俾啲細路喺佢後面噴油整蠱；威龍潛意識都覺得自己好唔妥，於是氣沖沖咁去到警局門口嘅發電站度打開閘門，冒險伸手將幾萬伏特嘅電力傳入自己身體，想將所有指令刪除；喺警局門口罷工遊行嘅警察見到威龍嘅自殺式行為，即刻掉底晒啲標語去幫佢脫離險境，威龍解釋自己係執法者而唔係親善大使，而眼下嘅痛處就係核靈，呢番言論令到班警察非常慚愧，於是由威龍帶領下大舉出動去搗破核靈集團，行動令到簡恩重傷被捕，重喺一架運金車入面搜出咗幾億元嘅毒品錢，之但係賀寶同埋另一個女爪牙安琪（Angie）就趁亂開住另一架運金車走甩咗；本來安琪諗住去劫犯，但賀寶仔竟然用核靈威脅叫佢唔好理簡恩，想自立門戶。
喺之前一段時間，OCP 老總裁對於新升職嘅技術主管莊臣（Johnson）發展新一代半鐵械警察嘅進度好唔滿意，原因係其他殉職嘅警員都唔願意再生成為機械人，搞到一啟動就唔受控制咁自毀，新技術主任費絲為咗搏上位，於是就乘機獻計，老總裁見個舊嘅計劃冇乜進展就畀個機會佢去嘗試；費絲初步計劃係要搵出邊類人會願意同埋適合成為機械人，最後目標喺死囚嘅身上，佢認為班死囚橫掂都係要死，畀個機會佢哋重生成為不死嘅機械人一定唔會抗拒，於是喺上述嗰次嘅搗破核靈行動之後，被捕嘅簡恩就係成為咗費絲嘅理想對象，而且佢知道簡恩毒癮好深，係可以用毒品嚟控制佢聽話。
因為搗破核靈行動之中搜出嘅係犯罪嘅贓款，市政府係冇權動用成為政府資金，底特律市長古錫（Kuzak）為咗搵錢喺限期前要還畀 OCP 公司，無厘頭就搞咗個籌款晚會，目標係還款額三千八百萬美元，之不過市民嘅反應都好冷淡，做咗大半晚都只係籌到四千元左右；突然古錫接到安琪電話，話會捐出一大筆錢足夠市政府還債，重安排古錫同賀寶會面，商討捐款條件。當古錫同助手兩個人去到一個舊貨倉同賀寶傾生意嘅時候，外面忽然來咗架大貨車，重走咗個機械人落嚟，佢扯開貨倉門係咁搜索市長古錫嘅位置，目的係要暗殺古錫唔畀佢得到呢大筆資金；核靈爪牙見勢色唔對就即刻向呢個機械人開鎗，而佢亦以重火力還擊，最後啲爪牙瓜晒老襯，個場亦都炸到亂七八糟，好彩古錫無意中發現個排水窿，於是即刻捐入去沖咗出海灣逃走咗；隻機械人繼續搜嚟搜去始終搵唔到古錫，但就畀佢見到安琪正喺度注射核靈頂癮，安琪開頭嚇一嚇，但個機械人慢慢伸出機械臂，個面部顯示器重模擬出簡恩生前嘅樣貌對住佢笑，原來呢個就係由簡恩改造而成嘅 OCP 新一代機械警察。安琪因為見返簡恩覺得好開心，不過呢個機械簡恩突然反面無情，一出手就將安琪擊殺，而喺一邊偷睇嘅賀寶見到咁就即刻逃走，諗住匿喺架運金車裏面，點知俾機械簡恩發現咗，重亂鎗向住架車狂掃；當威龍接報嚟到鎗擊現場時，發現賀寶喺架運金車裏面奄奄一息，當賀寶話咗畀威龍知係邊個搞成咁之後就死埋。
OCP 老總裁喺新落成嘅 OCP 大廈舉行新市鎮規劃記者招待會，市長古錫逃過大難後嚟到會場，當見到老總裁為大家介紹新一代機械警察時成個人嚇咗一大跳，因為呢個機械人佢已經見過，發現暗殺嘅幕後真兇原來就係 OCP，但因為佢同賀寶嗰單交易其實係唔見得光，所以唯有忍住唔敢出聲。演講時，老總裁拎咗好大支核靈出嚟向記者宣佈要剷除毒害嚟迎接新市鎮，點知Robocain突然有反應想搶支核靈，呢個時候威龍拎住支大炮鎗嚟到會場向機械簡恩挑釁，機械簡恩即刻解除自己嘅武器限制嚟向威龍開火，重射傷在場好多人；不過經過一輪戰鬥之後，威龍再一次贏得勝利。
事後老總裁俾記者圍住問今次嘅死傷事件點負責，但佢一於闊佬懶理上車走人；露薏絲問威龍：「就咁畀佢甩身？」，威龍答：「有咩辦法，我哋只不過係普通人類嚟。」
演員
[編輯]- Peter Weller 飾演 Alex Murphy/鐵甲威龍
- Nancy Allen 飾演 Officer Anne Lewis
- Belinda Bauer 飾演 Dr. Juliette Faxx
- Dan O'Herlihy 飾演 "The Old Man" OCP President
- Felton Perry 飾演 Donald Johnson
- Tom Noonan 飾演 Cain
- Gabriel Damon 飾演 Hob